Պատճառներ - Կլեպտոմանիա

Կլեպտոմանիայի պատճառներն անհայտ են:

Մի քանի տեսություններ ենթադրում են, որ կլեպտոմանիայի հիմքում կարող են ընկած լինել ուղեղային փոփոխությունները, և որ իրերի գողության սովորելու բնույթը ժամանակի ընթացքում վատթարացնում է խնդիրը: Հնարավոր պատճառներն ավելի լավ հասկանալու համար անհրաժեշտ են ավելի շատ հետազոտություններ, սակայն կլեպտոմանիան կարող է կապված լինել հետևյալի հետ:

• Գլխուղեղի բնական քիմիական նյութի հետ կապված խնդիրներ, որը կոչվում է սերոտոնին. սերոտոնինը, որը հանդիսանում է նեյրոմեդիատոր (նյարդահաղորդիչ), օգնում է տրամադրության և հույզերի կարգավորմանը: Սերոտոնինի ցածր մակարդակը տարածված է այն մարդկանց մոտ, ովքեր հակված են դրսևորելու անկառավարելի (իմպուլսիվ) վարքագծեր:
• Կախվածության խանգարումներ. գողությունը կարող է առաջացնել դոպամինի՝ գլխուղեղի մեկ այլ նեյրոմեդիատորի ազատում: Դոպամինն առաջացնում է հաճելի զգացողություններ, և որոշ մարդիկ կրկին ու կրկին փորձում են զգալ այս հաճելի վիճակը (կոչվում է պարգևատրում):
• Գլխուղեղի օփիոիդային համակարգ. հակումները կարգավորվում են գլխուղեղի օփիոիդային համակարգով: Այս համակարգում անհավասարակշռությունը կարող է դժվարացնել հակումներին դիմադրելը:
• Ձեռք բերված սովորություն. հակումները շատ տհաճ են։ Գողությամբ դրանց արձագանքելը հանգեցնում է հոգեկան տհաճ վիճակի ժամանակավոր մեղմացման և գլխում սևեռված հակումներից ազատվելուն: Սա ստեղծում է ուժեղ սովորություն, որից ազատվելը դառնում է դժվար:

Ռիսկի գործոններ

Կլեպտոմանիան տարածված խանգարում չէ: Սակայն կլեպտոմանիայի որոշ դեպքեր կարող են երբեք չբացահայտվել: Որոշ մարդիկ երբեք բուժման չեն դիմում: Այլ մարդկանց բանտ են նստեցնում կրկնակի գողություններից հետո։

Կլեպտոմանիան հաճախ սկսվում է դեռահասության շրջանում կամ երիտասարդ չափահաս տարիքում, թեև կարող է զարգանալ ավելի ուշ: Կլեպտոմանիա ունեցող մարդկանց շուրջ երկու երրորդը կանայք են:

Կլեպտոմանիայի զարգացման ռիսկի գործոնները կարող են ներառել հետևյալը:

• Ընտանեկան պատմություն (անամնեզ). կլեպտոմանիայով կամ կախվածության խանգարումներով ծնողի կամ եղբոր նման արյունակից հարազատ ունենալը կարող է մեծացնել կլեպտոմանիայի զարգացման ռիսկը:
• Մեկ այլ հոգեկան հիվանդություն ունենալը․ կլեպտոմանիայով տառապող մարդիկ հաճախ ունենում են մեկ այլ հոգեկան խանգարում, ինչպիսիք են տագնապային խանգարումները, դեպրեսիան կամ հոգեներգործուն նյութերի օգտագործման խանգարումը: