Պատճառներ - Սրտխփոց

Սրտխփոցների պատճառը հաճախ չի հաջողվում հայտնաբերել:

Սրտխփոցների տարածված պատճառներից են՝

• ուժեղ հուզական պատասխաններ, օրինակ՝ սթրես, տագնապ կամ խուճապի նոպա
• դեպրեսիա
• մեծ ֆիզիկական ծանրաբեռնվածություն կամ վարժանքներ
• խթանիչներ, ներառյալ՝ կոֆեին, նիկոտին, կոկաին, ամֆետամիններ և պսևդոէֆեդրին պարունակող մրսածության և հազի դեղամիջոցներ
• ջերմություն
• դաշտանի, հղիության կամ դաշտանադադարի հետ կապված հորմոնային տեղաշարժեր
• վահանաձև գեղձի հորմոնների մակարդակի խիստ բարձրացում կամ նվազում:

Երբեմն սրտխփոցները կարող են լինել որևէ լուրջ խնդրի նշան, օրինակ՝ վահանաձև գեղձի գերակտիվություն (թիրեոտոքսիկոզ) կամ անկանոն սրտի ռիթմ (առիթմիա):

Սրտի ռիթմի փոփոխությունները (առիթմիաներ) կարող են դրսևորվել որպես խիստ արագացած սրտազարկ (տախիկարդիա), անսովոր դանդաղացած սրտազարկ (բրադիկարդիա), սովորական սրտի ռիթմից տարբերվող նորմալ սրտազարկ (սինուսային առիթմիա) կամ այս երեքի համակցումը:

Ռիսկի գործոններ

Սրտխփոցների զարգացման ռիսկը բարձրանում է, եթե՝

• ենթարկվել եք ուժեղ սթրեսի
• ունեք որևէ տագնապային խանգարում կամ կանոնավոր խուճապի նոպաներ
• հղի եք
• օգտագործում եք խթանիչներ պարունակող դեղամիջոցներ, օրինակ՝ մրսածության կամ ասթմայի դեղեր
• ունեք գերակտիվ վահանաձև գեղձ (թիրեոտոքսիկոզ)
• ունեք այլ սրտային խնդիրներ, օրինակ՝ առիթմիա, սրտի արատ, նախկին սրտամկանի ինֆարկտ կամ նախկինում տարած սրտի վիրահատություն: