Ցավոտ դաշտան (դիսմենոռեա)

Բազմաթիվ կանայք դաշտանի օրերին որովայնի ստորին հատվածում զգում են որոշակի ցավեր, կծկանքներ կամ անհարամարավետություն (դիսկոմֆորտ)։

Ցավոտ դաշտանը կամ դիսմենոռեան ավելի տարածված է երիտասարդ կանանց շրջանում և տարիքի հետ կարող է մեղմանալ կամ լիարժեք վերանալ։

Որոշ կանանց համար դաշտանային կծկանքները զուտ առաջացնում են որոշակի անհարմարավետություն: Մյուսների համար դրանք կարող են այնքան սաստիկ բնույթ կրել, որ յուրաքանչյուր ամիս մի քանի օրվա ընթացքում բացասաբար ազդեն նրանց առօրյա գործերի վրա:

Կան ցավոտ դաշտանի երկու տեսակներ՝ առաջնային և երկրորդային։

  • Առաջնային դիսմենորեա. սա ցավոտ դաշտանի տարածված տեսակն է, որը հանդիպում է սեռահասունացման մեջ գտնվող աղջիկների և երիտասարդ կանանց շրջանում։ Նման դեպքերում դաշտանի ցավոտությունը արգանդի վիճակի հետ որևէ կապ չունի։ Դեռևս լիարժեք բացատրված չէ, թե ինչն է առաջնային դիսմենոռեայի պատճառը, սակայն որոշ վերապահումներով ընդունվում է, որ հավանական պատճառն արգանդի լորձաթաղանթում (էնդոմետրիումում) օրգանիզմի կողմից արտադրվող որոշ քիմիական նյութերի՝ պրոստոգլանդինների կուտակումն է։ Այս նյութերն իրականում օգնում են արգանդին, որ դաշտանի շրջանում վերջինիս պատերը դառնան ավելի լարված։ Կծկանքային ցավն առաջնային դիսմենոռեայի ամենահաճախ հանդիպող նշանն է։ Դրանք սովորաբար ի հայտ են գալիս դաշտանից մեկ օր առաջ և տևում 1-3 օր (թեև ցավերի տևողությունը կարող է տարբեր դաշտանների ժամանակ լինել տարբեր)։
  • Երկրորդային դիսմենորեա. ցավերի այս տեսակն առաջանում է արգանդի վիճակի վրա ազդող որևէ կոնկրետ պատճառի ազդեցությամբ՝ էնդոմետրիոզ, արգանդի միոմա, ադենոմիոզիտներ և փոքր կոնքի օրգանների բորբոքային հիվանդություն (ՓԿՕԲՀ)։ Դուք գուցե տեղյակ չլինեք այս հիվանդությունների առկայության մասին, սակայն դաշտանային ցավերի բնույթի փոփոխությունը (օրինակ՝ ավելի ցավոտ կամ ավելի տևական դառնալը) կարող է հուշել երկրորդային դիսմենոռեայի առկայության մասին։ Երկրորդային դիսմենոռեան ավելի հատուկ է 30-անց և ծննդաբերած կանանց։ Երկրորդային դիսմենոռեայի մյուս նշաններից կարող են դրսևորվել դաշտանից դուրս արյունահոսությունը, ցավոտ սեռական հարաբերությունը, անկանոն դաշտանները կամ դաշտանի ցավերին նմանվող, սակայն դաշտանների միջև առաջացող ցավերը։ Նման դեպքերում ձեր բժշկին այցելելը դառնում է կարևոր։բժշկին։

Հոդվածը վերանայվել է՝ 05-05-2021