Skip to main content

Առաջին բանը, որ կանի ձեր բժիշկը, համոզվելն է, որ դուք ճիշտ բուժում եք ստանում ցանկացած առողջական խնդրի համար, որը կարող է առաջացնել կամ վատթարացնել ձեր էրեկտիլ դիսֆունկցիան:

Կախված ձեր էրեկտիլ դիսֆունկցիայի պատճառներից և ծանրության աստիճանից, ինչպես նաև հիմքում ընկած առողջական խնդրից, բժիշկը կարող է ձեզ առաջարկել տարբեր բուժական մոտեցումներ: Ձեր բժիշկը կարող է բացատրել յուրաքանչյուր բուժման ռիսկերն ու օգուտները և կքննարկի ձեր նախասիրությունները: Ձեր զուգընկերոջ նախասիրությունները նույնպես կարող են դեր խաղալ ձեր բուժման ընտրության մեջ:

Բերանային ընդունման (օրալ) դեղամիջոցներ

Բերանային ընդունման դեղամիջոցները բազմաթիվ տղամարդկանց համար էրեկտիլ դիսֆունկցիայի հաջող բուժում են: Դրանք ներառում են՝

  • Սիլդենաֆիլ (Վիագրա)
  • Տադալաֆիլ (Ադցիրկա, Սիալիս)
  • Վարդենաֆիլ (Լևիտրա, Ստաքսին)
  • Ավանաֆիլ (Ստենդրա):

Բոլոր չորս դեղամիջոցներն էլ ուժեղացնում են ազոտի օքսիդի ազդեցությունը՝ բնական քիմիական նյութ, որն արտադրում է ձեր օրգանիզմը: Ազոտի օքսիդը թուլացնում է առնանդամի մկանները, որի շնորհիվ մեծացնում է արյան հոսքը և թույլ է տալիս էրեկցիա ստանալ՝ ի պատասխան սեռական գրգռման:

Այս հաբերից մեկնումեկի ընդունումը ինքնաբերաբար էրեկցիա չի առաջացնում: Նախ անհրաժեշտ է սեռական խթանում՝ առնանդամի նյարդերից ազոտի օքսիդի արտազատման համար: Այս դեղամիջոցներն ուժեղացնում են այդ ազդանշանը՝ որոշ մարդկանց մոտ նորմալացնելով առնանդամի գործառույթը: էրեկտիլ դիսֆունկցիայի դեմ բերանային ընդունման դեղամիջոցները աֆրոդիզիակներ չեն, այսինքն, չեն առաջացնում սեռական գրգռում և նորմալ էրեկցիա ունեցող մարդկանց անհրաժեշտ չեն:

Դեղամիջոցները տարբերվում են իրենց դեղաչափերով, ազդեցության ժամկետով և կողմնակի ազդեցություններով: Հնարավոր կողմնակի ազդեցությունները ներառում են՝ կարմրություն, քթի փակվածություն, գլխացավ, տեսողական փոփոխություններ, մեջքի ցավ և ստամոքսի խանգարում:

Ձեր բժիշկը կքննարկի ձեր կոնկրետ իրավիճակը՝ որոշելու, թե որ դեղամիջոցը կարող է լավագույնս ազդել: Այս դեղամիջոցները կարող են անմիջապես չբուժել ձեր էրեկտիլ դիսֆունկցիան: Հնարավոր է, որ ձեզ անհրաժեշտ լինի աշխատել ձեր բժշկի հետ՝ ձեզ համար ճիշտ դեղամիջոց և ճիշտ դեղաչափ գտնելու համար:

Էրեկտիլ դիսֆունկցիայի դեմ որևէ դեղամիջոց ընդունելուց առաջ, ներառյալ առանց դեղատոմսի հավելումները և բուսական միջոցները, դիմեք ձեր բժշկին: Էրեկտիլ դիսֆունկցիայի դեմ դեղամիջոցները ոչ բոլորի մոտ են արդյունավետ և կարող են ավելի քիչ արդյունավետ լինել որոշակի իրավիճակներում, օրինակ՝ շագանակագեղձի վիրահատությունից հետո կամ դիաբետի առկայության դեպքում: Որոշ դեղամիջոցներ կարող են նաև վտանգավոր լինել, եթե դուք՝

  • ընդունում եք նիտրատային դեղամիջոցներ, որոնք սովորաբար նշանակվում են կրծքավանդակի ցավի (կրծքահեղձուկի) դեպքում, ինչպիսիք են Նիտրոգլիցերինը (Նիտրո–Դուր, Նիտրոստատ և այլն), Իզոսորբիդի մոնոնիտրատը (Մոնոկետ) և Իզոսորբիդի դինիտրատը (Իզորդիլ, Բիդիլ)
  • ունեք սրտային հիվանդություն կամ սրտային անբավարարություն
  • ունեք շատ ցածր արյան ճնշում (հիպոտենզիա):

Այլ դեղեր

Էրեկտիլ դիսֆունկցիայի ժամանակ նշանակվող այլ դեղերից են՝

  • Ալպրոստադիլի ինքնաներարկում. այս մեթոդի ժամանակ դուք ինքներդ բարակ ասեղով ձեր առնանդամի հիմքում կամ կողմում ներարկում եք Ալպրոստադիլ (Կավերջեկտ, Էդեքս): Որոշ դեպքերում, այլ վիճակների համար նախատեսված դեղամիջոցները նույնպես օգտագործվում են առնանդամային ներարկումների համար՝ ինքնուրույն կամ համակցված: Օրինակները ներառում են՝ Ալպրոստադիլ և Ֆենտոլամին: Այս համակցված դեղամիջոցները հաճախ հայտնի են որպես «բիմիքս» (եթե պարունակում են երկու դեղամիջոցներ) կամ «տրիմիքս» (երեք դեղամիջոց): Յուրաքանչյուր ներարկում պարունակում է այնքան դեղաչափ, որ առաջացնի մեկ ժամից ոչ ավելի տեւող էրեկցիա: Օգտագործվող ասեղը շատ բարակ է, ուստի ներարկման տեղում ցավը սովորաբար աննշան է: Կողմնակի ազդեցությունները կարող են ներառել՝ ներարկման տեղից թույլ արյունահոսություն, երկարատև էրեկցիա (պրիապիզմ) և, հազվադեպ, ներարկման տեղում սպիական հյուսվածքի զարգացում:
  • Ալպրոստադիլի միզուկային մոմիկ. Ալպրոստադիլի (Մյուզ) ներմիզուկային բուժման ժամանակ ձեր առնանդամի ներսում՝ միզուկի արտաքին բացվածքով տեղադրվում է Ալպրոստադիլի բարակ մոմիկ։ Էրեկցիան սովորաբար սկսվում է 10 րոպեի ընթացքում և, եթե արդյունավետ է, տևում է 30-60 րոպե: Կողմնակի ազդեցություններից են առնանդամի ներսում այրոցի զգացումը, միզուկից թույլ արյունահոսությունը և առնանդամի ներսում սպիական հյուսվածքի ձևավորումը:
  • Տեստոստերոնի փոխարինում. որոշ մարդիկ ունեն էրեկտիլ դիսֆունկցիա, որը կարող է բարդանալ տեստոստերոն հորմոնի ցածր մակարդակով: Այս դեպքում տեստոստերոնային փոխարինող բուժումը կարող է առաջարկվել որպես առաջին քայլ կամ տրվել այլ բուժումների հետ համատեղ:

Առնանդամի պոմպեր, վիրահատություններ և իմպլանտներ

Եթե դեղերն արդյունավետ չեն կամ ձեր դեպքում ցուցված չեն, բժիշկը կարող է խորհուրդ տալ այլ բուժումներ, այդ թվում՝

Եթե ձեր դեպքում դեղերը արդյունավետ կամ տեղին չեն, ձեր բժիշկը կարող է առաջարկել այլ բուժում: Այլ բուժումները ներառում են հետևյալը:

  • առնանդամի պոմպեր, երբ առնանդամի վրա դրված վակուումային էրեկցիայի սարքով ստեղծվում է բացասական ճնշում, որն օգնում դեպի առնանդամ արյան հոսքին
  • առնանդամային իմպլանտներ, երբ առնանդամի մեջ, երկու կողմերից տեղադրվում են ձողաձև իմպլանտներ:

Քննարկեք այս բուժման մեթոդների դրական և բացասական կողմերը ձեր բժշկի հետ:

Ֆիզիկական վարժանքներ

Վերջին հետազոտությունները ցույց են տվել, որ ֆիզիկական վարժանքները, հատկապես չափավորից մինչև ուժեղ աերոբիկ ակտիվությունը, կարող են բարելավել էրեկտիլ դիսֆունկցիան:

Նույնիսկ ավելի քիչ լարված, կանոնավոր վարժանքները կարող են նվազեցնել էրեկտիլ դիսֆունկցիայի ռիսկը: Ակտիվության մակարդակի բարձրացումը կարող է ավելի նվազեցնել ձեր ռիսկը:

Քննարկեք վարժանքների ծրագիրը ձեր բժշկի հետ:

Հոգեբանական խորհրդատվություն

Եթե ձեր էրեկտիլ դիսֆունկցիան առաջանում է սթրեսի, անհանգստության կամ դեպրեսիայի հետևանքով, կամ ձեր վիճակը սթրես և փոխհարաբերությունների լարվածություն է առաջացնում, ձեր բժիշկը կարող է առաջարկել, որ դուք կամ դուք և ձեր զուգընկերը այցելեք հոգեբանին կամ խորհրդատուին:

Հոդվածը հրապարակվել է՝ 09-03-2021
Վերջին վերանայում՝ 06-04-2024