Այս հոդվածում ձեզ կներկայացվի հարվահանաձև գեղձերի վիրահատական հեռացման վերաբերյալ օգտակար տեղեկատվություն:

Եթե ունեք հարցեր, զրուցեք այդ մասին բժշկի կամ համապատասխան մասնագետների, մասնավորապես՝ էնդոկրին վիրաբույժի հետ:

Ի՞նչ են հարվահանաձև գեղձերը

Հարվահանաձև գեղձերն արտադրում են պարաթիրեոիդ կամ պարատ հորմոն (PTH), որն օգնում է օրգանիզմում կալցիումի հավասարակշռության պահպանմանը:

Մարդկանց մեծ մասն ունի 4 հատ հարվահանաձև գեղձ, որոնք տեղակայված են պարանոցին, սովորաբար՝ վահանաձև գեղձի ետևում: Երբ այս գեղձերից մեկը կամ մի քանիսը դառնում են գերակտիվ, զարգանում է արյան մեջ կալցիումի մակարդակի բարձրացում:

Նման վիճակի ամենահաճախ հանդիպող ախտանիշը ոսկրային ցավերն են:

Որո՞նք են վիրահատության օգուտները

Ձեր գանգատները պետք է թեթևանան կամ վերանան: Միևնույն ժամանակ, կրճատվում է ձեր ոսկրերի, երիկամների կամ սրտի վրա կալցիումի մեծ քանակների վնասաբեր ազդեցությունը:

Ի՞նչ է վիրահատությունը ներառում

Վիրահատությունը սովորաբար անցկացվում է ընդհանուր անզգայացման ներքո, սակայն երբեմն հնարավոր է իրականացնել նաև տեղային ազգայացմամբ:

Պարաթիրեոիդէկտոմիան սովորաբար տևում է մոտ մեկ ժամ: Վիրաբույժը պարանոցի առաջային մակերեսին վերջինիս ծալքերին զուգահեռ կատարում է կտրվածք և մկանախրձերն առանձնացնելով հասնում ու հեռացնում է մեծացած հարվահանաձև գեղձերը:

Պարաթիրեոիդէկտոմիա

Ինչպիսի՞ բարդություններ կարող են առաջանալ

Որոշ բարդություններ կարող են ստանալ ծանր ընթացք և անգամ բերել մահվան:

Որևէ վիրահատության ընդհանուր բարդությունները

ցավ
վիրահատական շրջանի (վերքային) վարակ
մաշկի կոպիտ սպիացում
արյան մակարդուկներ (թրոմբոզ) ոտքերում
արյան մակարդուկներ (թրոմբոզ) թոքերում:

Տվյալ վիրահատության առանձնահատուկ բարդությունները

արյունահոսություն
ձայնի փոփոխություններ
շնչառության դժվարացում
արյան կալցիումի մակարդակի անկում
վիրահատության խափանում (երբ չի հաջողվում հայտնաբերել հարվահանաձև գեղձերը):

Ինչքա՞ն շուտ կվերականգնվեմ

Դուք ի վիճակի կլինեք տուն վերադառնալ վիրահատությունից 1-2 օր հետո:

Դուք կարող եք վերադառնալ աշխատանքի, երբ բժիշկը համոզվի, որ բավարար լավ եք զգում (սովորաբար 2 շաբաթ անց՝ կախված վիրահատության ծավալից և աշխատանքի բնույթից):

Կանոնավոր վարժանքները կարող են օգնել, որ հնարավորինս շուտ վերադառնաք սովորական գործերին: Մինչև վարժանքներ սկսելը, խորհուրդ հարցրեք բժշկից:

Վիրահատված անձանց մեծ մասը լիարժեք վերականգնվում և անցնում է առօրյա կյանքին:

Վիրահատությամբ չհեռացված նորմալ գեղձը կարող է գերակտիվանալ և տարիներ անց մեկ այլ վիրահատության կարիք ունենաք:

Ամփոփում

Հարվահանաձև գեղձերը կարող են գերակտիվանալ՝ պատճառելով արյան կալցիումի մակարդակի բարձրացում: Ախտահարված գեղձերի հեռացումը երկարատև առողջական խնդիրների կանխարգելման միակ հուսալի մեթոդն է:

Լրացուցիչ տեղեկատվություն

Վիրահատական միջամտությունների մասին

Այցելե՛ք Մեդեքսի վիրահատական միջամտությունների համապատասխան էջերը, որ լրացուցիչ ընդհանուր բնույթի տեղեկություններ ստանաք վիրահատությունների վերաբերյալ, այդ թվում՝