Ձեր դաշտանային ցիկլի ընթացքում ձեր արգանդը կծկվում է, որ օգնի շերտազատված լորձաթաղանթի դուրս մղմանը:
Հորմոնանման նյութերը (պրոստագլանդիններ), որոնք ներգրավված են ցավի և բորբոքման մեջ, խթանում են արգանդի մկանների կծկումները: Պրոստագլանդինների ավելի բարձր մակարդակները կապված են ավելի սուր դաշտանային կծկանքային (սպաստիկ) ցավերի հետ:
Դաշտանային ցավերի պատճառ կարող են լինել հետևյալ հիվանդություններն ու վիճակները:
- Էնդոմետրիոզ. արգանդի լորձաթաղանթի նման գործող հյուսվածքն աճում է արգանդից դուրս, առավել հաճախ՝ արգանդափողերի (ֆալոպյան փողերի), ձվարանների կամ կոնքը ծածկող լորձաթաղանթների վրա: Սա դաշտանային ցավի առավել հաճախ հանդիպող պատճառն է:
- Արգանդային ֆիբրոիդներ (միոմա). արգանդի պատի այս ոչ քաղցկեղային գոյացությունները կարող են ցավի պատճառ դառնալ:
- Ադենոմիոզ. ձեր արգանդը ծածկող հյուսվածքը (լորձաթաղանթ) սկսում է ներաճել արգանդի մկանային պատերի մեջ:
- Փոքր կոնքի օրգանների բորբոքային հիվանդություն (ՓԿՕԲՀ). կանանց վերարտադրողական օրգանների այս վարակը սովորաբար առաջանում է սեռական ճանապարհով փոխանցվող բակտերիայից:
- Արգանդի վզիկի նեղացում (ցերվիկալ սթենոզ). որոշ կանանց մոտ արգանդի վզիկի բացվածքն այնքան նեղ է, որ խոչընդոտում է դաշտանային հոսքի հեռացմանը՝ առաջացնելով արգանդի խոռոչում ճնշման բարձրացում և ցավ:
Ռիսկի գործոններ
Ձեզ մոտ դաշտանային ցավերի ռիսկը կարող է մեծ լինել, եթե՝
- 30 տարեկանից փոքր եք
- սկսել եք սեռական հասունացումը վաղ՝ 11 տարեկանում կամ ավելի փոքր տարիքում
- դաշտանների ժամանակ ուժեղ արյունահոսում եք (մենոռագիա)
- ունեք անկանոն դաշտանային արյունահոսություն (մետրորագիա)
- ունեք դաշտանային ցավերի ընտանեկան պատմություն (դիսմենորեա)
- ծխում եք:
Հոդվածը հրապարակվել է՝ 02-05-2021
Վերջին վերանայում՝ 05-04-2024