Պատճառներ - Միտրալ հիվանդություն

Միտրալ փականի հիվանդության պատճառները հասկանալու համար կարող է օգտակար լինել իմանալ, թե ինչպես է աշխատում սիրտը:

Միտրալ կամ երկփեղկ փականը սրտի չորս փականներից մեկն է, որոնք պահպանում են արյան հոսքը ճիշտ ուղղությամբ: Յուրաքանչյուր փական ունի փեղկեր կամ թերթիկներ, որոնք կոչվում են կափույրներ: Սրտի յուրաքանչյուր կծկման ընթացքում դրանք միայն մեկ անգամ բացվում և փակվում են: Եթե կափույրները, և դրա պատճառով՝ փականը ճիշտ չի բացվում կամ փակվում, արյան հոսքը սրտի խոռոչներից դեպի օրգանիզմի այլ շրջաններ կարող է կրճատվել:

• Միտրալ փականի ռեգուրգիտացիայի (անբավարարության) դեպքում կափույրները պատշաճ՝ կիպ չեն փակվում: Արյունը ետ է հոսում, երբ փականը փակ է, ինչը դժվարացնում է սրտի ճիշտ աշխատանքը:
• Միտրալ փականի ստենոզի դեպքում փականի բացվածքը նեղանում է։ Այս վիճակում սիրտը պետք է ավելի ուժեղ կծկվի, որ կարողանա արյունն արտամղել ավելի փոքր փականային բացվածքով: Եթե այս բացվածքը բավականին փոքրանում է, արյան հոսքը ձախ սրտի խոռոչների միջև կարող է զգալիորեն նվազել:

Միտրալ փականի հիվանդությունն ունի բազմաթիվ պատճառներ: Միտրալ փականի հիվանդության որոշ ձևեր կարող են լինել ի ծնե: Սրտային խնդիրը, որով դուք ծնվել եք, կոչվում է բնածին սրտի արատ:

Միտրալ փականի հիվանդությունը նաև կարող է զարգանալ կյանքի ավելի ուշ շրջաններում: Սա նշանակում է, որ այն ձեռք բերովի է: Օրինակ, միտրալ փականի ստենոզը հաճախ առաջանում է ռևմատիզմի պատճառով: Վերջինս ստրեպտոկոկային վարակի բարդություն է, որը կարող է ազդել սրտի վրա: Երբ դա տեղի է ունենում, կոչվում է միտրալ փականի ռևմատիկ հիվանդություն:

Ձեռք բերովի միտրալ փականի հիվանդության այլ պատճառներից են՝

• այլ սրտային խնդիրներ
• վարակ
• տարիքի հետ կապված փոփոխություններ
• աուտոիմուն հիվանդություն, ինչպիսին է համակարգային կարմիր գայլախտը (լուպուս):

Ռիսկի գործոններ

Մի քանի գործոններ կարող են բարձրացնել միտրալ փականի հիվանդության զարգացման ռիսկը: Դրանցից են՝

• ավելի մեծ տարիք
• որոշակի վարակներ, որոնք ախտահարում են սիրտը
• սրտամկանի ինֆարկտ և սրտային հիվանդության որոշ տեսակներ
• որոշ դեղամիջոցների օգտագործում
• ի ծնե առկա սրտային խնդիրներ, որոնք կոչվում են բնածին սրտի արատներ
• կրծքավանդակին ուղղված ճառագայթում: