Վիտամին-դեֆիցիտային անեմիա. կանխարգելում

Վիտամին-դեֆիցիտային անեմիա. կանխարգելում

Կան վիտամինային անբավարարության կանխարգելման պարզ միջոցներ, որոնք հիմքն առողջ սննդակարգն է:

Ընտրե՛ք առողջ սննդակարգ

Վիտամինային դեֆիցիտի որոշ տեսակները կարող են կանխարգելվել բազմատեսակ սննդամթերքներից կազմված առողջ սննդակարգի օգնությամբ:

Ֆոլատով հարուստ սննդամթերքները ներառում են՝

  • մուգ կանաչատերև բանջարեղեններ
  • ընկույզներ
  • հարստացված հատիկային մթերքներ, օրինակ՝ հաց, փաթիլներ, մակարոն և բրինձ
  • մրգեր և մրգահյութեր:

Վիտամին B12-ով հարուստ սննդամթերքները ներառում են՝

  • հավկիթներ
  • հարստացված մթերքներ, օրինակ՝ նախաճաշի փաթիլներ
  • կաթ, պանիր և յոգուրտ
  • միս և ծովամթերք:

Վիտամին C-ով հարուստ սննդամթերքները ներառում են՝

  • բրոկոլի
  • ցիտրուսային մրգեր և մրգահյութեր
  • հատապտուղներ
  • կանաչ բիբարներ
  • լոլիկ (պոմիդոր):

Չափահաս մարդկանց մեծ մասն ունի վիտամինների հետևյալ օրական սննդային քանակների պահանջը՝

  • Վիտամին B12՝ 2,4 միկրոգրամ (մկգ)
  • Ֆոլատ կամ ֆոլաթթու՝ 400 մկգ
  • Վիտամին C՝ 75-90 միլիգրամ (մգ)։

Հղի կանանց և կրծքով կերակրող մայրերի համար կարող են պահաջվել վիտամինների ավելի մեծ քանակներ:

Մուլտիվիտամիններ

Եթե կարծում եք, որ սննդով չեք ստանում բավարար քանակով վիտամիններ, բժշկի հետ քննարկեք մուլտիվիտամինային հավելումներ ստանալու հարցը: Առողջ սննդակարգն ապահովում է բոլոր վիտամինների և միներալների օրական պահանջվող քանակները, սակայն, եթե ձեր սննդակարգն ինչ-որ պատճառով սահմանափակված է, կարող է առաջանալ մուլտիվիտամիններ ընդունելու կարիք:

Մի՛ ծխեք

Ծխախոտի օգտագործումը բացասաբար է ազդում սննդանյութերի, օրինակ՝ վիտամին C-ի ներծծման վրա, ուստի բարձրացնում է վիտամինային անբավարարության ռիսկը:

Եթե ծխող եք, շուտափույթ դադարեցրեք այն: Եթե չեք ծխում, մի՛ սկսեք: Եթե փորձում եք ինքնուրույն ձերբազատվել ծխախոտից և հաջողության չեք հասնում, բժշկի հետ կազմեք ծխելու դադարեցման անհատական ծրագիր:

Եթե օգտագործում եք ալկոհոլ, միայն՝ չափավոր քանակներով

Ալկոհոլը կարող է նպաստել վիտամին-դեֆիցիտային անեմիայի զարգացմանը: Եթե օգտագործում եք ալկոհոլային խմիչքներ, մի փորձեք գերազանցել չափավոր քանակները, որը համարժեք է՝

  • մինչև 65 տարեկան տղամարդկանց համար՝ օրական 2 չափաբաժին
  • 65-ից բարձր տղամարդկանց համար՝ օրական 1 չափաբաժին
  • որևէ տարիքային խմբի կանանց համար՝ օրական 1 չափաբաժին։

1 չափաբաժինը հավասար է 355 մլ գարեջրին, 148 մլ գինուն կամ 44 մլ 80 աստիճանի թորած սպիրտին:

Հոդվածը վերանայվել է՝ 25-05-2021