Ամոթաշրթերի հետ կապված խնդիրներ

5 րոպե

Եթե ունեք արտաքին սեռական օրգանների՝ ամոթույքի հետ կապված որևէ խնդիր, բազմաթիվ կանանց նման, կարող եք երկչոտել և այդ մասին ձեր բժշկին չտեղեկացնել:

Բազաթիվ կանանց համար սա փակ թեմա է, որի վերաբերյալ պետք է իմանան միայն իրենք: Այնուամենայնիվ, կան վիճակներ, երբ բժշկին այցելելն ամենախելամիտ որոշումն է: Եթե նման հարցով ամաչում եք բժշկին դիմել, խնդրեք, որ ձեզ զննի կին բժիշկ:

Ի՞նչ են ամոթաշրթերը

Ամոթաշրթերը կամ սեռական շրթերը ձեր արտաքին սեռական օրգանների՝ ամոթույքի արտաքինից երևացող ծալքեր են: Դրանք մաշկային ծալքեր են, որոնք պաշտպանում են ձեր ծլիկը (կլիտոր), հեշտոցի նախադուռը և միզուկի բացվածքը: Սեռական ակտիվության ժամանակ ամոթաշրթերը արյունալեցվում և քիչ այտուցվում են:

Դուք ունեք ամոթաշրթերի երկու զույգ՝ արտաքին կամ մեծ և ներքին կամ փոքր ամոթաշրթեր:

• Մեծ ամոթաշրթերը գոյանում են մաշկային 2 ծալքերով, որոնք երկայնաձիգ ձգվում են ցայլքից մինչև շեք և սահմանափակում սեռական ճեղքը:
• Փոքր ամոթաշրթերը ընկած են մեծ շուրթերից ներս և ծածկում են հեշտոցի նախադուռը:

Ամոթաշրթերի չափսը, ձևը և գույնը տարբեր կանանց մոտ տարբեր է:

Իմացե՛ք ավելին կանանց արտաքին սեռական օրգանների մասին մասին:

Ամոթաշրթերն ախտահարող առողջական խնդիրներ

Ամոթաշրթերը ձեր մարմնի խիստ զգայուն շրջանն են, որտեղ կարող են զարգանալ ուռուցքային գոյացություններ, ցաներ, կիստաներ և մազի ներաճ:

Ամոթաշրթերի հետ կապված ամենատարածված խնդիրները մաշկային բնույթի են, օրինակ՝ ատոպիկ մաշկաբորբ (էկզեմա) և փսորիազ: Մյուս ախտաբանական վիճակները ներկայացվում են ստորև:

Ամոթաշրթերի գերաճ (հիպերտրոֆիա)

Ամոթաշրթերի գերաճն այն է, երբ շուրթերից մեկնումեկը կամ երկուսն էլ սովորականից ավելի մեծ են: Օրինակ, փոքր շուրթերը կարող են մեծանալ և դուրս գալ մեծ շուրթերի տակից:

Ամոթաշրթերի գերաճն անվնաս է: Այն չի ազդում ձեր սեռական կյանքի վրա և չի նշանակում, որ դուք ունեք առողջական խնդիր: Սակայն չափազանց մեծ ամոթաշուրթը կարող է առաջացնել անհարմարավետություն կամ հանգեցնել մաքուր պահելու հետ կապված խնդիրների: Նման դեպքերում բժիշկը կարող է խորհուրդ տալ, որ հագնեք ավելի ազատ ներքնազգեստ կամ օգտագործեք գրգռվածությունը նվազեցնող նրբաքսուքներ (կրեմներ):

Նման դեպքում, եթե ամոթաշրթերի գերաճը խնդիրներ է առաջացնում, ձեր բժիշկը կարող է առաջարկվել լաբիապլաստիկա, որի նպատակն այս օրգանը ձևափոխել-փոքրացնելն է:

Միաձուլված ամոթաշրթեր

Միաձուլված ամոթաշրթերը տերմին է, որն օգտագործում են այն դեպքերում, երբ մեծ ամոթաշրթերը միմյանց միաձուլված են: Սա շատ տարածված է և նորմայում զարգանում է 1-2 տարեկան աղջիկ երեխաների մոտ: Երբ աղջիկների սեռահասունացումն ավարտվում է, մեծ շրթերը գրեթե միշտ արդեն առանձնացած են միմյանցից:

Միաձուլված ամոթաշրթերը սովորաբար որևէ բժշկական միջամտության կարիք չեն առաջացնում: Ծայրահեղ դեպքերում, երբ դա առաջացնում է միզելու հետ կապված դժվարություն, կարող է առաջարկվել վիրահատություն, սակայն ամոթաշրթերի նորից միմյանց միաձուլվելու ռիսկը մնում է բարձր:

Ամոթաշրթերի այտուց

Եթե ձեր ամոթաշուրթն այտուցված է, սա կարող է լինել սնկիկային վարակի (հեշտոցային կանդիդոզ) կամ հեշտոցի բակտերիաների միջև հավասարակշռության խախտման (բակտերիալ վագինոզ), ալերգիայի կամ վարակի նշան: Ամոթաշրթերը նաև կարող են այտուցվել սեռական հարաբերությունից հետո:

Եթե այտուցը մեծանում է և ուղեկցվում ցավով, քորով, սուր հոտով արտասովոր արտադրությամբ կամ արտահայտված ուռածությամբ, անպայման այցելեք ձեր բժշկին: Ձեզ կառաջարկվի բուժում, որը կապված է այտուցի պատճառից:

Բարթոլինյան կիստա

Բարտոլինյան գեղձերը գտնվում են հեշտոցի երկու կողմերում: Երբ դրանք խցանվում են, առաջանում է կիստա՝ ցավոտ կամ լարված գոյացություն: Այս կիստան կարող է վարակվել՝ հանգեցնելով թարախի կուտակման և թարախակույտի առաջացման:

Իմացե՛ք ավելին բարթոլինյան գեղձի կիստայի և թարախակույտի մասին:

Թարախակույտ (աբսցես)

Թարախակույտը վարակ է, որը հարուցվում է մաշկի տակ գտնվող բակտերիայով: Այն կարող է առաջանալ ձեր ամոթաշուրթի վրա կամ բարթոլինյան գեղձում: Թարախակույտ նաև կարող է առաջանալ ներաճած մազի, պիրսինգի, մաշկի գրգռման և ներմաշկային գեղձերի վարակի, ինչպես նաև սեռական ճանապարհով փոխանցվող վարակների պատճառով:

Փսորիազ

Բազմաթիվ կանայք և աղջիկներ, ովքեր մարմնի այլ շրջաններում ունեն փսորիազ, կարող են նույն մաշկային ախտահարումն ունենալ նաև ամոթաշրթերի վրա: Փսորիազը բնորոշվում է կարմիր և քոր հարուցող ցանով, սովորաբար մազոտ մաշկի վրա, որը կարող է տարածվել մինչև հետանցք: Փսորիազի ախտանիշները կարող են մեղմանալ մի շարք նրբաքսուքներով կամ քսուքներով, սակայն փսորիազային ցանն ունի կրկնվելու հակում:

Իմացե՛ք ավելին փսորիազի մասին:

Սեռական գորտնուկներ և հերպես

Սեռական գորտնուկները կամ կանդիլոմաները սրածայր, տափակ կամ խմբերով հայտնվող գորտնուկանման գոյացություններ են, որոնք առաջանում են մարդու պապիլոմավիրուսի (ՄՊՎ) պատճառով և կարող են ի հայտ գալ ձեր ամոթաշրթերի և հարակից շրջաններում: Դրանք հաճախ ինքնուրույն վերանում են, սակայն, եթե ձեզ մոտ ցավոտ են և առաջացնում են սաստիկ քոր, ձեր բժիշկը կարող է նշանակել բուժում՝ հատուկ գունանյութեր, սառեցում կամ լազերային այրում: Բուժումը վերացնում է գորտնուկը, բայց ոչ՝ վիրուսը:

Իմացե՛ք ավելին սեռական գորտնուկների (կանդիլոմաների) մասին:

Սեռական (գենիտալ) հերպեսը սեռական ճանապարհով փոխանցվող վարակ է, որը հարուցվում է հասարակ հերպեսի վիրուսով: Այն դրսևորվում է ամոթաշրթերի վրա բշտիկային ցանավորման բռնկմամբ, որը կարող է ձեր կյանքի ընթացքում ժամանակ առ ժամանակ կրկնվել: Եթե կարծում եք, որ ունեք սեռական հերպես, ապա կարևոր է, որ առանց ուշացնելու այցելեք ձեր բժշկին և վաղ սկսեք ձեր բուժումը: Համոզվեք, որ սեռական հարաբերության ժամանակ օգտագործում եք պահպանակ և վարակը չեք փոխանցում ձեր զուգընկերոջը:

Իմացե՛ք ավելին սեռական հերպեսի մասին:

Սպիական կամ տապակ որքին

Ամոթաշրթերը կարող են ախտահարվել նաև սպիական կամ տափակ որքինով, որը բերում է ուժեղ քորի, այրոցի զգացման և ցավոտ սեռական հարաբերության: Կարծիք կա, որ մաշկի նման ախտահարման հիմքում ընկած են աուտոիմուն խանգարումները: Ավելի հաճախ որքինի այս տեսակը զարգանում է դաշտանադադարից հետո:

Չբուժվելու դեպքում այս վիճակը կարող է առաջացնել սպիացում: Բժիշկը ձեզ հետ կզրուցի հնարավոր բուժումների, այ թվում՝ ստերոիդների և ցավազրկող դեղերի վերաբերյալ:

Ամոթաշրթերի խնամքը

Կարևոր է, որ դուք ժամանակ առ ժամանակ զննեք ձեր արտաքին սեռական օրգանները և համոզվեք, որ անհանգստանալու տեղիք առաջացնող որևէ փոփոխություն չկա: Նույն նպատակի համար կարող եք այցելել ձեր բժշկին:

Ընդունեք ցնցուղ, այլ ոչ թե լոգանք, օգտագործեք հիպոալերգիկ զուգարանի թուղթ և լվացքի նյութեր, և խուսափեք պինդ կամ ուժեղ օճառից: Չորացրեք այս շրջանը զգուշորեն, այլ ոչ թե տրորելով, և, ըստ անհրաժեշտության, սեռական հարաբերության ժամանակ օգտագործեք լուբրիկանտ (քսուքանյութ):

Կրեք ազատ ծակոտկեն և բնական մանրաթելից գործված ներքնազգեստ: Եթե հարմար է, օգտագործեք տամպոն, և ոչ թե միջադիր:

Եթե ունեք ամոթաշրթերի հետ կապված որևէ խնդիր, մաքուր սրբիչով փաթաթված սառցեպարկը կարող է մեղմացնել անհարմարավետության զգացումը:

Ե՞րբ այցելել բժշկին

Այցելեք ձեր բժշկին, եթե ձեր գանգատները չեն մեղմանում՝ ցավ, այրոցի զգացում կամ քոր: