Ախտանիշներ - Քոս

Քոսի ախտանիշները ներառում են հետևյալը:

• Մաշկի քոր, հաճախ՝ ուժեղ, որը սովորաբար ավելի է սաստկանում երեկոյան և գիշերը:
• Բարակ, ալիքաձև թունելներ (քոսային ուղի), որոնք կազմված են մաշկի վրա գտնվող զույգ-զույգ դասավորված փոքրիկ բշտիկներից կամ հանգույցիկներից: Քոսի այս դասական մաշկային պատկերը հաճախ աղավաղվում է քորելուց առաջացած ճանկռվածքներով և մաշկային բարդություններով:

Քոսը հաճախ հանդիպում է մաշկային ծալքերում: Սակայն քոսը կարող է հայտնվել մարմնի բազմաթիվ շրջաններում: Չափահասների և ավելի մեծ երեխաների մոտ քոսը առավել հաճախ հայտնաբերվում է հետևյալ տեղամասերում՝

• ձեռերի և ոտքերի մատների միջև
• թևատակերում
• դաստակի մոտ
• դաստակների ներսի երկայնքով
• արմնկածալքերում
  
• ոտքնաթաթերի ներբանների վրա
• կրծքավանդակի վրա
• պտուկների շուրջը
• պորտի շուրջ
• սեռական օրգանների շուրջը
• աճուկների շրջանում
• հետույքի վրա:

Նորածինների և մանկահասակ երեխաների մոտ քոսի տարածված վայրերը սովորաբար ներառում են՝

• ձեռքերի մատներ
• դեմք, գլխամաշկ և պարանոց
• ձեռքերի ափեր
• ոտնաթաթերի ներբաններ:

Եթե նախկինում ունեցել եք քոս, ախտանշանները կարող են սկսվել վարակվելուց մի քանի օրվա ընթացքում: Եթե երբեք չեք ունեցել քոս, վարակվելուց հետո կարող է տևել մինչև վեց շաբաթ, մինչև ախտանիշներն ի հայտ գան: Դուք դեռ կարող եք քոս տարածել, նույնիսկ եթե դեռ որևէ ախտանիշ չունեք:

Ե՞րբ դիմել բժշկին

Խոսեք ձեր բժշկի հետ, եթե ունեք քոսի որևէ ախտանիշ:

Բազմաթիվ մաշկային հիվանդություններ, ինչպիսիք են մաշկաբորբը (դերմատիտը) կամ էկզեման, նույնպես կարող են առաջացնել մաշկի քոր և փոքր բշտիկներ: Ձեր բժիշկը կարող է գտնել ձեր ախտանիշների ճշգրիտ պատճառը, որ դուք ստանաք ճիշտ բուժում: Հակահիստամինները կամ դեղատոմս չպահանջող լոսյոնները կարող են թեթևացնել քորը: Սակայն դրանք ձեզ չեն ազատի տիզերից կամ դրանց ձվիկներից: