Գլխապտույտ. ինքնօգնություն

Գլխապտույտ. ինքնօգնություն

Եթե ունեք գլխապտույտի դրվագների հաճախակի կրկնություն, ապա այս խորհուրդները կարող են օգտակար լինել:

  • Գլխապտույտ զգալիս մնացեք հանգիստ պայմաններում որքան հանարավոր է: Նկատի ունեցեք, որ գլխապտույտը կարող է ուղեկցվել հավասարակշռության կորստով, որի պատճառով կարող եք ընկնել և վնասվածք ստանալ:
  • Մարմնի դիրքը փոխեք կամ տեղաշարժվեք դանդաղորեն, հատկապես, եթե պառկած կամ նստած վիճակից կանգնում եք:
  • Մինչև կանգնելը, մի քանի րոպե նստած մնացեք:
  • Խուսափեք գլխի հանկարծակի արագ շարժումներից, օրինակ՝ կտրուկ վերև կամ կողքեր նայելուց:
  • Փորձեք գլխապտույտի պահին խուսափել աստիճաններով վերև բարձրանալուց կամ իջնելուց, քանի որ կարող եք ընկնել և վնասել ձեզ, ծայրահեղ դեպքում ամուր բռնվեք կողաճաղերից:
  • Խուսափեք գլխապտույտի ժամանակ մեքենա վարելուց կամ վտանգավոր գործիքներով որևէ գործ անելուց. դուք կարող եք դրանով վնաս տալ ոչ միայն ձեզ, այլև ուրիշներին
  • Եթե ուշագնացության զգացում ունեք, պառկեք կամ ծայրահեղ դեպքում նստեք՝ մարմինը թեքելով առաջ դեպի ծնկները. սա թույլ կտա, որ արյունն ուղեղ հասնի ավելի արագ։
  • Սուր պտտական գլխապտույտի ժամանակ (վերտիգո) պառկեք մութ սենյակում, աչքերը փակ վիճակում:
  • Եթե ունեք գլխապտույտի հաճախակի կրկնվող դրվագներ, ապա տան հատակից հեռացրեք սայթակելուն կամ ընկնելուն նպաստող մանր առարկաները, լարերը, չորացրեք թաց մակերեսները և ձեռնարկեք այլ կանխարգելիչ միջոցառումներ:
  • Խուսափեք կոֆեինից, ալկոհոլից, կերակրի աղից և ծխախոտից: Այս նյութերի չափից դուրս շատ օգտագործումը կարող է վատթարացնել ձեր գանգատները:
  • Խմեք բավարար քանակով ջուր կամ հեղուկներ, սննդակարգը դարձրեք առողջ, կարգավորեք ձեր քունը և սովորեք սթրեսի կառավարման հմտությունները:
  • Եթե կասկածում եք, որ գլխապտույտի պատճառը ձեր ընդունած դեղերն են, առանց հետաձգելու տեղեկացրեք ձեր բժշկին:
  • Եթե ձեզ մոտ գլխապտույտն ուղեկցվում է սրտխառնոցով, փորձեք առանց դեղատոմսի վաճառվող հակահիստամինային դեղեր, օրինակ՝ Մեկլիզին կամ Դիմենհիդրինատ (Դրամամին): Նկատի ունեցեք, որ դրանք կարող են առաջացնել քնկոտություն, իսկ քնկոտություն չառաջացնող հակահիստամինային դեղերն այնքան էլ արդյունավետ չեն գլխապտույտ մեղմացնելու գործում:
  • Եթե գլխապտույտն առաջացել է շոգ միջավայրում կամ ջրազրկման պատճառով, տեղափոխվեք զով տեղ և խմեք ջուր:

Եթե, այնուամենայնիվ, դուք անհանգստացած եք ձեր գլխապտույտներից, խորհրդակցեք այդ մասին ձեր բժշկի հետ։

Հոդվածը վերանայվել է՝ 30-03-2021