Պատճառներ - Չոր մակուլյար դեգեներացիա

Չոր կամ ատրոֆիկ (ոչ էքսուդատիվ) մակուլյար դեգեներացիայի ճշգրիտ պատճառը դեռևս մնում է անհայտ, սակայն հետազոտությունները վկայում են, որ որոշակի դեր կարող են խաղալ գեները և միջավայրային գործոնները, այդ թվում՝ ծխելը, գիրությունը և սննդակարգը:

Վիճակը զարգանում է աչքի տարիքային փոփոխությունների՝ ծերացման հետ: Չոր մակուլյար դեգեներացիան ազդում է ցանցաթաղանթի դեղին բծի՝ մակուլայի վրա: Մակուլան ցանցաթաղանթի այն հատվածն է, որը պատասխանատու է տեսադաշտի ուղիղ գծով հստակ տեսողության համար: Ժամանակի ընթացքում նյութափոխանակային արգասիքները, որոնք կոչվում են դրուզեն կուտակվում են ցանցաթաղանթի և բուն անոթաթաղանթի (խորիոիդեա) միջև՝ առաջացնելով մակուլայի հյուսվածք ապաճում (ատրոֆիա), սպացում և տեսողության համար պատասխանատու լուսազգաց բջիջների կորուստ:

Մակուլան կազմում է ցանցաթաղանթի ընդամենը 2,1%-ը, սակայն գլխուղեղի կեղևի տեսողական անալիզատորի գրեթե կեսը վերլուծում է մակուլյար տեղեկությունը:

Ռիսկի գործոններ

Հետևյալ գործոնները կարող են բարձրացնել ձեզ մոտ մակուլյար դեգեներացիայի զարգացման ռիսկը:

• Տարիք. այս հիվանդությունն առավել հաճախ հանդիպում է 60 տարեկանից բարձր մարդկանց մոտ։
• Ընտանեկան պատմություն (անամնեզ) և գենետիկա. հիվանդությունն ունի գենետիկ (ժառանգական) բաղադրիչ: Հետազոտողները հայտնաբերել են հիվանդության հետ կապված մի քանի գեն:
• Ռասա. մակուլյար դեգեներացիան ավելի տարածված է սպիտակամորթ մարդկանց մոտ:
• Ծխելը. ծխախոտ ծխելը կամ ծխախոտի ծխի ազդեցությանը պարբերաբար ենթարկվելը զգալիորեն մեծացնում է մակուլյար դեգեներացիայի ռիսկը:
• Գիրություն. հետազոտությունները ցույց են տալիս, որ գեր լինելը մեծացնում է այն բանի հավանականությունը, որ վաղ կամ միջանկյալ մակուլյար դեգեներացիան կզարգանա է հիվանդության ավելի ծանր՝ ուշացած ձևի:
• Սրտանոթային հիվանդություն. եթե ունեք սրտի կամ արյունատար անոթային հիվանդություններ, կարող եք ենթարկվել մակուլյար դեգեներացիայի ավելի բարձր ռիսկի: