Գրադարան
Ցավոտ սեքսը կանանց մոտ. բուժում
1 րոպե
Բուժման տարբերակները տարբեր են՝ կախված սեռական հարաբերությանն ուղեկցող ցավի պատճառից:
Դեղորայքային բուժում
Եթե վարակը կամ հիվանդությունը նպաստում են ձեր ցավին, պատճառի բուժումը կարող է լուծել ձեր խնդիրը: Դեղորայքի փոփոխությունը, որը կարող էր հեշտոցի բնական քսանյութերի նվազեցման պատճառ լինել, նույնպես կարող է վերացնել ձեր ախտանիշները:
Հետդաշտանադադարի փուլում բազմաթիվ կանանց մոտ դիսպարեունիան առաջանում է էստրոգենի ցածր մակարդակով պայմանավորված հեշտոցի չորությամբ: Հաճախ դա կարելի է բուժել հեշտոցային օգտագործման տեղային էստրոգենով:
ԱՄՆ Դեղերի և սննդի գործակալությունը (FDA) հաստատել է Օսպեմիֆենը (Օսֆենա) որպես միջինից մինչև ծանր դիսպարեունիայի բուժման դեղամիջոց այն կանանց համար, ովքեր հեշտոցային բնական քսանյութերի հետ կապված խնդիրներ։ Այս դեղամիջոցը հեշտոցի լորձաթաղանթի վրա ազդում է այնպես, ինչպես էստրոգենը: Սակայն, դեղամիջոցը կարող է առաջացնել ջերմահորդանքներ և կարող է մեծացնել ինսուլտի, արյան մակարդուկների (թրոմբ) և արգանդի լորձաթաղանթի քաղցկեղի ռիսկը:
Ցավոտ սեռական հարաբերությունը թեթևացնող մեկ այլ դեղամիջոց է Պրաստերոնը (Ինտրառոզա): Սա պատիճ է, որը դուք ամեն օր դնում եք հեշտոցի ներսում:
Այլ բուժումներ
Որոշ ոչ դեղորայքային բուժումներ (թերապիաներ) նույնպես կարող են օգնել ցավերի մեղմացմանը:
- Դեսենսիտիզացնող (ապազգայունացնող) թերապիա. դուք սովորում եք հեշտոցային թուլացման վարժանքներ, որոնք կարող են մեղմացնել ցավը:
- Խորհրդատվություն կամ սեռական թերապիա. եթե որոշ ժամանակ ձեր սեռական հարաբերությունները ցավոտ են եղել, դուք կարող եք սեռական խթանման նկատմամբ ցուցաբերել բացասական հուզական արձագանք նույնիսկ բուժումից հետո: Եթե դուք և ձեր զուգընկերը խուսափել եք սեռական մտերմությունից ցավոտ սեռական հարաբերության պատճառով, ձեզ նաև կարող է անհրաժեշտ լինել օգնություն՝ բարելավելու ձեր զուգընկերոջ հետ շփումը և վերականգնելու սեռական մտերմությունը: Խորհրդատուի կամ սեռական թերապևտի հետ խոսելը կարող է օգնել այս խնդիրների լուծմանը: Կոգնիտիվ վարքաբանական թերապիան ևս կարող է օգտակար լինել բացասական մտքերի կարծրատիպերն ու վարքագիծը փոխելու համար:
Հոդվածը տեղադրվել է՝ 28-03-2021 վերանայվել է՝ 03-04-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
