Էրեկտիլ դիսֆունկցիա. ինքնօգնություն

Էրեկտիլ դիսֆունկցիա. ինքնօգնություն

Բազմաթիվ տղամարդկանց մոտ էրեկտիլ դիսֆունկցիայի կամ իմպոտենցիայի առաջացման կամ վատթարացման պատճառը կապ ունի ապրելակերպի հետ:

Հակառակ դրան, առողջացնելով ձեր ապրելակերպը, դուք կարող եք օգնել էրեկտիլ դիսֆունկցիայի կանխարգելմանը, ախտանիշների մեղմացմանը կամ բուժումը դարձնել առավել արդյունավետ:

Ահա օգտակար որոշ խորհուրդներ:

  • Եթե ծխող եք, դադարեցրե՛ք այն. եթե ինքնուրույն չեք կարողանում ձերբազատվել ծխախոտից, դիմեք օգնության, այդ թվում՝ բուժօգնության: Փորձեք նիկոտինին փոխարինող միջոցներ, օրինակ՝ մաստակ, զրուցեք բժշկի հետ դեղերով բուժման հնարավորության մասին, խնդրեք ընտանիքի անդամներին, մտերիմներին ու գործընկերներին, որ աջակցեն ծխախոտից հրաժարվելու ձեր ջանքերին:
  • Ազատվե՛ք ավելորդ կիլոգրամներից. ավելցուկային քաշը, առավել ևս՝ գիրությունը կամ ճարպակալումը կարող են նպաստել էրեկտիլ դիսֆունկցիայի առաջացմանը կամ վատթարացնել առկա գանգատները:
  • Ձեր առօրյան դարձրե՛ք ֆիզիկապես ակտիվ. կանոնավոր վարժանքները կարող են օգնել էրեկտիլ դիսֆունկցիայի զարգացմանը նպաստած հիվանդությունների կամ առողջական խնդիրների հաղթահարմանը տարբեր ուղիներով, այդ թվում՝ օգնելով սթրեսի կրճատմանը, կարգավորելով ավելորդ քաշը կամ բարելավելով արյան շրջանառությունը:
  • Ըստ անհրաժեշտության ստացե՛ք ալկոհոլի կամ թմրամիջոցների չարաշահման դեմ բուժում. ալկոհոլի չարաշահումը կամ որոշ ապօրինի թմրամիջոցների օգտագործումը կարող են վատթարացնել էրեկտիլ դիսֆունկցիան ինչպես ուղղակիորեն, այնպես էլ առաջացնելով քրոնիկ առողջական խնդիրներ:
  • Բարելավե՛ք ձեր զուգընկերոջ հետ փոխհարաբերությունները. քննարկեք նրա հետ այսպես կոչված «զույգերի խորհրդատվություն» անցնելու հարցը, առավել ևս, եթե ունեք նրա հետ (միջանձնային) հաղորդակցումը բարելավելու կամ սեփական (ներանձնային) խնդիրները հաղթահարելու դժվարություններ:

Այլընտրանքային բժշկություն

Մինչև որևէ հավելում օգտագործելը ստուգեք ձեր բժշկից, թե որքանով է այն անվտանգ ձեզ համար, հատկապես, եթե ունեք որևէ քրոնիկ առողջական խնդիր: Հիշեք, որ էրեկտիլ դիսֆունկցիայի համար գովազդվող որոշ այլընտրանքային արտադրանքներ կարող են վտանգավոր լինել ձեր առողջությանը:

Օրինակ, ամերիկյան FDA կազմակերպությունը հրապարակել է մի շարք նախազգուշացումներ «բուսական վիագրայի» որոշ տեսակների մասին, որոնց ակտիվ բաղադրամասերի դեղաչափերը կարող են լինել անհայտ կամ պարունակել անհայտ ծագման քիմիական միացություններ:

Հոդվածը վերանայվել է՝ 31-03-2021