Վաղաժամ սերմնաժայթքում

Վաղաժամ սերմնաժայթքման խնդրին իրենց կյանքի ընթացքում առնչվում են գրեթե բոլոր տղամարդիկ։

Ծանոթացեք նաև այս հոդվածի հետ ուղղակիորեն կապված այլ նյութերի հետ:

Վաղաժամ սերմնաժայթքումը (էյակուլյացիա) ավելի հատուկ է սեռական հարաբերությունների բավականաչափ փորձ չունեցող պատանիներին։

Սերմնաժայթքման համար կոնկերտ «նորմա» համարվող ժամանակային ցուցանիշ չկա։ Այս իմաստով, սերմնաժայթքումը համարվում է «վաղաժամ», երբ դուք կորցնում եք սերմնաժայթքման պահի վրա ձեր հսկողությունը կամ կառավարումը։

Երբ վաղաժամ սերմնաժայթքումը տեղի է ունենում եզակի դեպքերում, դա չի կարելի համարել խնդիր։ Հակառակը, երբ այն հաճախ տեղ է գտնում ձեր սեռական կյանքում, դուք կարող եք սա դիտարկել որպես խնդիր և համապատասխան միջոցներ ձեռնարկել։

Կարևոր է հիշել, որ սերմնաժայթքման հետ կապված խնդիրները ոչ մի կերպ չեն կարող ձեզ համար հիասթափության կամ ամոթի պատճառ կամ առիթ դառնալ։ Հակառակը, այս թեմայի շուրջ ձեր սեռական զուգընկերուհու կամ բժիշկ-մասնագետի հետ ազատ քննարկումը կարող է մեծապես օգնել, որ հաջողությամբ հաղթահարեք ստեղծված իրավիճակը։

Շատ կարևոր է իմանալ, որ վաղաժամ սերմնաժայթքումը հաղթահարելի է, որը թույլ կտա, որ դուք պահպանեք և զարգացնեք ձեր ինտիմ հարաբերությունները։

Վաղաժամ սերմնաժայթքման պատճառները

Երբեմն վաղաժամ սերմնաժայթքումը ողջ կյանքի ընթացքում շարունակվող խնդիր է՝ տղամարդու առաջին սեռական հարաբերությունից ի վեր։

Ձեռք բերովի վաղաժամ սերմնաժայթքում կարող է զարգանալ նորմալ սերմնաժայթքման որոշակի ժամանակաշրջանից հետո։ Սովորաբար այն առաջանում է որոշակի հոգեբանական խնդիրների պատճառով, որոնցից է օրինակ, այսպես կոչված «կատարման տագնապը» (երբ ձեզ անհանգստացնում են այնպիսի մտքերը, ինչպիսիք են՝ «կկարողանա՞մ զսպել վաղ սերմնաժայթքումը», «կգոհացնե՞մ արդյոք իմ զուգընկերուհուն» և այլն):

Վաղաժամ սերմնաժայթքման խնդրին նպաստող այլ գործոններից են տագնապը, սթրեսը, էրեկտիլ դիսֆունկցիան և զուգընկերուհու հետ փոխհարաբերություններում առկա խնդիրները։ Ալկոհոլը և «թեթև» թմրամիջոցները գուցե որոշ չափով օգնեն, սակայն ընդհանուր առմամբ կարող են ավելի խորացնել առկա խնդիրը, քանի որ զարգանում է յուրաքանչյուր սեռական հարաբերությունից առաջ դրանք օգտագործելու պահանջ և կախվածություն։

Որոշ դեպքերում վաղաժամ սերմնաժայթքման պատճառ կարող են դառնալ որոշ հիվանդություններ, օրինակ՝ բարձր արյան ճնշում կամ որոշ դեղերի ընդունում։

Վաղաժամ սերմնաժայթքման բուժումը

Կան վաղաժամ սերմնաժայթքումը կանխարգելող որոշ մեթոդներ, որոնք դուք կարող եք փորձել մինչև բժշկին դիմելը։ Դրանցից են՝

  • ակնկալվող սեռական հարաբերությունից մեկ կամ երկու ժամ առաջ իրականացվող մաստուրբացիա (ձեռնաշարժություն)
  • հաստ պահպանակի օգտագործում, որը կարող է նվազեցնել առնանդամի գլխիկի զգայունությունը
  • խորը շնչելը, որը կարող է կարճատև ընկճել սերմնաժայթքման ռեֆլեքսը
  • սեռական հարաբերության համար ձեզ համար պակաս սեքսուալ դիրք ընտրելը
  • ձեր «սեքսուալ» մտքերին և հույզերին «ընդմիջում» տալը և մտածելը տվյալ իրավիճակի հետ կապ չունեցող որևէ թեմայի շուրջ։

Եթե ցանկանում եք դիմել բուժօգնության, կարող եք ընտրել ստորև ներկայացված հնարավոր տարբերակներից մեկնումեկը։

Զույգերի բուժում

Եթե ձեր սեռական զուգընկերուհու հետ ապրում եք բավականին երկար տարիներ, ձեզ կարող է օգտակար լինել այսպես կոչված «զույգերի բուժումը»։

Զույգերի բուժումն ընթանում է երկու փուլով։ Առաջին փուլում զույգերը հոգեթերապևտի կողմից խրախուսվում են, որ բացահայտեն իրենց հարաբերություններում առկա խնդիրները և ստանան դրանց լուծմանն ուղղված խորհուրդներ։ Երկրորդ փուլում նրանց ներկայացվում են որոշ հմտություններ, որոնք կարող են օգնել հաղթահարելու տղամարդու վաղաժամ սերմնաժայթքումը։

Դեղեր

Բուժման մեկ այլ տեսակ է համարվում տեղային անզգայացնող սփրեյների օգտագործումը, որոնք կարող եք գնել դեղատներից։ Նման սփրեյները պետք է ակնկալվող սեռական հարաբերությունից մոտ 10 րոպե առաջ փչել ձեր առնանդամի գլխիկին։

Վաղաժամ սերմնաժայթքման ժամանակ կարող է արդյունավետ լինել նաև բժշկի ցուցումով նշանակված հակադեպրեսանտային դեղերը։ Հիշեք, որ այս դեղերը նշանակվում են կոնկրետ ցուցման՝ դեպրեսիայի առկայության դեպքում, որը պետք է ախտորոշվի հոգեկան առողջության ոլորտի մասնագետի կողմից (հոգեբույժ կամ հոգեթերապևտ)։

Խորհրդատվություն

Դուք կարող եք նաև ձեր խնդիրները ներկայացնել սեռական խնդիրներով զբաղվող բժիշկ-մասնագետներին՝ սեքսոպաթոլոգներին (հայերեն՝ սեռախտաբան)։

Հոդվածը վերանայվել է՝ 02-02-2021