Ցավոտ սեռական հարաբերությունը կանանց մոտ. ախտորոշում

Ցավոտ սեռական հարաբերությունը կանանց մոտ. ախտորոշում

Բժիշկը որոշում է սեռական հարաբերությանն ուղեկցող ցավի պատճառը՝ ելնելով ձեր գանգատներից ու հիվանդության պատմությունից, սեռական շրջանի և ներքին զննումից, ինչպես նաև որոշ հետազոտությունների արդյունքներից:

  • Մանրակրկիտ անամնեզ (հիվանդության պատմություն). բժիշկը կարող է տալ տարաբնույթ հարցեր՝ կապված ձեր սեռական կյանքի տարբեր մանրամասների հետ: Նման դեպքերում փորձեք ներկայացնել ձեր գանգատներն ու մտահոգություններն առավել անկեղծ: Ամաչել պետք չէ, առավել ևս, որ այդ հարցերի պատասխանները կարող են դառնալ ցավերի ճիշտ պատճառի որոշման բանալին: Օրինակ, նա կարող է հարցնել, թե կոնկրետ երբ են ցավերն առաջանում, ինչպես են փոփոխվում հարաբերության ընթացքում և դրանից հետո, արդյոք դրանք առկա են բոլոր զուգընկերների հետ հարաբերություններում կամ ինչպես են փոփոխվում տարբեր սեռական դիրքերում և այլն: Բժիշկը նաև կարող է հարցեր տալ ձեր ծննաբերությունների, տարած վիրահատությունների կամ այլ ուղեկցող հիվանդությունների ու դրանց բուժման տարբերակների մասին:
  • Զննում. սեռական շրջանի արտաքին զննմամբ բժիշկը կարող է ստուգել մաշկի գրգռման, վարակի կամ անատոմիական խնդիրների առկայությունը: Զննման ընթացքում բժիշկը կարող է նուրբ սեղմել սեռական օրգանների կամ շեքի շրջանում՝ գնահատելու ցավի առկայությունը: Բժիշկ-գինեկոլոգը կարող է առաջարկել հատուկ հեշտոցային հայելու օգնությաբ հեշտոցի խոռոչի ներզննում՝ դիտելու լորձաթաղանթը և արգանդի պարանոցի հեշտոցային բացվածքի շրջանը: Տեղեկացրեք նրան, եթե ներզննումն ուղեկցվում է ցավերով:
  • Այլ հետազոտություններ. եթե բժիշկը կասկածում է, որ ցավոտ սեռական հարաբերությունը կապված է այլ հիվանդությունների հետ, կարող է առաջարկել կոնքի օրգանների գերձայնային հետազոտություն (սոնոգրաֆիա), միզասեռական քսուքի միկրոսկոպիա (մանրադիտակային զննում) կամ մանրէաբանական հետազոտություն (ցանքս): Երբեմն կարող է առաջանալ նաև արյան և մեզի հետազոտության կարիք:

Հոդվածը վերանայվել է՝ 28-03-2021