Գրադարան

Օստեոմիելիտ. պատճառներ

Օստեոմիելիտ. պատճառներ

Time Read 3 րոպե

Օստեոմիելիտի դեպքերի մեծ մասը հարուցվում է ստաֆիլոկոկային բակտերիայով, որի տարբեր տեսակները լայնորեն առկա են նույնիսկ առողջ անձանց մաշկի վրա և քթի խոռոչում:

Միկրոբները կարող են ոսկր թափանցել և օստեոմիելիտ առաջացնել տարբեր ուղիներով:

  • Արյան հոսք (հեմատոգեն). մարմնի այլ շրջանների միկրոբները, օրինակ՝ թոքաբորբի ժամանակ` թոքերից կամ միզուղիների վարակի ժամանակ՝ միզապարկից կարող են արյան հունով տեղափոխվել և հայտնվել ոսկրի թուլացած հատվածում:
  • Վնասվածքներ. ծակած կամ հրազենային թափանցող վերքերով միկրոբները կարող են տարածվել դեպի օրգանիզմի խոր հյուսվածքներ: Երբ այսպիսի վնասվածքը վարակվում է, միկրոբները տարածվում են մոտակա ոսկր: Ոսկրի վարակում կարող է զարգանալ նաև բաց կոտրվածքների ժամանակ, երբ կոտրված ոսկրի ծայրը հայտնվում է վերքի մեջ կամ մաշկից դուրս: Նման իրավիճակներում կարող է զարգանալ թարախային օստեոմիելիտ:
  • Վիրահատություն. հոդերի փոխարինման կամ կոտրվածքների վերականգնման վիրահատությունների ժամանակ ոսկրը կարող է ուղղակիորեն վարակվել միկրոբներով:

Օստեոմիելիտ նաև կարող է զարգանալ առանձնահատուկ վարակներից (օրինակ՝ տուբերկուլոզային օստեոմիելիտ):

Երբ օստեոմիելիտը զարգանում է որպես վարակի, վնասվածքի կամ առողջական այլ խնդրի հետևանք, կոչվում է սուր։ Քրոնիկ օստեոմիելիտ ախտորոշվում է, եթե սուր օստեոմիելիտը լիարժեքորեն չի վերանում և ժամանակի ընթացքում կրկնվում է։ Չբուժված քրոնիկ օստեոմիելիտը ձգձգվում է տարիներ շարունակ։

Ռիսկի գործոններ

Նորմայում ոսկրերը վարակի նկատմամբ կայուն են, սակայն այս պաշտպանունակությունը տարիքի հետ թուլանում է: Կան նաև վարակի նկատմամբ ոսկրերի «խոցելիությունը» բարձրացնող այլ գործոններ:

Վերջերս տարած վնասվածք կամ օրթոպեդիկ վիրահատություն

Ծանր կոտրվածքները կամ խոր ծակած վերքերը բակտերիաների համար ուղիղ ճանապարհ են բացում դեպի ոսկր կամ մոտակա հյուսվածքներ: Խոր ծակած վերքը, օրինակ՝ կենդանու խայթոցը կամ մեխով ոտքը ծակելը նույնպես կարող են դառնալ ոսկրի վարակման պատճառ:

Կոտրվածքների վերականգնողական կամ ախտահարված հոդի փոխարինման վիրահատությունները նույնպես կարող են պատահականորեն ոսկրի վարակման պատճառ դառնալ: Ներդրված օրթոպեդիկ սարքերն իրենց հերթին համարվում են վարակի ռիսկի գործոն:

Արյան շրջանառության խանգարումներ

Երբ արյունատար անոթները վնասված կամ խցանված են, օրգանիզմում վարակի դեմ պայքարող բջիջների տեղաբաշխումը խախտվում է: Նման դեպքերում փոքր կտրված վերքը կարող է վերաճել խոր չփակվող խոցի, որն իր հերթին կարող է առաջացնել խոր հյուսվածքների ախտահարում և ոսկրի վարակում:

Արյան շրջանառությունը խանգարող հիվանդություններից են՝

  • վատ վերահսկվող դիաբետ
  • ծայրամասային զարկերակների հիվանդություն, որը հաճախ կապված է ծխախոտի օգտագործման հետ
  • մանգաղաբջջային հիվանդություն:

Ներերակային ինֆուզիա կամ կաթետեր պահանջող խնդիրներ

Կան բազմաթիվ հիվանդություններ, որոնք պահանջում են արտաքին միջավայրի և ներքին օրգանների միջև արհեստական հաղորդակցման ստեղծում հատուկ խողովակների միջոցով: Նման խողովակներն, այնուամենայնիվ, կարող են դառնալ վարակի աղբյուր կամ նպաստեն, որ բակտերիաները թափանցեն խոր հյուսվածքներ և հասնեն ոսկրեր:

Բուժական խողովակների օգտագործման օրինակներից են՝

  • դիալիզի սարքի խողովակներ
  • միզային կաթետերներ
  • երկարաժամկետ ներերակային խողովակներ, այդ թվում՝ կենտրոնական երակների կաթետերներ:

Իմունային համակարգը թուլացնող հիվանդություններ և վիճակներ

Եթե իմունային համակարգի գործունեությունը որևէ հիվանդությամբ կամ դեղամիջոցներով խանգարվում է, օստեոմիելիտի ռիսկը բարձրանում է: Իմունային համակարգը ճնշող գործոնների օրինակներից են՝

  • քաղցկեղի բուժում
  • վատ վերահսկվող դիաբետ
  • կորտիկոստերոիդների կամ ուռուցքի մեռուկացման գործոնի արգելակիչների ընդունում:

Ապօրինի թմրամիջոցներ

Ապօրինի թմրամիջոցներ ներարկվող անձանց շրջանում բարձրանում է օստեոմիելիտի ռիսկը, քանի որ նրանք կարող են օգտագործել ոչ ստերիլ ասեղներ կամ ներարկման պարագաներ, ինչպես նաև պատշաճ կերպով չախտազերծեն ներարկման շրջանը:

Հոդվածը տեղադրվել է՝ 31-05-2021 վերանայվել է՝ 03-04-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով