Ինքնօգնություն - Վուլվոդինիա

Ինքնօգնության պարզ քայլերը կարող են օգնել ձեզ կառավարելու վուլվոդինիայի ախտանիշները։

Ահա աշխատանքի վայրի համար որոշ խորհուրդներ։

• Նստելը դարձրեք ավելի հարմարավետ․ եթե ​​օրվա ընթացքում շատ եք նստում, օգտագործեք ռելիեֆային փքուն բարձիկ:
• Փորձեք ավելի հաճախակի կանգնել․ սա հանում է ձեր ամոթույքը (վուլվա) շրջապատող հյուսվածքի վրա ճնշումը:

Ահա վարժանքների հետ կապված որոշ խորհուրդներ:

• Սահմանափակեք բարձր ինտենսիվության վարժանքները, ինչպիսին է վազքը․ դրանք առաջացնում են շփում, որը կարող է գրգռել և բորբոքել ամոթույքը:
• Վարժանքից հետո օգտագործեք սառեցնող միջոց․ բարակ սրբիչով փաթաթված սառեցնող գելային պարկը դրեք ձեր ամոթույքի վրա մինչև 15 րոպե՝ առկա ախտանիշը թեթևացնելու համար:
• Սահմանափակեք ձեր ամոթույքի վրա ճնշում առաջացնող գործողությունները կամ զբաղմունքները, ինչպիսիք են հեծանվավարումը կամ ձիավարությունը:

Ահա լոգանքի և լողի հետ կապված որոշ խորհուրդներ:

• Լվացեք նրբորեն․ բորբոքված կամ ցավոտ տարածքը տրորելը կամ շատ հաճախ լվանալը կարող են ավելի վատթարացնել գրգռվածությունը կամ բորբոքումը: Փոխարենը, օգտագործեք մաքուր գոլ կամ սառը ջուր, որ նրբորեն ձեռքով մաքրեք ձեր ամոթույքը: Այնուհետև նրբորեն և լիարժեքորեն չորացրեք նույն տարածքը: Լողանալուց հետո օգտագործեք առանց կոնսերվանտների փափկացնող միջոց, օրինակ՝ սովորական նավթային ժելե (վազելին), որը ստեղծում է պաշտպանիչ պատնեշ:
• Հեռու մնացեք այնպիսի արտադրանքներից, որոնք կարող են գրգռել ձեր ամոթույքը․ մի՛ օգտագործեք պղպջակային լոգանք, բուրումնավետ կանացի հիգիենայի միջոցներ, բուրումնավետ նրբաքսուքներ կամ օճառներ:
• Նստած լոգանքներ․ օրական երկու-երեք անգամ 5-10 րոպեով նստեք գոլ կամ սառը ջրի մեջ՝ Էպսոմ աղերով կամ կոլոիդային վարսակի ալյուրով: Սա կարող է օգնել այրոցի և գրգռված վիճակի թեթևացմանը:
• Խուսափեք տաք ջակուզիներից և շոգեբաղնիքներից․ տաք ջրի մեջ ժամանակ անցկացնելը կարող է ամոթույքի շրջանում առաջացնել անհարմարավետություն և քոր:
• Օգտվեք այնպիսի լողավազաններից, որտեղ շատ քլոր չկա․ լողավազանի այս ախտահանիչը մաքուր է պահում ջուրը, բայց չափից շատ քանակներով կարող է գրգռել ձեր ամոթույքը:

Ահա հիգիենիայի վերաբերյալ որոշ խորհուրդներ:

• Մի՛ օգտագործեք դեզոդորանտային (բուրումնավետ) տամպոններ կամ միջադիրներ․ դեզոդորանտը կարող է գրգռիչ ազդեցություն թողնել: Փոխարենը օգտագործեք 100%-ոց բամբակյա տամպոններ և միջադիրներ։
• Օգտագործեք զուգարանի թուղթ, որը փափուկ է, սպիտակ և առանց բուրումնավետ նյութերի:
• Միզեք՝ նախքան ձեր միզապարկը լիքը լցվելը․ որից հետո ողողեք ձեր ամոթույքը ջրով և նրբորեն չորացրեք:

Ահա հագուստի և լվացքի հետ կապված որոշ խորհուրդներ:

• Հագեք ազատ և լայն զգեստ․ կիպ հագուստը սահմանափակում է օդի հոսքը դեպի ձեր ամոթույք, ինչը կարող է գրգռել այս տարածքը: Նեյլոնե ներքնազգեստի փոխարեն հագեք 100% բամբակյա ներքնազգեստ: Փորձեք գիշերը քնել առանց ներքնազգեստի: Նաև համոզվեք, որ կրում եք լայն շալվար և կիսաշրջազգեստ: Ընտրեք մինչև ազդրերը կամ մինչև ծնկները հասնող գուլպաներ:
• Վարժանքից հետո անմիջապես հանեք մարզական հագուստը․ լողալուց հետո հանեք թաց լողազգեստը։
• Օգտագործեք զգայուն մաշկի համար նախատեսված լվացքի միջոցներ․ և ներքնազգեստի համար մի՛ օգտագործեք գործվածքները փափկացնող միջոցներ:
• Եթե ​​ձեր լվացքի մեքենան օժտված է կրկնակի կամ լրացուցիչ ողողման ցիկլով, օգտագործեք դա այն հագուստի համար, որը շփվում է ձեր ամոթույքի հետ: Սա թույլ է տալիս ներքնաշորերից առավելագույնս հեռացնել լվացող միջոցը:

Եթե սեռապես ակտիվ եք, հետևեք այս խորհուրդներին:

• Օգտագործեք ջրային հիմքով քսանյութ (լուբրիկանտ)․ օգտագործեք այն սեռական հարաբերությունիցառաջ: Մի՛ փորձեք արտադրանքներ, որոնք պարունակում են ալկոհոլ, ներկանյութեր, օծանելիք, բուրմունք, ջերմացնող կամ սառեցնող բաղադրիչներ:
• Զգուշությամբ ընտրեք ձեր բեղմնականխիչ միջոցը․ հիշեք, որ սպերմիցիդային կամ հակաբեղմնավորիչ նրբաքսուքները (կրեմ) կարող են գրգռել ձեր ամոթույքը: Խոսեք ձեր բժշկի հետ այն բեղմնականխիչ միջոցների մասին, որոնք չեն գրգռի կամ բորբոքի ձեր ամոթույքը:
• Միզեք սեռական հարաբերությունից հետո. սա կարող է նվազեցնել վարակ ստանալու ձեր հավանականությունը: Միզելուց հետո ողողեք ձեր ամոթույքը սառը ջրով և չորացրեք:
• Փորձեք սառը թրջոցներ կամ գելային պարկեր՝ այրոցը թեթևացնելու համար․ ամեն անգամ փաթաթեք սառցապարկը սրբիչով և տեղադրեք ձեր ամոթույքի վրա մոտ 15 րոպե:

Այլընտրանքային բժշկություն

Որոշ մոտեցումներ, որոնք ստանդարտ բժշկական օգնության մաս չեն կազմում, կարող են օգնել վուլվոդինիայի ախտանիշների մեղմացմանը: Դրանից են՝

• ասեղնաբուժություն
• հիպնոս
• գիտակցվածություն և մեդիտացիա
• միջմաշկային էլեկտրական նյարդային խթանում:

Սթրեսը հակված է վատթարացնել վուլվոդինիայի ախտանիշները: Իսկ վուլվոդինիա ունենալը կարող է ձեզ մոտ ավելի շատ սթրես առաջացնել: Սթրեսը կրճատող մեթոդներից են յոգան և գիտակցվածության մեդիտացիան: