Ախտանիշներ - Նեյտրոպենիա

Եթե ունեք նեյտրոպենիա, կարող եք որևէ գանգատ չնշել, և ձեր վիճակը հայտնաբերվի սովորական արյան ընդհանուր քննությամբ (CBC):

Այնուամենայնիվ, որոշ մարդկանց մոտ կարող են զարգանալ տարբեր տեղակայման բակտերիալ վարակներ՝ մաշկ, բերանի շրջան, հարքթային խոռոչներ, ներքին օրգաններ (օրինակ՝ թոքեր): Կրկնվող վարակները նույնպես կարող են լինել նեյտրոպենիայի նշաններից մեկը:

Ախտանիշները կարող են ներառել՝

• ջերմություն (տենդային նեյտրոպենիա)
• հոգնածություն
• ցավոտ կոկորդ (ըմպանաբորբ)
• այտուցված ավշային հանգույցներ
• բերանում կամ հետանցքի շուրջը խոցերի առաջացում
• վարակված շրջանի ցավ, այտուցվածություն և ցան
• փորլուծություն
• միզելիս այրոցի զգացողություն կամ այլ միզային ախտանիշներ (հրատապ միզելու ցանկություն, հաճախամիզություն և այլն):

Նեյտրոպենիան կարող է լինել՝

• սուր, երբ ի հայտ է գալիս հանկարծակի և, սովորաբար, արագորեն էլ անհետանում է
• քրոնիկ, երբ շարունակվում է բավականին երկար ժամանակ
• ցիկլային, երբ պարբերաբար հայտնվում և անհետանում է:

Տենդային նեյտրոպենիան սովորաբար հանդես է գալիս որպես քաղցկեղի բուժման բարդություն և դրսևորվում է ջերմության 38° C և ավելի բարձրացմամբ և վարակներին բնորոշ նշաններով, ինչպիսիք են դողը, սարսուռը և ինքնազգացողության վատացումը։ Տենդային նեյտրոպենիան համարվում է կյանքին սպառնացող վիճակ և պահանջում է անհետաձգելի բժշկական օգնություն:

Ե՞րբ դիմել բժշկին

Եթե ձեր նեյտրոպենիան ուղեկցվում է ջերմության բարձրացմամբ, պետք է անմիջապես կապ հաստատել բժշկի հետ կամ այցելել մոտակա հիվանդանոց: