Տրանզիտոր իշեմիկ գրոհ

Տրանզիտոր իշեմիկ գրոհը կամ ուղեղի արյան շրջանառության անցողիկ խանգարումը ինսուլտին նմանվող, սակայն միայն րոպեներ տևող և որևէ մնայուն շեղումով չավարտվող վիճակ է:

Գրականության մեջ տրանզիտոր իշեմիկ գրոհը (ՏԻԳ) անվանում են նաև «մինի-ինսուլտ» կամ «միկրոինսուլտ»՝ ընդգծելու նմանությունը իշեմիկ ինսուլտին, սակայն և՝ իր ծանրության աստիճանով, տևողությամբ և հետևանքներով ինսուլտին էապես զիջելը:

Այնուամենայնիվ, ՏԻԳ ահազանգ է այն մասին, որ ուղեղի արյան շրջանառությունը նորմալ վիճակում չէ և ինսուլտի զարգացման հավանականությունը խիստ բարձր է: Ահա թե ինչու, եթե կարծում եք, որ ձեզ մոտ կա ՏԻԳ, պետք է ժամ առաջ նախաձեռնել ինսուլտի կանխարգելման քայլերը:

Եթե կասկածում եք, որ ունեք ՏԻԳ, անհապաղ զանգեք 1-03 և կանչեք շտապբուժօգնություն, նույնիսկ եթե ձեր գանգատներն անհետացել են և ինքնազգացողությունը բարելավվել է:

Ի՞նչ է ՏԻԳ-ը

ՏԻԳ-ը զարգանում է, երբ ձեր գլխուղեղի որոշ շրջաններում արյան հոսքը կարճատև կտրուկ նվազում է: Նման վիճակ կարող է ստեղծվել արյունատար անոթների պատի ճարպային կուտակումների պատճառով (աթերոսկլերոզ), երբ անոթի լուսանցքը նեղանում կամ մասամբ խցանվում է արյան մակարդուկներով (թրոմբ):

Երբ դեպի գլխուղեղ արյան հոսքը նվազում է, թթվածնաքաղցի և սննդանյութերի քաղցի ենթարկված ուղեղաբջիջները սկսում են մահանալ։ Եթե գլխուղեղի արյունամատակարարումը չի վերականգնվում, զարգանում է ինսուլտ, իսկ րոպեներ անց վերականգնվելու պարագայում՝ ուղեղի արյան շրջանառության տրանզիտոր կամ անցողիկ խանգարում, կամ որ նույնն է՝ ՏԻԳ։

ՏԻԳ ունեցած 3 մարդուց 1-ի մոտ հետագայում զարգանում է ինսուլտ։ ՏԻԳ-ից հետո ինսուլտի զարգացման ամենաբարձր ռիսկը գրանցվում է առաջին տարվա ընթացքում։ Համարժեք բուժումը և ինսուլտի կանխարգելման միջոցառումներն այս ռիսկը զգալիորեն նվազեցնում են։

ՏԻԳ-ից հետո խորհուրդ է տրվում առնվազն 2 շաբաթ հրաժարվել ավտոմեքենա վարելուց։

ՏԻԳ և ինսուլտի ախտանիշները միմյանց նման են: Սակայն, ի տարբերություն ինսուլտի, ՏԻԳ ախտանիշները մեղմանում և անհետանում են սկսվելուց մինչև մեկ ժամվա ընթացքում:

ՏԻԳ-ն ախտորոշելիս բժիշկը կարող է ձեզ հետ զրուցելուց և ձեր գանգատներին ու հիվանդության պատմությանն ուշադիր ծանոթանալուց հետո ձեզ առաջարկել մի շարք հետազոտություններ, որոնք կօգնեն հասկանալու գլխուղեղի իշեմիայի պատճառը, ինչպես նաև ժխտելու այլ հիվանդությունները:

Թեև ՏԻԳ-ը չունի որևէ բուժում, սակայն բժիշկը կատարում է նշանակումներ՝ ուղղված ձեև գանգատների մեղմացմանը և ինսուլտի կանխարգելմանը։ Սա կարող է ներառել՝ գլխուղեղի արյան շրջանառությունը բարելավող վիրահատություն կամ բարձր ճնշումը կարգավորող դեղեր, արյան խոլեսթերինի նվազեցում, արյան մակարդուկների (թրոմբ) կանխարգելիչ բուժում, սրտի ռիթմի կարգավորում և այլն։ Ամենայն հավանականությամբ բժիշկը ձեզ կնշանակի դեղեր, որոնք դուք պետք է ընդունեք ձեր ողջ կյանքի ընթացքում։

Նախկինում ՏԻԳ ունենալը նշանակում է, որ դուք պետք է առանց հետաձգելու սկսեք ինսուլտի կանխարգելման միջոցառումները։

Հոդվածը վերանայվել է՝ 28-03-2021