Ախտորոշում - Փսիխոզ

Փսիխոզի ախտանիշները դրսևորվելուց հետո առաջին քայլը հոգեկան առողջության մասնագետին դիմելն է:

Սա կարող է իրականացվել բժշկի ուղեգրմամբ կամ ինքնուրուն (տեղեկացնելով նրան ձեր որոշման մասին):

Փսիխոզի գնահատումը

Փսիխոզի ախտորոշումը պահանջում է հոգեկան առողջության մանրակրկիտ գնահատում, որը հոգեբույժը կարող է կատարել խորացված հարցազրույցի միջոցով:

Ամենայն հավանականությամբ, հոգեբույժը նաև կցանկանա նախապես թույլտվություն ստանալուց հետո զրուցել պացիենտի ընտանիքի անդամների հետ, ովքեր կարող են տրամադրել ախտորոշման համար հույժ կարևոր տեղեկատվություն:

Հոգեկան առողջության գնահատման նպատակն է պարզել, թե՝

• արդյոք անձի մոտ առկա է փսիխոզ
• ինչ հավանական պատճառներ կարող էին առաջացնել տվյալ փսիխոտիկ վիճակը
• կան արդյոք հոգեկան հիվանդություններ, որոնք բերել են տվյալ վիճակի առաջացմանը
• ինչպիսին է անձի ընտանեկան պատմությունը (ժառանգականություն)
• ինչ հավանական ֆիզիկական հիվանդություններ կարող է ունենալ տվյալ անձը
• բուժման որ մեթոդը կարող է այդ անձի համար լինել լավագույնը:

Երբ ինչ-որ մեկի մոտ դրսևորվում է փսիխոզի դրվագ, նաև կարիք է առաջանում լիարժեք ստուգել նրա ընդհանուր առողջական վիճակը: Նման դեպքերում կարող են առաջարկվել՝

• թեստեր և հետազոտություններ, որոնց նպատակն է ստուգել արյան կենսաքիմիական տարբեր ցուցանիշները, հորմոնների մակարդակները, վարակների առկայությունը և այլն
• ապօրինի թմրամիջոցների հայտնաբերման հետազոտություններ
• գլխուղեղի պատկերային հետազոտություններ, օրինակ, ՄՌՏ՝ գլխուղեղի օրգանական հիվանդությունները ժխտելու համար, ինչպիսին է գլխուղեղի ուռուցքը:

Փսիխոզը բուժելի է, ուստի կարևոր է, որ հնարավորինս վաղ դիմվի հոգեբուժական որևէ ծառայության: Փսիխոզով մարդու բուժումը սկսվում է ախտորոշումից, ուստի որքան շուտ ախտորոշվեց հիվանդությունը, այդքան ավելի շուտ կմեկնարկեն բուժական միջոցառումները: