Բուժում - Գաստրոէնտերիտ

Գաստրոէնտերիտի ամենակարևոր բուժումը հեղուկներ ընդունելն է։

Նման դեպքերում ավելի նպատակահարմար է հեղուկներն ընդունել փոքր չափաբաժններով, սակայն՝ հաճախակի։ Շարունակեք հեղուկներ խմելը նունիսկ այն դեպքում, երբ առկա է սրտխառնոց կամ փսխում։

Եթե հիվանդ է ձեր երեխան, ճիշտ է ժամանակին բժշկին դիմելը՝ քանի դեռ չեն զարգացել ծանր ջրազրկման նշաններ։ Նման դեպքերում բժիշկը սովորաբար գնահատում է երեխայի ջրազրկման աստիճանը և ըստ անհրաժեշտության նշանակում ռեհիդրատացիոն հեղուկներ, որոնց նպատակը օրգանիզմի կորցրած ջրի և անօրգանական նյութերի՝ էլեկտրոլիտների պաշարները վերականգնելն է։

Եթե երեխան չի ցանկանում կամ չի կարողանում ջուր խմել, առաջարկեք ջրով նոսրացված մրգահյութեր (մեկ բաժին հյութ և չորս բաժին ջուր): Նման դեպքերում խուսափեք կաթից և գազավորված ըմպելիքներից (լիմոնադ և այլն), քանի որ դրանցում պարունակվող շաքարը կարող է ավելի վատթարացնել փորլուծությունը։

Ախորժակի առկայության դեպքում կարելի է ընդունել չափավոր քանակի ոչ գրգռիչ սնունդ։

Նորածին և մանկահասակ երեխաները կարող են շարունակել կաթ ստանալ, սակայն դուք նաև պետք է հոգ տանեք ռեհիդրատացիոն հեղուկներ տալու մասին։ Փսխման կամ փորլուծութան դեմ դեղերը կարող են օգտակար լինել չափահասներին, սակայն կարող են վտանգավոր դառնալ երեխաների համար։ Հակաբիոտիկները հազվադեպ են օգտակար լինում և պետք է օգտագործվեն միայն բժշկի նշանակմամբ։

Այն դեպքերում, երբ գաստրոէնտերիտը ստանում է սուր և ծանր ընթացք, անհրաժեշտ է դիմել հիվանդանոց, որտեղ հավանաբար կնշանակվեն երակով տրվող հեղուկներ։