Պատճառներ - Նարկոլեպսիա

Նարկոլեպսիայի ստույգ պատճառը հայտնի չէ։

1-ին տիպի նարկոլեպսիայով մարդիկ ունեն հիպոկրետինի ցածր մակարդակ, որը նաև կոչվում է օրեքսին: Հիպոկրետինը գլխուղեղի քիմիական նյութ է, որն օգնում է արթուն մնալու վերահսկմանը և REM քնի մեջ մտնելուն:

Հիպոկրետինի մակարդակը ցածր է այն մարդկանց մոտ, ովքեր ունեն կատապլեքսիա: Հայտնի չէ, թե կոնկրետ ինչն է հանգեցնում գլխուղեղի հիպոկրետին արտադրող բջիջների կորստի: Սակայն փորձագետները կասկածում են, որ դա պայմանավորված է աուտոիմուն ռեակցիայով: Աուտոիմուն ռեակցիան այն է, երբ մարմնի իմունային համակարգը վնասում է սեփական բջիջները:

Նաև հավանական է, որ նարկոլեպսիայի մեջ դեր է խաղում գենետիկան: Սակայն ծնողի կողմից այս խանգարումը երեխային փոխանցելու ռիսկը շատ ցածր է` ընդամենը մոտ 1%-ից 2%:

Հետազոտությունները նաև ցույց են տալիս, որ որոշ դեպքերում նարկոլեպսիան կարող է կապված լինել խոզի գրիպի (H1N1 գրիպ) վիրուսի ազդեցության հետ: Այն կարող է նաև կապված լինել H1N1 պատվաստանյութի որոշակի ձևի հետ: Պատվաստանյութը կիրառվել է Եվրոպայում։

Նորմալ քուն և նարկոլեպսիա

Քնելու սովորական գործընթացը սկսվում է մի փուլով, որը կոչվում է աչքերի ոչ արագ շարժման (NREM) քուն: Այս փուլում գլխուղեղի ալիքները դանդաղում են: NREM քնից մոտ մեկ ժամ հետո գլխուղեղի ակտիվությունը փոխվում է և սկսվում է REM քունը: Երազատեսության մեծ մասը տեղի է ունենում REM քնի ժամանակ:

Նարկոլեպսիայի դեպքում դուք կարող եք հանկարծակի մտնել REM քուն՝ շրջանցելով NREM քունը: Դա կարող է տեղի ունենալ ինչպես գիշերը, այնպես էլ ցերեկը: Կատապլեքսիան, քնի կաթվածը և ցնորքները (հալյուցինացիաները) նման են REM քնի ժամանակ տեղի ունեցող փոփոխություններին: Սակայն նարկոլեպսիայի դեպքում դրանք տեղի են ունենում, երբ դուք արթուն եք կամ քնկոտ:

Ռիսկի գործոններ

Նարկոլեպսիայի համար կան միայն մի քանի հայտնի ռիսկային գործոններ:

• Տարիք. նարկոլեպսիան սովորաբար սկսվում է 10-ից 30 տարեկանում:
• Ընտանեկան պատմություն (անամնեզ). նարկոլեպսիայի ձեր ռիսկը 20-ից 40 անգամ ավելի բարձր է, եթե ունեք ընտանիքի անդամ, որն ունի նույն խանգարումը: