Ախտանիշներ - Կլայնֆելտերի սինդրոմ

Կլայնֆելտերի համախտանիշի գանգատներն ու ախտանիշները լայնորեն տարբերվում են այս խանգարումն ունեցող արական սեռի ներկայացուցիչների մոտ:

Կլայնֆելտերի համախտանիշով բազմաթիվ տղաների մոտ դրսևորվում են միայն սակավաթիվ կամ թեթև ախտանիշներ: Վիճակը կարող է չբացահայտվել մինչև հասուն տարիքը, կամ այն կարող է երբեք չբացահայտվել: Մյուսների մոտ այս խանգարումը նկատելի ազդեցություն է թողնում աճի կամ արտաքին տեսքի վրա:

Կլայնֆելտերի համախտանիշի գանգատներն ու ախտանիշները նաև տարբերվում են՝ կախված տարիքից:

Նորածիններ

Գանգատները և ախտանիշները կարող են ներառել՝

• թույլ մկաններ
• դանդաղած շարժողական զարգացում, օրինակ՝ նստելու կամ քայլելու ուշացում
• խոսքի հետաձգում
• բնածին խնդիրներ, ինչպիսին է փոշտի (ամորձապարկի) մեջ չիջած ամորձիներ:

Մանկահասակ և անչափահաս տղաներ

Գանգատները և ախտանիշները կարող են ներառել՝

• միջինից ավելի բարձր հասակ
• ավելի երկար ոտքեր, ավելի կարճ իրան և ավելի լայն ազդրեր՝ համեմատած այլ տղաների հետ
• բացակայող, ուշացած կամ թերի սեռահասունացում
• սեռահասունացումից հետո, ավելի քիչ և թույլ մկանային զանգված և դեմքի և մարմնի մազեր՝ համեմատած այլ դեռահասների հետ
• փոքր, պինդ ամորձիներ (միկրոօրխիդիզմ)
• փոքր առնանդամ
• մեծացած կրծքային հյուսվածք (գինեկոմաստիա)
• թույլ ոսկորներ (օստեոպորոզ)
• ցածր էներգիա
• ամաչկոտ կամ զգայուն լինելու հակում
• մտքերը և զգացմունքներն արտահայտելու կամ շփումների հետ կապված դժվարություն
• կարդալու, գրելու, լեզվային (դիսպրաքսիա) կամ մեթեմատիկայի հետ կապված խնդիրներ:

Տղամարդիկ

Գանգատները և ախտանիշները կարող են ներառել՝

• սպերմատոզոիդների ցածր քանակ (օլիգոսպերմիա) կամ բացակայություն (ազոոսպերմիա)
• փոքր ամորձիներ (միկրոօրխիդիզմ) և առնանդամ
• ցածր սեռական ցանկություն
• միջինից ավելի բարձր հասակ
• թույլ ոսկորներ (օստեոպորոզ)
• ավելի քիչ դեմքի և մարմնի մազեր
• այլ տղամարդկանց հետ համեմատ ավելի քիչ և թույլ մկանային զանգված
• մեծացած կրծքագեղձային հյուսվածք (գինեկոմաստիա)
• արտահայտված որովայնային ճարպ:

Ե՞րբ դիմել բժշկին

Դիմեք բժշկին, եթե դուք կամ ձեր տղան ունեք հետևյալը:

• Մանկության կամ պատանեկության շրջանում դանդաղ զարգացում․ աճի և զարգացման ուշացումները կարող են լինել բուժում պահանջող մի շարք առողջական վիճակների, այդ թվում՝ Կլայնֆելտերի համախտանիշի առաջին նշանը: Թեև նորմայում կարող են դիտարկվել ֆիզիկական և մտավոր զարգացման որոշ անհատական տարբերություններ, լավագույն տարբերակն այն է, որ խորհրդակցեք ձեր բժշկի հետ, եթե որևէ մտահոգություն ունեք:
• Արական անպտղություն․ Կլայնֆելտերի համախտանիշով բազմաթիվ տղամարդկանց անպտղությունը չի ախտորոշվում, քանի դեռ նրանք չեն պարզում, որ չեն կարողանում հայրանալ: