Կանխարգելում - Թմրամոլություն

Թմրամիջոցներից կախվածությունը կանխելու լավագույն միջոցը ընդհանրապես թմրամիջոց չօգտագործելն է. սա կոչվում է առաջնային կանխարգելում:

Եթե ​​ձեր բժիշկը ձեզ նշանակել է որևէ դեղամիջոց, որը կարող է կախվածություն առաջացնել, զգույշ եղեք դեղն ընդունելիս և հետևեք ձեր բժշկի նշանակումներին և հրահանգներին:

Բժիշկները, որպես կանոն, այսպիսի դեղամիջոցները նշանակում են անվտանգ դեղաչափերով և չափաքանակներով և վերահսկում են դրանց օգտագործումը, որ ձեզ չափազանց մեծ քանակներ չտրամադրեն կամ բուժումը չշարունակվի երկար ժամանակ: Եթե ​​կարծում եք, որ ձեզ նշանակված դեղամիջոցի սահմանված դեղաչափից ավելի մեծ դեղաչափի կարիք ունեք, զրուցեք ձեր բժիշկի հետ:

Թմրամիջոցների չարաշահման կանխարգելումը դեռահասների շրջանում

Ձեր դեռահասների մոտ թմրամիջոցների չարաշահումը կանխելու համար կատարեք հետևյալ քայլերը:

• Շփվեք և հաղորդակցվեք. զրուցեք ձեր երեխաների հետ թմրամիջոցների օգտագործման և չարաշահման վտանգների մասին:
• Լսեք և հասկացեք. լավ ունկնդիր եղեք, երբ ձեր երեխաները խոսում են հասակակիցների ճնշման մասին և աջակցեք դրան դիմակայելու նրանց ջանքերին:
• Եղեք լավ օրինակ. մի՛ չարաշահեք ալկոհոլ կամ կախվածություն առաջացնող թմրամիջոցներ: Թմրամիջոցներ չարաշահող ծնողների երեխաները թմրամիջոցներից կախվածության ավելի մեծ վտանգի տակ են:
• Ամրացրեք կապը և փոխհարաբերությունները. աշխատեք ձեր երեխաների հետ փոխհարաբերությունների վրա: Ձեր և ձեր երեխայի միջև ամուր, կայուն կապը կնվազեցնի նրա կողմից թմրամիջոցներ օգտագործելու կամ չարաշահելու ռիսկը:

Թմրամիջոցների օգտագործման կրկնության (ռելափսի) կանխարգելում

Երբ ձեզ մոտ թմրամիջոցներից կախվածություն է զարգացել, դուք մեծ ռիսկի տակ եք, որ կրկին թմրամիջոց կօգտագործեք: Եթե ​​դուք վերսկսեք օգտագործել թմրամիջոց, հավանական է, որ կրկին կորցնեք վերահսկողությունը դրա օգտագործման նկատմամբ, նույնիսկ եթե բուժում եք անցել և որոշ ժամանակ չեք օգտագործել թմրամիջոց:

• Հետևեք ձեր բուժման ծրագրին. մշտապես հետևեք ձեր հակումները: Կարող է թվալ, թե դուք ապաքինվել եք, և ձեզ հարկավոր չէ շարունակել քայլեր ձեռնարկել՝ թմրամիջոցներից զերծ մնալու համար: Սակայն թմրամիջոցներից վերջնական հրաժարվելու ձեր շանսերը շատ ավելի մեծ կլինեն, եթե շարունակեք այցելել ձեր թերապևտին կամ խորհրդատուին, մասնակցեք խմբային հանդիպումներին և ընդունեք ձեզ նշանակված դեղամիջոցները:
• Խուսափեք բարձր ռիսկային իրավիճակներից. մի՛ վերադարձեք այն շրջապատը, որտեղից ձեռք էիք բերում ձեր թմրամիջոցները: Եվ հեռու մնացեք թմրամիջոցների հետ կապ ունեցող ձեր հին ծանոթներից և ընկերներից:
• Անմիջապես բուժօգնության դիմեք, եթե նորից օգտագործեք թմրամիջոց. եթե ​​նորից սկսեք օգտագործել թմրամիջոց, զրուցեք ձեր բժշկի, ձեր հոգեկան առողջության մասնագետի կամ մեկ ուրիշի հետ, ով կարող է անմիջապես օգնել ձեզ: