Պատճառներ - Միկրոինսուլտ

Տրանզիտոր իշեմիկ գրոհը (ՏԻԳ) ունի նույն ծագումը, ինչ իշեմիկ ինսուլտը՝ ինսուլտի ամենատարածված տեսակը:

Իշեմիկ ինսուլտի ժամանակ մակարդուկը (թրոմբ) խցանում է գլխուղեղի մի մասի արյունամատակարարումը: ՏԻԳ-դեպքում, ի տարբերություն ինսուլտի, այս արգելափակումը կարճատև է և անդառնալի վնասում չկա:

ՏԻԳ-ի հիմքում ընկած պատճառը հաճախ խոլեսթերին պարունակող ճարպային նստվածքների՝ վահանիկների կուտակումն է այն զարկերակում կամ նրա ճյուղերից մեկում, որը գլխուղեղն ապահովում է թթվածնով և սննդանյութերով (աթերոսկլերոզ):

Վահանիկները կարող են նվազեցնել զարկերակով արյան հոսքը կամ հանգեցնել մակարդուկի զարգացմանը (թրոմբ): Արյան մակարդուկը, որը շարժվում է դեպի գլխուղեղը սնուցողզարկերակ օրգանիզմի մեկ այլ շրջանից (թրոմբոէմբոլիա), առավել հաճախ՝ սրտից, նույնպես կարող է առաջացնել ՏԻԳ:

Ռիսկի գործոններ

ՏԻԳ–ի և ինսուլտի որոշ ռիսկի գործոններ չեն կարող փոփոխվել (կոչվում են ոչ ձևափոխելի ռիսկի գործոններ): Մյուսները դուք կարող եք վերահսկել (կոչվում են ձևափոխելի ռիսկի գործոններ):

Ռիսկի գործոններ, որոնք չեք կարող փոփոխել

Դուք չեք կարող փոփոխել ՏԻԳ-ի և ինսուլտի հետևյալ ռիսկի գործոնները. Սակայն իմանալը, որ դուք ռիսկի տակ եք, կարող է դրդել ձեզ փոխել ձեր ապրելակերպը՝ այլ ռիսկերը նվազեցնելու համար:

• Ընտանեկան պատմություն (անամնեզ). ձեր ռիսկը կարող է ավելի մեծ լինել, եթե ձեր ընտանիքի անդամներից մեկը ՏԻԳ կամ ինսուլտ է ունեցել:
• Տարիք. ձեր ռիսկը մեծանում է տարիքին հետ, հատկապես 55 տարեկանից հետո:
• Սեռ. տղամարդկանց մոտ ՏԻԳ-ի և ինսուլտի մի փոքր ավելի բարձր ռիսկ կա: Սակայն տարիքի հետ կանանց մոտ ինսուլտի ռիսկն աճում է:
• Նախկին տրանզիտոր իշեմիկ գրոհ. եթե ունեցել եք մեկ կամ մի քանի ՏԻԳ–եր, ապա ինսուլտի հավանականությունը շատ ավելի մեծ է:
• Մանգաղաբջջային հիվանդություն. ինսուլտը մանգաղաբջջային հիվանդության հաճախ հանդիպող բարդությունն է: Այս ժառանգական խանգարման մյուս անվանումը մանգաղաբջջային անեմիան է: Մանգաղաձև արյան բջիջներն ավելի քիչ թթվածին են տեղափոխում և նաև հակված են խրվելու զարկերակների պատերին՝ խանգարելով արյան հոսքը դեպի գլխուղեղ: Այնուամենայնիվ, մանգաղաբջջային հիվանդության պատշաճ բուժման դեպքում դուք կարող եք նվազեցնել ինսուլտի ռիսկը:

Ռիկի գործոններ, որոնք կարող եք վերահսկել

Դուք կարող եք վերահսկել կամ բուժել մի շարք գործոններ, որոնք մեծացնում են ինսուլտի ռիսկը, այդ թվում՝ որոշակի առողջական խնդիրներ և ապրելակերպի ընտրություններ: Այս ռիսկի գործոններից մեկի կամ մի քանիսի առկայությունը դեռ չի նշանակում, որ դուք ինսուլտ կունենաք, բայց ձեր ռիսկը մեծանում է, եթե ունեք երկու կամ ավելի նպաստող գործոններ:

Առողջական խնդիրներ

• Բարձր արյան ճնշում (հիպերտենզիա). ինսուլտի ռիսկը սկսում է աճել 140/90 մմ ս.ս.-ից բարձր արյան ճնշման դեպքում: Ձեր բժիշկը կօգնի ձեզ որոշել արյան թիրախային ճնշումը՝ ելնելով ձեր տարիքից, դիաբետի և այլ գործոնների առկայությունից:
• Բարձր խոլեսթերին. ավելի քիչ խոլեստերինի և ճարպերի, հատկապես՝ հագեցած ճարպերի և տրանս-ճարպերի օգտագործումը կարող է նվազեցնել ձեր զարկերակներում վահանիկները: Եթե ձեզ չի հաջողվում վերահսկել խոլեսթերինի մակարդակը միայն սննդակարգի փոփոխությունների միջոցով, ձեր բժիշկը կարող է նշանակել որևէ ստատին կամ խոլեսթերինը իջեցնող այլ տեսակի դեղամիջոց:
• Սրտանոթային հիվանդություն. սա ներառում է սրտային անբավարարությունը, սրտի արատը, սրտի վարակը կամ սրտի ռիթմի խանգարումները (առիթմիա):
• Քնային զարկերակի հիվանդություն. այս հիվանդության ժամանակ դեպի գլխուղեղ գնացող պարանոցի արյունատար անոթները խցանվում են։
• Ծայրամասային զարկերակային հիվանդություն (ԾԶՀ). ԾԶՀ–ն առաջացնում է դեպի ձեռքեր և ոտքեր գնացող արյունատար անոթների խցանումներ:
• Դիաբետ. շաքարայն դիաբետը մեծացնում է աթերոսկլերոզի` ճարպային նստվածքների կուտակման պատճառով զարկերակների նեղացման ծանրությունը, և դրա զարգացման արագությունը:
• Հոմոցիստեինի բարձր մակարդակ. արյան մեջ այս ամինաթթվի բարձր մակարդակը կարող է հանգեցնել զարկերակների հաստացման և սպիների, ինչը նրանց ավելի զգայուն է դարձնում մակարդուկների նկատմամբ:
• Ավելցուկային քաշ. գիրությունը, հատկապես որովայնային տիպի ճարպակալումը մեծացնում է ինսուլտի ռիսկը ինչպես տղամարդկանց, այնպես էլ կանանց մոտ։
• COVID 19. կան ապացույցներ, որ SARS-CoV-2-ը՝ COVID-19 պատճառող վիրուսը, կարող է մեծացնել ինսուլտի ռիսկը:

Ապրելակերպի ընտրություններ

• Ծխախոտի ծխելը. թողե՛ք ծխելը ՏԻԳ-ի և ինսուլտի ռիսկը նվազեցնելու համար: Ծխելը մեծացնում է արյան մակարդուկների ռիսկը, բարձրացնում է արյան ճնշումը և նպաստում զարկերակներում խոլեսթերին պարունակող ճարպային կուտակումների առաջացմանը (աթերոսկլերոզ):
• Ֆիզիկական անգործություն. ամեն օր 30 րոպե չափավոր ծանրաբեռնվածության վարժանքներով զբաղվելը օգնում է նվազեցնել ռիսկը:
• Վատ սնուցում. ճարպի և աղի ընդունման կրճատումը նվազեցնում է ՏԻԳ-ի և ինսուլտի ռիսկը:
• Ալկոհոլի չարաշահում. եթե ալկոհոլ եք օգտագործում, սահմանափակվեք օրական երկու չափաբաժնից ոչ ավելի խմիչքով, եթե տղամարդ եք, և օրական 1 չափաբաժնից ոչ ավելի խմիչքով, եթե կին եք:
• Ապօրինի թմրամիջոցներ. խուսափեք կոկաինից և այլ ապօրինի թմրամիջոցներից: