Նկարագիր - Թմրամոլություն

Թմրամիջոցներից կախվածությունը, որը նաև կոչվում է թմրամիջոցների օգտագործման խանգարում, հիվանդություն է, որն ազդում է մարդու գլխուղեղի և վարքի վրա և հանգեցնում է օրինական կամ ապօրինի թմրամիջոցների կամ դրանց օգտագործումը վերահսկելու անկարողության:

Այպիսի հոգեներգործուն նյութերը, ինչպիսիք են ալկոհոլը, կանեփը (մարիխուանա) կամ նիկոտինը, նույնպես դիտարկվում են որպես թրմամիջոցներ կամ հոգեներգործուն նյութեր: Երբ կախվածության մեջ եք, կարող եք շարունակել օգտագործել թմրամիջոցը՝ հաշվի չառնելով այն վնասը, որն այդ թմրամիջոցը պատճառում է ձեզ:

Թմրամիջոցներից կախվածությունը և թմրամոլությունը կարող են սկսվել սոցիալական իրավիճակներում ժամանցային (ակումբային) թմրամիջոցների փորձնական օգտագործմամբ, և որոշ մարդկանց մոտ թմրամիջոցների օգտագործումը դառնում է ավելի հաճախակի: Մյուսների համար, հատկապես օփիոիդների՝ ափիոնատիպ նյութերի դեպքում, կախվածությունը սկսվում է այն ժամանակ, երբ նրանք սկսում են օգտագործել ապօրինի օփիոիդներ կամ ընդունում են նշանակված դեղերը կամ ստանում են դրանք ուրիշներից, ում նշանակվել են դրանք:

Կախվածության ռիսկը և այն, թե որքան արագ եք դառնում կախված, տարբեր թմրամիջոցների համար տարբեր են: Որոշ թմրամիջոցներ, ինչպիսին են օփիոիդները, ավելի բարձր ռիսկ ունեն և ավելի արագ են կախվածություն առաջացնում, քան մյուսները:

Ժամանակի ընթացքում ձեզ կարող է անհրաժեշտ լինել թմրամիջոցի ավելի մեծ քանակներ, որ զգաք նախկին հաճույքը կամ էյֆորիան: Շուտով դուք կարող եք թմրամիջոցի կարիք ունենալ պարզապես միայն լավ զգալու կամ վատ ինքնազգացողությունը թեթևացնելու համար: Երկար ժամանակ թմրամիջոց օգտագործելիս կարող եք մի օր պարզել, որ գնալով ավելի դժվար է ապրել առանց թմրամիջոցի: Թմրամիջոցների օգտագործումը դադարեցնելու փորձերը կարող են դրանք կրկին օգտագործելու ուժեղ ցանկություն և ֆիզիկական ախտանիշներ առաջացնել: Դրանք կոչվում են հանման կամ զրկանքի ախտանիշներ:

Ձեր բժշկի, ընտանիքի, ընկերների, աջակցող խմբերի կամ կազմակերպված բուժման ծրագրի օգնությունը կարող են օգնել ձեզ, որ հաղթահարեք թմրամիջոցներից կախվածությունը և վերադառնաք սովորական առօրյա: