Ցավոտ սեռական հարաբերությունը կանանց մոտ. պատճառներ

Ցավոտ սեռական հարաբերությունը կանանց մոտ. պատճառներ

Կանանց մոտ սեռական հարաբերությանն ուղեկցող ցավը կամ դիսպարեունիան կարող է առաջանալ տարբեր պատճառներից:

Ցավերը կարող են կապված լինել ֆիզիկական՝ կառուցվածքային գործոնների հետ և, կախված խնդրից, ի հայտ գալ առնանդամի ներհրման ժամանակ (պենետրացիա) կամ խոր ներհրումների ընթացքում (ֆրիկցիա): Հուզական կամ հոգեծին գործոնները կապված են ցավոտ սեռական հարաբերության տարբեր տեսակների հետ:

Ներհրման (պենետրացիոն) ցավեր

Հեշտոցի մեջ առնանդամի ներհրման ժամանակ առաջացող ցավերը կարող են պատճառվել բազմաթիվ գործոններով:

  • Ոչ բավարար օծում (լուբրիկացիա). սա հաճախ սեռական հարաբերությանը նախորդող ոչ բավարար սիրախաղի արդյունք է: Հեշտոցի չորության պատճառ նաև կարող են դառնալ դաշտանադադարից հետո էստրոգենի մակարդակի անկումը, ծննդաբերությունը կամ կրծքով կերակրումը: Որոշ դեղեր կարող են են թուլացնել սեռական ցանկությունը և գրգռումը, որի արդյունքում հեշտոցի օծումը պակասում է՝ սեռական ակտը դարձնելով ցավոտ: Նման դեղամիջոցներից են՝ հակադեպրեսանտներ, բարձր արյան ճնշման դեղեր, սեդատիվներ, հակահիստամինային դեղեր և որոշ հակաբեղմնավորիչ հաբեր:
  • Վնասվածք, տրավմա կամ գրգռվածություն. սա ներառում է հեշտոցի նախադռան կամ լորձաթաղանթի պատահական վնասվածքը կամ գրգվածությունը, զուգընկերոջ մեծ առնանդամը, հեշտոցում օտար մարմնի առկայությունը, շեքի շրջանում վիրահատական միջամտությունը, ծննդաբերության ընթացքում ծննդաբերական ուղին լայնացնող շեքահատումը (էպիզիոտոմիա կամ պերինեոտոմիա), կանանց թլպատումը (վիրահատական միջամտություն, որը նպատակ ունի ոչ բժշկական պատճառներով, այլ մշակութային և սոցիալական բարքերից ելնելով փոփոխել կամ վնասել կնոջ սեռական օրգանները) և այլն:
  • Բորբոքում, վարակ կամ մաշկային հիվանդություններ. սեռական շրջանի կամ միզուղիների վարակը կարող է սեռական ակտը դարձնել ցավոտ: Սա ներառում է սեռական ճանապարհով փոխանցվող հիվանդությունները (ՍՃՓՀ), օրինակ՝ քլամիդիա, գոնորեա կամ գենիտալ հերպես, հեշտոցի կանդիդոզը և այլն: Սեռական շրջանի էկզեման և այլ մաշկային խնդիրները նույնպես կարող են դառնալ ցավի պատճառ:
  • Վագինիզմ. հեշտոցի պատի մկանների ոչ կամավոր կծկանքները (սպազմ) կարող են առնանդամի ներհրումը (պենետրացիա) դարձնել ցավոտ: Վագինիզմը նաև կարող է անհնարին դարձնել սեռական հարաբերությունը: Այն սովորաբար առաջանում է, երբ հպվում են ձեր հեշտոցին և դրան հարող մակերևույթներին։ Վագինիզմը կարող է առաջ գալ սեռական ակտից առաջ կամ դրա ընթացքում, հիգիենիկ տամպոնը ներդնելիս կամ գինեկոլոգիական զննման ժամանակ։
  • Բնածին արատներ. ի ծնե առկա անատոմիական խնդիրները, օրինակ՝ հեշտոցի ագենեզիան (հեշտոցի թերզարգացում) կամ հեշտոցամուտքը փակող իմպերֆորացված կուսաթաղանթը կարող են կնոջ սեռական հարաբերությունը դարձնել ցավոտ:

Խոր ցավեր

Խոր ցավերը սովորաբար առաջանում են առնանդամի խոր (մինչև վերջ) ներհրման ժամանակ և կարող են ուժեղանալ որոշ սեռական դիրքերում:

Հուզական (հոգեծին) գործոններ

Հույզերը խոր ազդեցություն են թողնում սեռական կյանքի վրա, ուստի կարող են նպաստել սեռական հարաբերության ժամանակ ցավերի առաջացմանը:

  • Հոգեբանական խնդիրներ. տագնապը, դեպրեսիան (ընկճվածություն), արտաքին տեսքի վերաբերյալ անհանգստությունները, ինտիմ կապերի նկատմամբ վախը կամ փոխհարաբերություններում առկա խնդիրները կարող են նպաստել սեռական գրգռման թուլացմանը և ակտի ընթացքում դիսկոմֆորտի կամ ցավի առաջացմանը:
  • Սթրես. ձեր կոնքի հատակի մկանները հակված են լարվելու կամ կծկվելու՝ ի պատասխան տարբեր սթրեսածին գործոնների: Ուստի, հուզական սթրեսը կարող է նպաստել ցավոտ սեռական հարաբերությանը:
  • Սեռական բռնության պատմություն. եթե ինչ-որ ժամանակ տուժել եք սեռական բռնությունից, ձեզ մոտ բարձրանում է սեռական հարաբերության վերաբերյալ տհաճ հիշողությունների, ապրումների, դիսկոմֆորտի կամ ցավի հավանականությունը:

Իրականում դժվար է գնահատել, թե արդյոք ցավոտ սեռական հարաբերությունն ունի հուզական ծագում: Նախնական ցավը կարող է բերել ցավի կրկնման նկատմամբ վախի, որն էլ դժվարացնի հեշտոցի մկանների թուլացումը, իսկ վերջինս պատճառի ավելի ուժեղ ցավ: Արդյունքում դուք սկսում եք խուսափել սեռական կապերից:

Ընդմիջեք սեռական հարաբերությունները, եթե այն հաճույքի փոխարեն ցավ է պատճառում։ Եթե շարունակեք ցավոտ սեռական հարաբերություններ ունենալը, բուժումը կարող է ավելի դժվարանալ։ Դիմեք ձեր բժշկին կամ գինեկոլոգին և բաց զրուցեք այս թեմայով։ Նկատի ունեցեք, որ որոշ հիվանդությունների բուժումը ժամանակատար է։

Հոդվածը վերանայվել է՝ 10-05-2021