Գրադարան
Օտոսկլերոզ
2 րոպե
Օտոսկլերոզը ժառանգական հիվանդություն է, որն ախտահարում է միջին ականջը և բնորոշվում է ականջներում աղմուկով և լսողության հարաճուն թուլացմամբ:
Օտոսկլերոզը չափահասների մոտ խլության ամենահաճախ հանդիպող պատճառն է, որը, սակայն սկսվում է դեռևս դեռահաս կամ վաղ երիտասարդ տարիքում: Այն կարող է բուժվել լսողական սարքերով կամ վիրահատությամբ:
Ի՞նչ է օտոսկլերոզը
Օտոսկլերոզ ունեցող մարդկանց միջին ականջում առաջանում է սպունգանման ոսկրային հյուսվածք, որը միաձուլում է լսողական փոքրիկ ոսկրերը կամ սահմանափակում դրանց շարժունակությունը, որի արդյունքում ընդհատվում է ձայնային տատանումների հաղորդումը թմբկաթաղանթից դեպի ներքին ականջ: Այդ իսկ պատճառով հիվանդությունը երբեմն անվանում են ականջի կարծրախտ:
Հիվանդությունը կարող է զարգանալ միայն մեկ կամ զույգ ականջներում: Այն հակում ունի ընթանալու ընտանիքներում: Ավելի հաճախ հիվանդանում են կանայք, սովորաբար՝ հղիության ընթացքում:
Օտոսկլերոզի ախտանիշները
Օտոսկլերոզն առաջացնում է լսողության կայուն թուլացում (ծանրալսություն), որը ժամանակի ընթացում աստիճանաբար խորանում է, սակայն միայն խիստ հազվադեպ է ավարտվում ամբողջական խլությամբ:
Օտոսկլերոզ ունեցող մարդիկ, մասնավորապես, դժվարությամբ են լսում ցածր և խորը ձայները: Ի տարբերություն լսողության կորստով ուղեկցվող ականջի այլ հիվանդությունների, այս դեպքում մարդիկ ավելի հեշտությամբ են լսում, երբ առկա է ֆոնային աղմուկ:
Օտոսկլերոզի մյուս բնորոշ ախտանիշները ականջներում աղմուկն է, որը կոչվում է տինիտուս և գլխապտույտը:
Չբուժվելու դեպքում օտոսկլերոզը կարող է ախտահարել նաև ներքին ականջը՝ բերելով խորը ծանրալսության կամ լիարժեք խլության:
Օտոսկլերոզի ախտորոշումը
Օտոսկլերոզը սովորաբար ախտորոշվում է քիթ-կոկորդ-ականջաբանի կողմից: Վերջինս կարող է նշանակել լսողության ստուգման մի շարք հետազոտություններ (օրինակ՝ կամերտոն, աուդիոմետրիա և այլն), ինչպես նաև թեստեր, որոնք գնահատում են ականջի ներսում լսողական ոսկրիկների շարժունակությունը:
Օտոսկլերոզի բուժումը
Օստեսկլերոզի ժամանակ բժիշկը կարող է ձեզ առաջարկել բուժման երկու տարբերակ՝ լսողության օժանդակ միջոց կամ վիրահատություն:
Լսողության օժանդակ միջոցներին ավելի կարճ անվանում են լսողական սարքեր կամ լսողական ապարատներ:
Ընդհանուր առմամբ, կան երկու տեսակի լսողական սարքեր՝ հետականջային և ներականջային: Այս սարքերի նպատակն առանց վիրահատության կայուն թուլացած լսողության մասնակի վերականգնումն է:
Վիրահատության նպատակն է միջին ականջի ախտահարված լսողական ոսկրերի փոխարինումն իմպլանտով: Մյուս տարբերակը ոսկրի մեջ փոքր անցքի բացումն է (ստապէկտոմիա):
Վիրահատական բուժման առավելությունն առանց արտաքին սարքերի օգտագործման լսողության վերականգնումն է, ինչպես նաև օտոսկլերոզի հարաճուն զարգացման կանխարգելումը:
Ինչպես ցանկացած վիրահատություն, միջին ականջի վիրահատությունները ևս ունեն բարդությունների որոշակի ռիսկ: Առանց հետաձգելու կապ հաստատեք ձեր վիրաբույժի հետ, եթե՝
- վիրահատությունից հետո ձեր լսողությունը շարունակում է թուլանալ
- փոփոխվել է ձեր համի զգացողությունը
- ձեզ մոտ ի հայտ է եկել աղմուկ ականջներում կամ այս գանգատը վատացել է
- ձեզ մոտ զարգացել է վերտիգո (գլխապտույտի առանձնահատուկ տեսակ, որը բնորոշվում է շրջապատի պտտման զգացողությամբ)
- ձեզ մոտ զարգացել է դիմային թուլություն:
Ինքնօգնություն
Եթե ձեզ մոտ ախտորոշել են օտոսկլերոզ, դա չի նշանակում, որ դուք չեք կարող լողալ, դայվինգ անել կամ զբաղվել այլ մարզաձևերով: Սակայն, դուք պետք է լինեք խիստ զգույշ, եթե ունեք ականջի վարակ: Խոսեք ձեր բժշկի հետ՝ ճշտելու, թե ֆիզիկական որ ակտիվություններն են ձեզ համար առավել անվտանգ:
Ձեր բժիշկը կարող է խորհուրդ տալ, որ ձեր սննդակարգում ավելացնեք կալցիումով հարուստ սննդամթերքներ: Որոշ կանայք նաև կարող են զգալ, որ բեղմնականխիչ հաբերի ընդունումը դադարեցնելիս լսողությունը որոշ չափով բարելավվում է:
Առանձնահատուկ ուշադրության է արժանի ձեր լսողական համակարգն աղմուկներից պաշտպանելը՝ լինի դա բարձր երաժշտություն կամ աղմկոտ միջավայր (օրինակ՝ արտադրական կամ շինարարական աղմուկ):
Հոդվածը տեղադրվել է՝ 07-05-2019 վերանայվել է՝ 11-05-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
