Ռեակտիվ արթրիտը զարգանում է որպես աղիքային, սեռական օրգանների կամ միզուղիների վարակի նկատմամբ օրգանիզմի ռեակցիա:
Դուք կարող եք տեղյակ չլինել հրահրող վարակի՝ տրիգերի գոյության մասին, եթե այն ընթացել է թույլ ախտանիշներով կամ անախտանիշ:
Բազմաթիվ բակտերիաներ կարող են առաջացնել ռեակտիվ արթրիտ: Դրանց մի մասը տարածվում է սեռական ճանապարհով, իսկ մյուսները սննդածին են: Ամենատարածված վարակներից են՝
- քլամիդիա
- սալմոնելա
- շիգելա (բակտերիալ դիզենտերիա)
- յերսինիա
- կամպիլոբակտեր
- կլոստրիդիում դիֆֆիցիլե:
Ռեակտիվ արթրիտը վարակիչ չէ: Այուամենայնիվ, հոդաբորբ առաջացնող բակտերիաները կարող են փոխանցվել սեռական ճանապարհով կամ վարակված սննդով: Վարակված մարդկանցից միայն քչերի մոտ կարող է զարգանալ ռեակտիվ արթրիտ:
Ռիսկի գործոններ
Կան տարբեր գործոններ, որոնք կարող են բարձրացնել ռեակտիվ արթրիտի զարգացման ռիսկը:
- Տարիք. ռեակտիվ արթրիտն առավել հաճախ հանդիպում է 20-40 տարեկան չափահասների շրջանում:
- Սեռ. սննդածին վարակներից զարգացող ռեակտիվ արթրիտի հաճախականությունը սեռից կախված չէ, սակայն սեռական ճանապարհով փոխանցվող վարակներից հետո զարգացող հոդաբորբն ավելի հաճախ գրանցվում է տղամարդկանց շրջանում:
- Ժառանգական գործոններ. հայտնաբերվել է գենետիկական մարկեր, որը կապված է ռեակտիվ արթրիտի հետ: Սակայն այդ մարկերն ունեցող բազմաթիվ մարդկանց մոտ երբևէ չի զարգանում ռեակտիվ հոդաբորբ:
Հոդվածը հրապարակվել է՝ 26-05-2021
Վերջին վերանայում՝ 23-04-2024