Ախտանիշներ - Աբսանսային ցնցումներ

Սովորական աբսանսային ցնցումն առաջացնում է «դատարկ»՝ ոչինչ չարտահայտող հայացք, որը կարող է սխալմամբ ընկալվել որպես ուշադրության կարճատև անհետացում:

Ցնցումը տևում է մոտ 10 վայրկյան, թեև կարող է շարունակվել մինչև 30 վայրկյան: Ցնցումը սկսվում է հանկարծակի և հանկարծակի էլ դադարում է: Ցնցումից հետո շփոթվածություն, գլխացավ կամ քնկոտություն չկա: Երեխան անմիջապես վերականգնում է և շարունակում իր նախկին գործը՝ առանց հիշելու դրվագի մասին։

Աբսանսային ցնցման ախտանիշները ներառում են՝

• գործերի հանկարծակի դադարեցում՝ առանց ընկնելու
• քարացած և մի կետի սևեռված հայացք՝ շրջապատի ռեակցիայի բացակայությամբ
• շրթունքների ակամա խաղ
• կոպերի թրթռում
• ծամել հիշեցնող շարժումներ
• մատների շփում
• երկու ձեռքերի փոքր շարժումներ:

Դրանից հետո, սովորաբար, դեպքի մասին որևէ հիշողություն չի մնում: Սակայն, եթե ցնցումն ավելի երկար է, անձը կարող է տեղյակ լինել բաց թողնված ժամանակի մասին: Որոշ մարդիկ ամեն օր ունենում են բազմաթիվ դրվագներ: Երբ դա տեղի է ունենում, կարող է խանգարել դպրոցի կամ ամենօրյա գործունեությանը:

Երեխայի մոտ կարող է որոշ ժամանակ առաջանալ աբսանսային ցնցումներ, նախքան չափահաս մարդը նկատի դրանք: Սա պայմանավորված է նրանով, որ ցնցումները շատ կարճատև են: Երեխայի սովորելու կարողության անկումը կարող է լինել ցնցումային խանգարման առաջին նշանը: Ուսուցիչները կարող են ասել, որ երեխան դժվարանում է ուշադրություն դարձնել կամ, որ երեխան հաճախ երազում է:

Ե՞րբ դիմել բժշկին

Կապ հաստատեք ձեր երեխայի մանկաբույժի հետ, եթե՝

• դուք մտահոգված եք, որ ձեր երեխան կարող է ունենալ ցնցումներ
• ձեր երեխան ունի էպիլեպսիա, սակայն նրա մոտ առաջացել են նոր տեսակի ցնցումային ախտանիշներ
• ցնցումները շարունակում են առաջանալ՝ չնայած հակացնցումային դեղամիջոց ընդունելուն։

Զանգեք 1-03 կամ կապ հաստատեք ձեր շրջանի շտապ օգնության ծառայության հետ հետևյալ դեպքերում:

• Դուք դիտարկում եք երեխայի մոտ երկարատև ավտոմատ վարքագծեր, որորոնք տևում են րոպեներից մինչև ժամեր: Սա կարող է ներառել այնպիսի գործողություններ, ինչպիսիք են առանց իրազեկության ուտելը կամ շարժվելը: Այն նաև կարող է ներառել երկարատև շփովածություն: Սրանք էպիլեպտիկ վիճակ (status epilepticus) կոչվող խնդրի հնարավոր ախտանիշներն են:
• Ցանկացած նոր ցնցում տևում է ավելի քան հինգ րոպե: