Սրտխփոցի զգացում

Դուք սովորաբար չեք զգում ձեր սրտի կծկումները, և երբ այս զգացողությունը հանկարծակի ի հայտ է գալիս, դուք անակնկալի եք գալիս կամ սկսում եք անհանգստանալ։

Ի՞նչ է սրտխփոցը

Սրտխփոցն այն է, երբ դուք զգում եք, թե ինչպես է ձեր սիրտը կծկվում։

Սրտխփոցի զգացումը կարող դրսևորվել որպես ձեր սրտի կծկումների սովորականից ավելի հաճախացած կամ ուժգնացած լինելու, երբեմն՝ որպես բաց թողնված կծկման, սրտի կանգի կամ անկանոն աշխատանքի զգացողություն։

Նույնիսկ եթե սրտխփոցը չի ահազանգում սրտի լուրջ վիճակի մասին, այն կարող է ուղեկցվել վախով և անհանգստությամբ։

Կապ հաստատեք ձեր բժշկի հետ, եթե սրտխփոցի զգացումը տևում է մի քանի վայրկյանից ավելի երկար, ուղեկցվում է ինքնազգացողության վատթարացմամբ կամ եթե դուք ունեք սրտանոթային որևէ հիվանդություն։

Անհապաղ զանգեք 1-03 և կանչեք շտապբուժօգնություն, եթե ձեզ մոտ սրտխփոցի զգացողությունը ուղեկցվում է հետևյալ ախտանիշներից մեկնումեկով՝

• օդի պակասի զգացում և կտրուկ շնչարգելություն
• կրծքավանդակի սեղմվածության զգացում կամ ցավեր
• գլխապտույտ
• նախաուշագնացություն կամ ուշագնացություն։

Սրտխփոցի առաջացման ատճառները

Սրտխփոցը կարող է առաջանալ տարբեր պատճառներից։ Սովորաբեր դուք սրփխփոց կարող եք զգալ հետևյալ իրավիճակներում՝

• երբ նյարդայնացած կամ ջղայնացած եք
• երբ հուզված եք
• երբ անհանգստացած եք կամ լցված եք տագնապով կամ խուճապով
• երբ սթրեսային վիճակում եք։

Նման իրավիճակներն ուղեկցվում են արյան մեջ ադրենալինի մակարդակի բարձրացմամբ, որի ազդեցությամբ սիրտն իրականում սկսում է ավելի ուժեղ և արագ կծկվել։

Սրտխփոցի և սրտի անկանոն աշխատանքի զգացողությունները կարող են ի հայտ գալ նաև հետևյալ պատճառներով՝

• մարմնամարզություն կամ վարժանքներ
• ֆիզիկական ծանրաբեռնվածություն
• կոֆեին պարունակող սննդամթերքներ կամ ըմպելիքներ (օրինակ՝ սուրճ, կոլա, թեյ կամ շոկոլադ)
• ալկոհոլ և նիկոտին
• որոշ դեղեր (օրինակ՝ էպինեֆրին (ադրենալին) կամ թեոֆիլին (էուֆիլին))
• որոշ թմրամիջոցներ (օրինակ՝ կոկային և ամֆետամիններ)
• հորմոնային շեղումներ
• սրտի ռիթմի խանգարումներ (առիթմիաներ)
• սրտանոթային հիվանդություններ, օրինակ՝ սրտային անբավարարություն
• արյան գլյուկոզի (շաքարի) մակարդակի նվազեցում (հիպոգլիկեմիա)
• անեմիաներ
• վահանաձև գեղձի գերակտիվություն (թիրեոտոքսիկոզ)
• ջրազրկում
• օրթոստատիկ հիպոտոնիա (երբ պառկած կամ նստած վիճակից ոտքի կանգնելն ուղեկցվում է արյան ճնշման անկմամբ և գլխապտույտով)։

Եթե դուք անհանգստացած եք ձեզ մոտ սրտխփոցի զգացման երևույթից, զրուցեք այս մասին ձեր բժշկի հետ։

Սրտխփոցի զգացումը մեղմելու համար դուք կարող եք դիմել ինքնօգնության որոշ միջոցների։