Ախտանիշներ - Դերմատոֆիտիա

Սնկախտի նշաններից են կարմրավուն թեփոտվող ցանը, որը կարող է չորանալ ու մաքրվել, բշտիկները և քորը։

Երբեմն ցանը կարող է ի հայտ գալ որպես կլորավուն ախտահարված մակերես, որի կենտրոնական շրջանում մաշկն անփոփոխ է (մկնատամ)։

Մատների եղունգների վրա զարգանալիս սնկախտը կարող է առաջացնել դեղնավուն կամ սպիտակավուն գունափոխություն։ Գլխի մազածածկ շրջանում տեղակայվելիս սնկախտը կարող է առաջացնել մազաթափության օջախներ։

Սնկիկային վարակները կարող են ախտահարել մարմնի տարբեր շրջանների մաշկը։ Կախված մաշկի ախտահարված շրջանի տեղակայումից և սնկիկի տեսակից, տարբերում են մաշկի սնկային հիվանդությունների հետևյալ տեսակները՝

• մարզիկի ոտնաթաթ կամ ոտնաթաթի էպիդերմոֆիտիա` ոտնաթաթի սնկային վարակ
• օնիխոմիկոզ` ձեռքի կամ ոտքի եղունգների սնկիկային վարակ
• մարմնի մկնատամ՝ ձեռքերի, ոտքերի կամ իրանի սնկիկային վարակ
• աճուկային էպիդերմոֆիտիա՝ աճուկային և անութային (թևատակ) շրջանի սնկիկային վարակ
• ձեռքի ափի էպիդերմոֆիտիա՝ դաստակի և ձեռքի ափի սնկիկային վարակ
• գլխամաշկի մկնատամ՝ գլխի մազածածկ շրջանի սնկիկային վարակ
• դիմագլխային մկնատամ՝ դեմքի և գլխի մազածածկ շրջանի սնկիկային վարակ
• դեմքի սունկ` դեմքի սնկիկային վարակ:

Ե՞րբ դիմել բժշկին

Պայմանավորվեք և այցելեք ձեր բժշկին, եթե ունեք մաշկի անբացատրելի քոր, գրգռվածություն և այլ նշաններ: