Վարդագույն որքին

Վարդագույն որքինը թույլ մաշկային ցան է, որն ունի վարդագույն, թեփոտված կամ բորբոքված (կարմրած) տեսք:

Հիվանդությունը բավականին տարածված է և ունի թեթև ընթացք: Ավելի հաճախ տարածված է երիտասարդ չափահասների շրջանում:

Ցանը սովորաբար շարունակվում է 1-3 ամիս, որից հետո անհետանում է՝ իրենից հետո չթողնելով որևէ կայուն հետք կամ նշան: Սակայն թուխ մաշկով մարդիկ կարող են նշել, որ ցանի անհետացումից հետո մնացել են շագանակագույն բծեր, որոնք կարող են շարունակվել բավականին երկար:

Վերանալուց հետո ցանը սովորաբար այլևս չի կրկնվում:

Վարդագույն որքինի ախտանիշները

Առաջին նշանը սովորաբար ձեր կրծքի, որովայնի կամ թիկունքի շրջանում կլորավուն կամ ձվաձև վարդագույն բիծն է: Բիծը սովորաբար վարդագույն է կամ թուխ գունավորման:

Հաջորդ մի քանի շաբաթվա ընթացքում ավելի փոքր վարդագույն կամ թխագույն բծեր հայտնվում են ձեր թիկունքի, պարանոցի, ձեռքերի կամ ոտքերի վրա:

Հիվանդությունն ընթանում է ցանավորման ոչ մեծ բռնկումների ձևով:

Դուք կարող եք նաև զգալ՝

• ընդհանուր հոգնածություն
• ցավեր կամ ծակոցներ
• քոր, երբեմն՝ ուժեղ:

Վարդագույն որքինն ունի սեզոնայնություն և հաճախ ի հայտ է գալիս գարնան կամ աշնան ամիսներին:

Ի՞նչն է վարդագույն որքինի պատճառը

Վարդագույն որքինի պատճառն անհայտ է, սակայն կարծիք կա, որ կարող է ունենալ վիրուսային (հերպեսի վիրուսի որոշ շտամներ, որոնք կապված չեն հասարակ հերպեսի հետ) կամ բակտերիալ ծագում: Այն հավանաբար վարակիչ չէ:

Որոշ մարդկանց մոտ մինչև ցանավորումը կարող են ի հայտ գալ ընդհանուր մրսածության, ըմպանաբորբի կամ ջերմության բարձրացման երևույթներ:

Վարդագույն որքինի ախտորոշումը և բուժումը

Բժիշկ-մաշկաբանները սովորաբար վարդագույն որքինի ցանն ախտորոշում են զուտ արտաքին զննման (դիտելու) հիման վրա: Հազվադեպ, հատկապես մաշկային այլ հիվանդությունները բացառելու համար նրանք կարող են առաջարկել մաշկի քերուկի կամ եզակի դեպքերում՝ արյան հետազոտություն:

Շատ հաճախ վարդագույն որքինի բուժումը սահմանափակվում է մաշկը «հարթացնելու» և քորը մեղմացնելու միջոցներով: Բժիշկ-մաշկաբանը կարող է նշանակել կամ խորհուրդ տալ՝

• կորտիկոստերոիդային կրեմ կամ քսուք, որը նաև կարող է մեղմացնել կարմրությունը
• հակահիստամինային դեղեր
• սառը լոգանք՝ վարսակի ալյուրով կամ առանց դրա
• սառը կոմպրեսներ
• ցանի վրա կալամինի լոսյոնի ցանում (սա պարունակում է ցինկի օքսիդ և 0,5% երկաթի օքսիդի խառնուրդ և ունի հակագրգռիչ և հակաքորային ազդեցություն):

Ցանի կրկնությունը խիստ անսովոր է:

Բնական կամ արհեստական արևի ճառագայթները կարող են օգնել ցանի անհետացմանը, սակայն որոշ մարդկանց մոտ կարող են առաջացնել տևական մգացած բծեր:

Եթե ձեզ մոտ հղիության ընթացքում առաջացել է վարդագույն որքին, ապա տեղեկացրեք այդ մասին ձեր բժշկին, քանի որ խիստ հազվադեպ այն կարող է ընթանալ բարդություններով: