Պատճառներ - Պսևդոմեմբրանոզ կոլիտ

Ձեր օրգանիզմը սովորաբար կարողանում է պահել ձեր հաստ աղիքի բազմաթիվ բակտերիաները բնական առողջ հավասարակշռության մեջ:

Այնուամենայնիվ, հակաբիոտիկները և այլ դեղամիջոցները կարող են խախտել այս հավասարակշռությունը: Կեղծթաղանթային կամ պսևդոմեմբրանոզ կոլիտը զարգանում է, երբ որոշ բակտերիաներ, սովորաբար՝ C. difficile-ն արագորեն գերակշռում են այլ բակտերիաներին, որոնք նորմայում C. difficile-ն պահում են վերահսկողության ներքո: Որոշ տոքսիններ, որոնք արտադրվում են C. difficile-ի կողմից, կարող են բարձրանալ և հասնել այնքան բարձր մակարդակի, որ վնասեն հաստ աղիքը:

Գրեթե ցանկացած հակաբիոտիկ կարող է առաջացնել կեղծթաղանթային կոլիտ, սակայն, որոշ հակաբիոտիկներ ավելի հաճախ կապված են այս վիճակի հետ, քան մյուսները: Դրանցից են՝

• ֆտորխինոլոններ, օրինակ՝ Ցիպրոֆլոքսացին (Ցիպրո) և Լևոֆլոքսացին
• պենիցիլիններ, օրինակ՝ Ամոքսիցիլին և Ամպիցիլին
• Կլինդամիցին (Կլեոցին)
• ցեֆալոսպորիններ, օրինակ՝ Ցեֆիքսիմ (Սուպրաքս):

Այլ պատճառներ

Հակաբիոտիկներից բացի այլ դեղամիջոցները ևս երբեմն կարող են դառնալ կեղծթաղանթային կոլիտի պատճառ: Քաղցկեղի բուժման մեջ օգտագործվող քիմիոթերապիայի դեղամիջոցները կարող են խախտել հաստ աղիքի բակտերիաների նորմալ հավասարակշռությունը:

Որոշ հիվանդություններ, որոնք ախտահարում են հաստ աղիքի պատը, ինչպիսիք են խոցային կոլիտը կամ Կրոնի հիվանդությունը, նույնպես կարող են բարձրացնել կեղծթաղանթային կոլիտի ռիսկը:

C. difficile-ի սպորները դիմացկուն են բազմաթիվ սովորական ախտահանիչների նկատմամբ և կարող են փոխանցվել բուժաշխատողների ձեռքից հիվանդներին: Ավելի ու ավելի հաճախ է C. difficile-ի մասին հաղորդվում է այն մարդկանց մոտ, ովքեր չունեն հայտնի ռիսկի գործոններ, այդ թվում՝ նրանց մոտ, ովքեր վերջերս չեն շփվել բուժհաստատությունների հետ կամ չեն օգտագործել հակաբիոտիկներ: Սա կոչվում է համայնքային ձեռք բերված C. difficile:

Նոր շտամների առաջացում

C. difficile-ն առաջացրել է ագրեսիվ շտամ, որն արտադրում է շատ ավելի շատ տոքսիններ, քան մյուս շտամները: Այս նոր շտամը կարող է ավելի դիմացկուն լինել որոշ դեղամիջոցների նկատմամբ և կարող է գրանցվել այն մարդկանց մոտ, ովքեր չեն եղել հիվանդանոցում կամ չեն օգտագործել հակաբիոտիկներ:

Ռիսկի գործոններ

Ձեզ մոտ կեղծթաղանթային կոլիտի ռիսկը բարձրացնող գործոններից են՝

• հակաբիոտիկներ ստանալը
• հիվանդանոցում կամ խնամքի հաստատությունում մնալը
• մեծ, հատկապես՝ 65-անց տարիքը
• թուլացած իմունային համակարգ ունենալը
• հաստ աղիքի որևէ հիվանդություն ունենալը, ինչպիսիք են աղիքների բորբոքային հիվանդությունը կամ կոլոռեկտալ քաղցկեղը
• աղիների վրա որևէ վիրահատություն անցնելը
• քաղցկեղի դեմ քիմիոթերապիա ստանալը: