Պատճառներ - Վիտամին-դեֆիցիտային անեմիա

Վիտամինային դեֆիցիտի անեմիա կարող է առաջանալ, եթե դուք չեք ուտում բավարար քանակությամբ վիտամին B12 և ֆոլաթթու պարունակող մթերքներ, կամ եթե ձեր օրգանիզմը դժվարանում է ներծծել կամ յուրացնել այդ վիտամինները:

Վիտամին B12 դեֆիցիտային անեմիա

Վիտամին B12-ի ցածր մակարդակը կարող է պայմանավորված լինել հետևյալ հիվանդություններով կամ վիճակներով:

• Սննդակարգ. վիտամին B12-ը հիմնականում հայտնաբերվում է մսի, ձվի և կաթի մեջ, ուստի մարդիկ, ովքեր չեն ուտում այս տեսակի մթերքներ, կարող են B12 հավելումների կարիք ունենալ: Որոշ մթերքներ հարստացված են B12-ով, ներառյալ նախաճաշի որոշ փաթիլներ և որոշ սննդային խմորասնկային արտադրանք:
• Պերնիցիոզ (չարորակ) անեմիա. այս վիճակն առաջանում է, երբ օրգանիզմի իմունային համակարգը գրոհում է ստամոքսի բջիջների վրա, որոնք արտադրում են մի նյութ, որը կոչվում է ներքին գործոն (Կասլիի ներքին գործոն): Առանց այս նյութի, B12-ը չի կարող ներծծվել աղիներում:
• Ստամոքսի վիրահատություններ. եթե ձեր ստամոքսի կամ աղիքների որոշ հատվածներ հեռացվել են վիրահատական ճանապարհով, դա կարող է նվազեցնել արտադրվող ներքին գործոնի քանակը և վիտամին B12-ի համար ներծծման հասանելի մակերեսը:
• Աղիքային խնդիրներ. Կրոնի հիվանդությունը և ցելիակի հիվանդությունը կարող են խանգարել վիտամին B12-ի ներծծմանը: Նույնը վերաբերվում է երիզորդներին, որոնցով կարող եք վարակվել վարակված ձուկ ուտելուց:

Ֆոլատ-դեֆիցիտային անեմիա

Ֆոլաթթուն որը նաև հայտնի է որպես վիտամին B9, գլխավորապես մրգերում և մուգ կանաչատերև բանջարեղեններում հայտնաբերվող սննդանյութ է: Ֆոլաթթվի անբավարարություն կարող է առաջանալ այս սննդամթերքներից աղքատ մշտական սննդակարգի պատաճռով կամ եթե օրգանիզմը չի կարողանում սննդից ներծծել ֆոլատը:

Ֆոլաթթվի ներծծման հետ կապված խնդիրները կարող են պայմանավորված լինել հետևյալով՝

• աղիքային հիվանդություններ, ինչպիսին է ցիլիակի հիվանդությունը
• աղիների մեծ մասի վիրահատական հեռացում կամ շրջանցում (շունտավորում)
• ալկոհոլի չափից ավելի օգտագործում
• որոշ դեղեր, ինչպիսիք են որոշ հակացնցումային դեղամիջոցները:

Հղի կանայք և կրծքով կերակրող կանայք, ինչպես նաև երիկամների հիվանդության համար դիալիզի ենթարկվող մարդիկ ունեն ֆոլաթթվի մեծ պահանջարկ:

Ֆոլաթթվի պակասը կարող է հղիության ընթացքում առաջացնել բնածին արատներ: Այնուամենայնիվ, ֆոլաթթվի անբավարարությունն այժմ ավելի քիչ է հանդիպում այն երկրներում, որոնք սովորաբար ֆոլաթթու են ավելացնում սննդամթերքի մեջ, ինչպիսիք են հացը, հացահատիկը և մակարոնեղենը: