Ցավոտ դաշտան. ախտորոշում

Ցավոտ դաշտան. ախտորոշում

Բժիշկը կլսի ձեզ, կուսումնասիրի ձեր հիվանդության պատմությունը և կանցկացնի զննում, այդ թվում՝ ներքին զննում:

Ներքին զննման ընթացքում բժիշկը կստուգի ձեր վերարտադրողական օրգանների բոլոր հնարավոր շեղումները, ինչպես նաև վարակի նշանների առկայությունը:

Եթե ձեր բժիշկը կասկածի, որ ձեր դաշտանային ցավերի կամ կծկանքների հիմքում ընկած է որևէ այլ առողջական խնդիր, խորհուրդ կտա մի շարք լրացուցիչ հետազոտություններ:

  • Գերձայնային հետազոտություն. սոնոգրաֆիայի օգնությամբ բժիշկը կարող է զննել ձեր արգանդի, արգանդի վզիկի, ֆալոպյան փողերի և ձվարանների սոնոգրաֆիկ պատկերները և հայտնաբերել կառուցվածքային և այլ շեղումներ, ինչպես նաև նորագոյացություններ:
  • Պատկերման այլ հետազոտություններ. համակարգչային տոմոգրաֆիան (ԿՏ) կամ մագնիսա-ռեզոնանսային տոմոգրաֆիան (ՄՌՏ) թույլ են տալիս ստանալ վերարտադրողական օրգանների ավելի մանրակրկիտ պատկերներ: ԿՏ-ն օգտագործում է ռենտգենյան ճառագայթներ, իսկ ՄՌՏ-ն՝ ռադիոալիքներ և հզոր մագնիսական դաշտեր: Երկու հետազոտություններն էլ կարող են տրամադրել որևէ շրջանի կամ օրգանի տարբեր խորության պատկերներ (շերտագիր):
  • Լապարոսկոպիա. ավելի հազվադեպ բժիշկը կարող է առաջարկել լապարոսկոպիկ ախտորոշում, հատկապես, եթե կասկածում է էնդոմետրիոզ, կպումներ, միոմաներ, ձվարանի կիստաներ կամ արտաարգանդային հղիություն: Lապարոսկոպը ոսպնյակ ունեցող տելեսկոպիկ խողովակ է, որը սովորաբար կցվում է տեսախցիկին: Ժամանակակից լապարոսկոպները հագեցված են թվային մատրիցաներով և ապահովում են բարձր որակի պատկերներ։ Խողովակը նաև միացված է օպտիկական մալուխին՝ լուսավորված «սառը» լույսի աղբյուրից: Լապարոսկոպիայի ընթացքում բժիշկը ձեր որովայնի պատի փոքր (սովորաբար 0,5-1,5 սմ) բացվածքներով որովայնի խոռոչ է ներմուծում լապարոսկոպ, որի միջոցով զննում է ձեր փոքր կոնքի օրգանները:

Հոդվածը վերանայվել է՝ 02-05-2021