Էրեկտիլ դիսֆունկցիա (իմպոտենցիա)

Էրեկտիլ դիսֆունկցիան կամ իմպոտենցիան այն վիճակն է, երբ չի հաջողվում ստանալ կամ (դրանից հետո) պահել էրեկցիայի այն մակարդակը, որն անհրաժեշտ է բավարարող սեռական հարաբերություն ապահովելու համար:

Այլ կերպ ասած, էրեկտիլ դիսֆունկցիան կամ իմպոտենցիան սեռական հարաբերության ընթացքում առնանդամի բավարար պնդության էրեկցիայի հասնելու կամ այն պահպանելու անհնարինությունն է:

Բազմաթիվ տղամարդիկ իրենց սեռահասուն կյանքի ընթացքում առնչվել են այս խնդրին: Լինելով առողջական խնդիր, էրեկտիլ դիսֆունկցիան նաև սոցիալական խնդիր է, քանի որ կարող է հանգեցնել ընտանեկան անախորժությունների, բաժանությունների և այլ հետևանքների:

Տղամարդու տարիքին զուգահեռ էրեկտիլ դիսֆունկցիայի խնդիրը դառնում է ավելի արդիական:

Էրեկտիլ դիսֆունկցիան կարող է ունենալ բազմաթիվ պատճառներ, որոնք կարելի է բաժանել երկու խմբի՝

  • ֆիզիկական՝ սրտանոթային հիվանդություններ, շաքարային դիաբետ, նյարադաբանական խնդիրներ, դեղերի կողմնակի ազդեցություններ և այլն
  • հոգեբանական՝ սթրես, տագնապ կամ դեպրեսիա:

Թեև դեպքերի 80%-ում պատճառը կապված է ֆիզիոլոգիական հիվանդության հետ, շատ հաճախ էրեկտիլ դիսֆունկցիայով տղամարդու մոտ միաժամանակ առկա են ինչպես ֆիզիոլոգիական, այնպես էլ հոգեբանական գործոններ:

Բժիշկն ախտորոշում է էրեկտիլ դիսֆունկցիա, եթե ձեր գանգատները շարունակվում են առնվազն 3 ամսվա ընթացքում:

Էրեկտիլ դիսֆունկցիայի բուժումն առաջին հերթին վերաբերվում է հավանական պատճառական գործոնների վերացմանը կամ մեղմացմանը, ինչպես նաև հիմնական հիվանդությունների բուժմանը: Ձեր դեպքում գուցե անհրաժեշտ լինի բուժել կամ բարելավել ինչպես ֆիզիոլոգիական, այնպես էլ հոգեբանական խնդիրները, քանի որ դրանք սովորաբար դրսևորվում են տարբեր զուգակցումներով: Ապրելակերպի փոփոխությունը և հոգեսոցիալական խնդիրների լուծումը նույնպես կարևոր են:

Ֆիզիոլոգիական պատճառների շտկման համար բժիշկը ձեզ կնշանակի համապատասխան դեղեր: Բուժական այլ, այդ թվում՝ վիրահատական մեթոդները կարող են առաջարկվել, եթե դեղորայքային բուժումն արդյունք չի տալիս (օրինակ՝ առնանդամի «պոմպ», իմպլանտ և այլն):

Էրեկտիլ դիսֆունկցիայի հոգեբանական գործոնների բուժման համար դուք կարիք կունենաք դիմելու հոգեկան առողջության մասնագետին (հոգեթերապևտ), ով կարող է նշանակել կոգնիտիվ-վարքաբանական թերապիա կամ ձեր հոգեբանական վիճակը բարելավող այլ մեթոդներ:

Էրեկտիլ դիսֆունկցիայի բուժման մեջ կիրառվող դեղերն արժի գնել միայն դեղատներից և միայն ձեր բժշկի նշանակմամբ: Խուսափե՛ք նման դեղերի առցանց գնումից:

Առաջարկում ենք նաև դիտել էրեկցիայի խանգարումների վերաբերյալ տեսանյութ

Հոդվածը վերանայվել է՝ 31-03-2021