Ախտանիշներ - Միոդիստրոֆիա

Մկանային դիստրոֆիայի հիմնական նշանը մկանների առաջընթաց թուլությունն է։

Առանձնահատուկ գանգատներն ու ախտանշանները սկսվում են տարբեր տարիքում և տարբեր մկանային խմբերում՝ կախված մկանային դիստրոֆիայի տեսակից:

Դյուշենի տիպի մկանային դիստրոֆիա

Սա ամենատարածված ձևն է: Չնայած աղջիկները կարող են լինել ախտածին գենի կրողներ և թեթև ախտահարված, այն շատ ավելի տարածված է տղաների մոտ:

Գանգատներն ու ախտանիշները, որոնք սովորաբար ի հայտ են գալիս վաղ մանկության տարիներին, կարող են ներառել՝

• ընկնելու հաճախակի դրվագներ
• պառկած կամ նստած դիրքից բարձրանալու դժվարություն
• վազելու և ցատկելու հետ կապված խնդիրներ
• փոքր քայլքով քայլվածք
• քայլվածք մատների վրա
• մեծ ետսրունքային մկաններ
• մկանային ցավ և կարկամություն
• ուսուցման խանգարումներ
• հետաձգված աճ:

Բեքերի մկանային դիստրոֆիա

Գանգատներն ու ախտանշանները նման են Դյուշենի մկանային դիստրոֆիային, սակայն հակված են ավելի թեթև լինել և ավելի դանդաղ զարգանալ: Ախտանիշները սովորաբար սկսվում են դեռահասների շրջանում, թեև նաև կարող են առաջանալ մինչև 20-30 տարեկանի կեսերում կամ ավելի ուշ:

Մկանային դիստրոֆիայի այլ տեսակներ

Մկանային դիստրոֆիայի որոշ տեսակներ բնորոշվում են առանձնահատուկ նշաններով կամ նրանով, թե մարմնի որ շրջանից են սկսվում ախտանիշները: Օրինակները ներառում են հետևյալը։

• Միոտոնիկ. սա բնութագրվում է կծկումներից հետո մկանները թուլացնելու անկարողությամբ: Դեմքի և պարանոցի մկանները սովորաբար առաջինն են տուժում: Այս ձևն ունեցող մարդիկ սովորաբար ունեն երկար, նիհար դեմք, կախված կոպեր և բարակ (կարապի) պարանոց:
• Դիմա-թիակա-ուսային (ֆասցիոսկապուլոհումերալ). մկանային թուլությունը սովորաբար սկսվում է դեմքից, ազդրից և ուսերից: Թիակները կարող են դուրս ցցվել թևերի պես, երբ ձեռքերը վեր են բարձրացվում: Հիվանդությունը սովորաբար ի հայտ է գալիս դեռահասության տարիներին, սակայն նաև կարող է սկսվել մանկական տարիքում կամ ավելի ուշ, ինչպես 50 տարեկան հասակում:
• Բնածին. այս տեսակը հանդիպում է տղաների և աղջիկների մոտ և դրսևորվում է ծննդյան ժամանակ կամ մինչև 2 տարեկանը: Որոշ ձևեր դանդաղ են զարգանում և առաջացնում են միայն թեթև հաշմանդամություն, իսկ մյուսները զարգանում են արագորեն՝ առաջացնելով լուրջ խանգարումներ:
• Վերջույթագոտկային. սովորաբար առաջին հերթին ախտահարվում են ազդրի և ուսագոտու մկանները: Այս տեսակի մկանային դիստրոֆիա ունեցող մարդիկ կարող են դժվարություններ ունենալ ոտնաթաթի առջևի հատվածը բարձրացնելու համար և, հետևաբար, կարող են հաճախակի սայթաքել: Սովորաբար սկսվում է մանկության կամ պատանեկության տարիներին:

Ե՞րբ դիմել բժշկին

Դիմեք բժշկին, եթե ձեր կամ ձեր երեխայի մոտ նկատում եք մկանային թուլության նշաններ, ինչպիսիք են ոչ սահուն շարժումների հաճախացումը և ընկնելը: