Պատճառներ - Վաղաժամ էյակուլյացիա

Վաղաժամ սերմնաժայթքման ճշգրիտ պատճառը հայտնի չէ։

Վաղաժամ սերմնաժայթքման ճշգրիտ պատճառը հայտնի չէ։ Մի ժամանակ կարծում էին, որ դա միայն հոգեբանական խնդիր է: Սակայն բժիշկները հիմա գիտեն, որ վաղաժամ սերմնաժայթքումը կապված է հոգեբանական և կենսաբանական գործոնների բարդ փոխազդեցության հետ:

Հոգեբանական պատճառներ

Հոգեբանական գործոնները, որոնք կարող են դեր խաղալ, ներառում են հետևյալը՝

• վաղ սեռական փորձեր
• սեռական բռնություն
• մարմնի վատ մտապատկեր (սեփական մարմնի վատ ընկալում)
• դեպրեսիա
• վախ կամ անհանգստություն՝ կապված հնարավոր վաղաժամ սերմնաժայթքման հետ
• մեղքի զգացումներ, որոնք կարող են ստիպել ձեզ շտապ ավարտելու սեռական հարաբերությունը:

Այլ գործոնները, որոնք կարող են դեր խաղալ, ներառում են հետևյալը:

• Էրեկտիլ դիսֆունկցիա. էրեկցիային հասնելու և այն պահպանելու վերաբերյալ անհանգստությունը կարող է շտապելու և արագ սերմնաժայթքման ձգտում առաջացնել: Այս կարծրատիպը կարող է դժվարությամբ փոխվել:
• Անհանգստություն. հաճախ վաղաժամ սերմնաժայթքումը և անհանգստությունը առաջանում են միասին: Անհանգստությունը կարող է կապված լինել սեռական գործունեության (կատարման տագնապ) կամ այլ խնդիրների հետ:
• Փոխհարաբերությունների հետ կապված խնդիրներ. միջանձնային խնդիրները կարող են նպաստել վաղաժամ սերմնաժայթքմանը: Սա կարող է դեր խաղալ, եթե այլ զուգընկերների հետ սեռական հարաբերություններում վաղաժամ սերմնաժայթքումն ավելի հազվադեպ է լինում:

Կենսաբանական (օրգանական) պատճառներ

Մի շարք կենսաբանական գործոններ կարող են նպաստել վաղաժամ սերմնաժայթքմանը: Դրանք կարող են ներառել հետևյալը՝

• հորմոնների անկանոն մակարդակ
• գլխուղեղի քիմիական նյութերի (նեյրոհաղորդիչների) անկանոն մակարդակ
• շագանակագեղձի կամ միզուկի այտուցվածություն և վարակ
• ժառանգական առանձնահատություններ:

Ռիսկի գործոններ

Բազմաթիվ գործոններ կարող են բարձրացնել վաղաժամ սերմնաժայթքման ռիսկը:

Տարբեր գործոններ կարող են մեծացնել վաղաժամ սերմնաժայթքման ռիսկը: Դրանք կարող են ներառել հետևյալը:

• Էրեկտիլ դիսֆունկցիա. դուք կարող եք վաղաժամ սերմնաժայթքման մեծ ռիսկի ենթարկվել, եթե դժվարությամբ եք էրեկցիա ունենում կամ այն պահպանում: Էրեկցիան կորցնելու վախը կարող է ստիպել ձեզ, որ սեռական հարաբերության ընթացքում շտապեք: Դա կարող է տեղի ունենալ անկախ նրանից, թե դուք տեղյակ եք այդ մասին, թե ոչ (ենթագիտակցաբար):
• Սթրես. կյանքի ցանկացած ոլորտում հուզական կամ հոգեկան լարվածությունը կարող է դեր խաղալ վաղաժամ սերմնաժայթքման մեջ: Սթրեսը կարող է սահմանափակել սեռական հարաբերության ժամանակ թուլանալու և կենտրոնանալու ունակությունը: