Պատճառներ - ՔՍՀ հիվանդություն

Քունքստործնոտային հոդն (ՔՍՀ) ապահովում է ստորին ծնոտի սահուն շարժունակությունը:

Ոսկորների այն ծայրերը, որոնք ՔՍՀ-ի ներսում փոխազդում են միմյանց հետ, ծածկված են աճառով և միմյանցից բաժանված են փոքրիկ սկավառակով, որը նորմայում ապահովում է հոդերեսների համատեղելիությունը և ստորին ծնոտի սահուն շարժունակությունը։ Այս բոլոր տարրերը ծածկված են հոդային պատիճով, որի ներքին (սինովիալ) շերտն արտադրում է սինովիալ հեղուկ, որը փոքրացնում է հոդային մակերեսների շփումը հոդի շարժումների ժամանակ:

Աջ և ձախ ՔՍՀ-երում շարժումը համատեղ է, որի պատճառով գործառնական տեսակետից դրանք կազմում են միասնական համակցված հոդ, որում կատարվում են շարժումների հետևյալ տեսակները`

• ստորին ծնոտի իջեցում և բարձրացում, որը համապատասխանում է բերանը բացելուն և փակելուն
• ստորին ծնոտի տեղաշարժ դեպի առաջ և դեպի հետ
• ծնոտի շարժումը դեպի աջ և ձախ:

Ցավով ուղեկցվող ՔՍՀ-ի հիվանդություններ կարող են առաջանալ, եթե՝

• սկավառակը քայքայվում է կամ դուրս է գալիս իր ճիշտ դիրքից
• հոդաճառը վնասվում է արթրիտի պատճառով
• հոդը վնասվում է հարվածից կամ այլ ազդեցություններից։

Այնուամենայնիվ, բազմաթիվ դեպքերում ՔՍՀ-ի հիվանդությունների պատճառը պարզ չէ:

Ռիսկի գործոններ

ՔՍՀ-ի հիվանդությունների զարգացման ռիսկը մեծացնող գործոնները կարող են ներառել հետևյալը՝

• հոդաբորբի (արթրիտի) տարբեր տեսակներ, ինչպիսիք են ռևմատոիդ արթրիտը և օստեոարթրիտը
• ծնոտի վնասվածք
• ատամների երկարաժամկետ (քրոնիկ) կրճտացում կամ սեղմում
• շարակցական հյուսվածքի որոշ հիվանդություններ, որոնք առաջացնում են ՔՍՀ-ի վրա ազդող խնդիրներ: