Ախտորոշում - Հոջկինի լիմֆոմա

Հոջկինի լիմֆոմայի ախտորոշման համար ձեր բժիշկը կարող է օգտվել մի շարք հետազոտություններից և միջամտություններից:

• Ֆիզիկական քննություն (բուժզննում). ձեր բժիշկը կարող է հարցնել ձեր ախտանիշների մասին և անցկացնել բուժզննում: Սա կարող է ներառել ավշային հանգույցների այտուցվածության ստուգում, ներառյալ՝ պարանոցի, թևատակերի և աճուկների, ինչպես նաև որովայնի շոշափմամբ մեծացած փայծաղի կամ լյարդի ստուգում:
• Արյան թեստեր. ձեր արյան նմուշը հետազոտվում է լաբորատորիայում՝ գնահատելու ձեր ընդհանուր առողջությունը և ստուգելու քաղցկեղի նշանները:
• Պատկերային թեստեր. պատկերային թեստերն օգտագործվում են ձեր օրգանիզմի այլ շրջաններում Հոջկինի լիմֆոմայի նշաններ հայտնաբերելու համար: Դրանք կարող են ներառել ռենտգեն, համակարգչային տոմոգրաֆիա (ԿՏ) և պոզիտրոնային-էմիսիոն տոմոգրաֆիա (ՊԷՏ):
• Ավշային հանգույցի հեռացման միջամտություն. ձեր բժիշկը կարող է խորհուրդ տալ ավշային հանգույցի բիոպսիա՝ քաղցկեղի նշաններ ստուգող լաբորատոր հետազոտության համար ավշային հանգույցի հեռացում: Այլ լաբորատոր թեստերը կհետազոտեն լիմֆոմայի բջիջները դրանց մակերեսային մարկերների համար, որոնք կարող են հստակորեն վկայել, թե ինչ տեսակի Հոջկինի լիմֆոմա ունեք և որ բուժումներն են լավագույնը կոնկրետ ձեր քաղցկեղի համար:
• Ոսկրածուծի նմուշի հեռացման միջամտություն. ոսկրածուծի բիոպսիայի և ասպիրացիայի միջամտությունը ներառում է ասեղի ներմուծում զստոսկրի մեջ՝ ոսկրածուծի նմուշ արտածծելու համար: Նմուշը հետազոտվում է՝ ստուգելու Հոջկինի լիմֆոմայի բջիջների առկայությունը:

Կախված ձեր կոնկրետ իրավիճակից, ձեզ նաև կարող են առաջարկվել այլ հետազոտություններ ու միջամտություններ:

Հոջկինի լիմֆոմայի փուլերը

Բժիշկներն օգտագործում են ձեր հետազոտության արդյունքները՝ ձեր Հոջկինի լիմֆոմային փուլ սահմանելու համար: Ձեր փուլն օգտակար է՝ հասկանալու ձեր վիճակի ծանրության աստիճանը և որոշելու, թե որ բուժումն է, որ, ամենայն հավանականությամբ, կօգնի ձեզ:

Հոջկինի լիմֆոմայի փուլը ներկայացնելու համար օգտագործվում են 1-ից 4 թվերը: Ավելի ցածր թիվը ցույց է տալիս քաղցկեղի վաղ փուլը, որն ավելի հավանական է, որ կբուժվի: Ավելի մեծ թիվը նշանակում է, որ քաղցկեղն ավելի տարածված է:

Երբեմն Հոջկինի լիմֆոմայի փուլերը ներառում են նաև A և B տառերը: A տառը նշանակում է, որ դուք չունեք քաղցկեղի անհանգստացնող ախտանիշներ: B տառը նշանակում է, որ դուք ունեք որոշ գանգատներ և ախտանիշներ, ինչպիսիք են մշտական ջերմությունը, անբացատրելի քաշի կորուստը կամ գիշերային քրտնարտադրությունը: