Ստաֆիլոկոկային վարակներ. կանխարգելում

Ստաֆիլոկոկային վարակներ. կանխարգելում

Կան մի շարք ընդհանուր նախազգուշական միջոցներ, որոնք կարող են օգնել ստաֆիլոկոկային վարակի զարգացման ռիսկի կրճատմանը:

  • Լվացե՛ք ձեռքերը. բակտերիաներից պաշտպանվելու լավագույն միջոցը ձեռքերը պատշաճ լվանալն է: Օճառի փրփուրով ձեռքերի մանրակրկիտ և լիարժեք լվանալուն տրամադրեք առնվազն 20 վայրկյան: Հնարավորության դեպքում չորացրեք ձեռքերը միանգամյա օգտագործման կամ թղթե սրբիչներով: Եթե ձեռքերն ակնհայտ կեղտոտ չեն, կարող եք նաև օգտագործել ալկոհոլային մաքրիչներ: Ձեռքերը լվացեք կանոնավոր կերպով, օրինակ՝ սնունդ պատրաստելուց առաջ, ընթացքում և հետո, հում մսի կամ թռչնեղենի հետ գործ անելուց հետո, ուտելուց առաջ, զուգարանից օգտվելուց հետո, կենդանիներին և դրանց արտաթորանքներին դիպչելուց հետո և այլն։
  • Ծածկե՛ք վերքերը. կտրած և պատռված վերքերը պահեք մաքուր և ծածկեք ստերիլ վիրակապով: Վարակված վերքերից հոսող թարախը հաճախ պարունակում է ստաֆիլոկոկեր, և վերքը փակ պահելը կարող է օգնել բակտերիաների տարածման կանխարգելմանը:
  • Կրճատե՛ք տամպոնների ռիսկը. տոքսիկ շոկային համախտանիշը պատճառվում է ստաֆիլոկոկային բակտերիաներով: Երկար ժամանակ հեշտոցում թողված տամպոնները նպաստավոր պայմաններ են ստեղծում ստաֆիլոկոկերի բազմացման համար: Տոքսիկ շոկային համախտանիշի ռիսկը կարելի է կրճատել հաճախակի փոխելով տամպոնները (առնվազն 4-8 ժամը մեկ), ինչպես նաև օգտագործելով ամենացածր ներծծման հատկությամբ տամպոններ: Փորձեք նաև տամպոնները փոխարինել հիգիենիկ միջադիրներով:
  • Անձնական օգտագործման պարագաներն օգտագործեք միա՛յն դուք. խուսափեք անձնական իրերն այլ մարդկանց հետ համատեղ օգտագործելուց՝ սրբիչներ, ածելիներ, հագուստ, մարզահագուստ և այլն: Ստաֆիլոկոկային վարակները վարակված մարդուց առողջին կարող են փոխանցվել ու տարածվել ինչպես ուղիղ շփման, այնպես էլ առարկաների և պարագաների միջոցով:
  • Հագուստը և սպիտակեղենը լվացե՛ք տաք ջրով. ստաֆիլոկոկային բակտերիաները կարող են կենսունակ մնալ ոչ պատշաճ լվացած հագուստի և անկողնային սպիտակեղենի վրա: Հնարավորության դեպքում լվացեք դրանք շատ տաք ջրով: Միևնույն ժամանակ, երբ հնարավոր է, օգտագործեք սպիտակեցնող նյութեր, ինչպիսին է ժավելաջուրը, որն ունի հականեխիչ և վարակազերծիչ հատկություն: Ցանկալի է լվացած հագուստը չորացնել ոչ թե դրսում, այլ հագուստի չորանոցում:
  • Պահպանե՛ք սննդի անվտանգության կանոնները. սննդամթերքի հետ գործ ունենալուց առաջ լվացեք ձեռքերը: Եթե մթերքը պահվելու է երկար ժամանակի ընթացքում, համոզվեք, որ տաք սնունդը պահվում է տաք պայմաններում (60 C-ից բարձր), իսկ սառը սնունդը՝ սառը պայմաններում (4.4 C-ից ցածր): Առանց ուշացնելու սառնարան տեղափոխեք չօգտագործված սնունդը: Խոհարարական տախտակները և դանակները լվացեք ջրով և օճառով:

Հոդվածը վերանայվել է՝ 04-07-2021