Ախտանիշներ - Գլխապտույտ

Գլխապտույտը կարող է ընթանալ տարբեր զգացողություններով և հարակից գանգատներով:

Գլխապտույտ ունեցող մարդիկ կարող են այն նկարագրել որպես մի շարք զգացողություններից որևէ մեկը, ինչպիսիք են՝

• շարժման կամ պտտման կեղծ զգացողություն (վերտիգո), հատկապես գլուխը շարժելիս, օրինակ՝ անկողնում շրջվելիս
• թուլության, ուշագնաց լինելու կամ ընկնելու զգացողություն
• անկայունություն, օրինակ՝ երերուն քայլվածք կամ հավասարակշռության կորուստ
• օդում լողալու, շփոթվածության կամ գլխում ծանրության զգացողություն:

Այս զգացողությունները կարող են առաջանալ կամ վատթարանալ քայլելիս, կանգնած վիճակում կամ գլուխը շարժելիս: Ձեր գլխապտույտը կարող է ուղեկցվել սրտխառնոցով կամ սկսվել այնքան հանկարծակի կամ լինել այնքան ուժեղ, որ դուք նստելու կամ պառկելու կարիք զգաք: Գլխապտույտի դրվագը կարող է տևել վայրկյաններ կամ օրեր և կարող է կրկնվել:

Ե՞րբ դիմել բժշկին

Ընդհանուր առմամբ, այցելեք ձեր բժշկին, եթե զգում եք կրկնվող, հանկարծակի, ծանր կամ երկարատև և անբացատրելի գլխապտույտ կամ վերտիգո:

Ստացեք շտապ բուժօգնություն, եթե զգում եք նոր, ուժեղ գլխապտույտ կամ վերտիգո, ինչպես նաև հետևյալներից որևէ մեկը՝

• հանկարծակի, ուժեղ գլխացավ
• կրծքավանդակի (ետկրծոսկրային) ցավ
• շնչառության դժվարություն կամ հևոց
• ձեռքերի կամ ոտքերի թմրածություն կամ կաթված (շարժելու անկարողություն)
• ուշագնացություն
• երկտեսություն
• հաճախացած կամ անկանոն սրտազարկ (տախիկարդիա կամ առիթմիա), որը զգացվում է որպես սրտխփոց
• շփոթվածություն կամ աղավաղված խոսք
• սայթաքում կամ քայլքի դժվարացում
• շարունակվող փսխումներ
• ցնցումներ
• լսողության հանկարծակի փոփոխություն
• դեմքի թմրածություն կամ թուլություն: