Թարախակույտի (աբսցեսի) բացահատում և դրենավորում

3 րոպե

Այս էջում ձեզ կներկայացվի թարախակույտերի բացահատման և դրենավորման վերաբերյալ հանրամատչելի տեղեկատվություն:

Եթե ունեք հարցեր, դիմեք ձեր բժշկին կամ համապատասխան մասնագետին:

Ի՞նչ է թարախակույտը

Թարախակույտը կամ աբսցեսը հյուսվածքային պատով հարակից հյուսվածքներից առանձնացված թարախի կուտակում է: Այն առաջացնում է ցավոտ ուռածություն և կարող է բերել ձեր ինքնազգացողության վատթարացման:

Թարախակույտն առաջանում է, երբ ձեր մարմինը պայքարում է վարակի դեմ՝ վարակված շրջանի շուրջ ձևավորելով պաշտպանական պատնեշ, որով սահմանափակում է վարակի տարածումը հարակից շրջաններ: Թարախակույտ կարող է առաջանալ ձեր մարմնի գրեթե ցանկացած շրջանում:

Որո՞նք են վիրահատության օգուտները

Ձեր թարախակույտը հեռացվում է և ցավերը կտրուկ մեղմանում են: Վիրահատությունը նաև կանխարգելում է թարախակույտի հնարավոր ծանր բարդությունները:

Կա՞ն արդյոք վիրահատությանն այլընտրանքներ

Եթե թարախակույտը փոքր է, հակաբիոտիկները կարող են ազդել, սակայն դեպքերի մեծ մասի համար դրանք դառնում են ոչ արդյունավետ, քանի որ չեն կարողանում թափանցել վարակի օջախ: Երբեմն թարախի դատարկումն ասեղով կարող է օգնել, սակայն թարախակույտը կարող է կրկնվել:

Ի՞նչ է տեղի ունենում միջամտության ընթացքում

Փոքր թարախակույտը կարող է դատարկվել տեղային անզգայացման ներքո, սակայն ավելի հաճախ անհրաժեշտ է լինում կարճատև ընդհանուր անզգայացում: Վիրահատությունը սովորաբար տևնում է 10-20 րոպե:

Ձեր վիրաբույժը կատարում է թարախակույտի շրջանի մաշկի կտրվածք (բացահատում): Սա թույլ է տալիս դատարկել թարախը:

Երբ թարախն ամբողջովին դատարկված է, առաջացած խոռոչը հաճախակի լվացման կարիք ունի, ուստի մաշկի կտրվածքը թողնվում է բաց:

Եթե խոռոչը խորն է, ձեր բժիշկը այս տարածության մեջ կթողնի ստերիլ մառլյաե դրենաժ, որը թույլ կտա շարունակաբար և լիարժեքորեն դատարկել-չորացնել խոռոչը և վիրահատական վերքը (կոչվում է դրենավորում):

Ի՞նչ բարդություններ կարող են առաջանալ

Որոշ բարդություններ կարող են լինել ծանր և նույնիսկ ունենալ մահացու ելք:

Որևէ վիրահատության ընդհանուր բարդությունները

• ցավ
• արյունահոսություն
• ձեր մաշկի սպիական տգեղացում
• արյան մակարդուկներ (թրոմբոզ) ձեր ոտքերում
• արյան մակարդուկներ (թրոմբոզ) ձեր թոքերում:

Այս վիրահատության առանձնահատուկ բարդությունները

• թարախակույտի կրկնություն
• դանդաղ լավացում, եթե ձեր վերքը դրենավորված է:

Որքա՞ն շուտ ես կվերականգնվեմ

Սովորաբար դուք ի վիճակի եք լինում տուն վերադառնալ նույն կամ հաջորդ օրը: Ծանր աբսցեսները պահանջում են, որ մի քանի օր անցկացնեք հիվանդանոցում:

Բժիշկը կտեղեկացնի ձեզ, թե երբ կկարողանաք վերադառնալ աշխատանքի:

Բազմաթիվ մարդիկ լիարժեք վերականգնվում և վերադառնում են իրենց առօրյա գործերին:

Ամփոփում

Թարախակույտը թարախի կուտակումն է, որը կարող է առաջ բերել ինքնազգացողության վատացում: Վիրահատությունը կանխարգելում է թարախակույտի հնարավոր լուրջ բարդությունները:

Լրացուցիչ տեղեկատվություն

Թարախակույտի մասին

Այցելե՛ք Մեդեքսի թարախակույտեր (աբսցեսներ) էջը, որպեսզի ծանոթանաք այս առողջական խնդիրի մասին:

Վիրահատական միջամտությունների մասին

Այցելե՛ք Մեդեքսի վիրահատական միջամտությունների համապատասխան էջերը, որ լրացուցիչ ընդհանուր բնույթի տեղեկություններ ստանաք վիրահատությունների վերաբերյալ, այդ թվում՝

• ի՞նչ հարցեր դուք կարող եք տալ մինչև վիրահատվելը
• ինչպե՞ս նախապատրաստվել վիրահատությանը
• ինչպե՞ս գտնել ճիշտ մասնագետ: