Գրադարան

Ամենորեա. պատճառներ

Ամենորեա. պատճառներ

Time Read 3 րոպե

​Դաշտանի բացակայությունը կարող է առաջանալ տարբեր պատճառներով:

Որոշները նորմալ և բնական են, մինչդեռ մյուսները կարող են լինել դեղորայքի կողմնակի ազդեցություն կամ առողջական խնդրի նշան:

Բնական կամ ֆիզիոլոգիական ամենորեա

Ձեր կյանքի ընթացքում դաշտանները կարող են բացակայել բնական պատճառներով, ինչպիսիք են՝

  • հղիություն
  • կրծքով կերակրում
  • դաշտանադադար (մենոպաուզա կամ կլիմաքս):

Հակաբեղմնավորիչներ

Որոշ կանայք, ովքեր օգտագործում են հակաբեղմնավորիչ հաբեր (բերանային կամ օրալ կոնտրացեպտիվներ), կարող են չունենալ դաշտաններ: Նույնիսկ այս դեղերի ընդունումը դադարեցնելուց հետո կարող է պահանջվել որոշակի ժամանակ, մինչև ձեր կանոնավոր ամենամսյա ձվազատումները (օվուլյացիա) և դաշտանները վերականգնվեն: Ներարկվող կամ իմպլանտացված հակաբեղմնավորիչները, ինչպես նաև ներարգանդային միջոցների որոշ տեսակներ նույնպես կարող են առաջացնել դաշտանների բացակայություն:

Դեղամիջոցներ

Որոշ տեսակի դեղամիջոցներ կարող են առաջացնել դաշտանների ընդհատում: Օրինակներից են՝

  • հակափսիխոտիկ դեղամիջոցներ
  • քաղցկեղի քիմիոթերապիա
  • հակադեպրեսանտներ
  • արյան ճնշման դեղեր
  • ալերգիայի դեղամիջոցներ:

Ապրելակերպի գործոններ

Երբեմն ապրելակերպի գործոնները նպաստում են ամենորեային։

  • Ցածր մարմնի քաշ. մարմնի չափազանց ցածր քաշը (մոտ 10% նորմալ քաշի դեպքում) խանգարում է օրգանիզմում բազմաթիվ հորմոնային գործառույթներին՝ պոտենցիալ դադարեցնելով ձվազատումը (օվուլյացիա): Կանայք, ովքեր ունեն սննդային խանգարումներ, ինչպիսիք են անորեքսիան կամ բուլիմիան, հաճախ դադարում են դաշտան ունենալ այս ոչ նորմալ հորմոնալ փոփոխությունների պատճառով:
  • Ավելցուկային վարժանքներ կամ մարզումներ. կանայք, ովքեր մասնակցում են այնպիսի միջոցառումների, որոնք պահանջում են խիստ մարզումներ, ինչպիսին է բալետը, կարող են բաց թողնել իրենց դաշտանային ցիկլերը: Մի քանի գործոններ միավորվում են՝ նպաստելով մարզիկների դաշտանի կորստին, այդ թվում՝ մարմնի ճարպի պակասը, սթրեսը և էներգիայի բարձր ծախսերը:
  • Սթրես. հոգեկան սթրեսը կարող է ժամանակավորապես փոխել ձեր ենթատեսաթմբի (հիպոթալամուսի) աշխատանքը՝ ձեր գլխուղեղի մի հատվածը, որը վերահսկում է դաշտանային ցիկլը կարգավորող հորմոնները: Դրա պատճառով ձվազատումը և դաշտանը կարող են դադարել: Կանոնավոր դաշտանները սովորաբար վերսկսվում են ձեր սթրեսի նվազումից հետո:

Հորմոնային շեղումներ

Բազմաթիվ տեսակի առողջական խնդիրներ կարող են առաջացնել հորմոնալ անհավասարակշռություն:

  • Պոլիկիստոզային ձվարանների համախտանիշ (ՊԿՁՀ). ՊԿՁՀ-ն առաջացնում է հորմոնների համեմատաբար բարձր և կայուն մակարդակներ, այլ ոչ թե նորմալ դաշտանային ցիկլի ընթացքում դիտարկվող ալիքաձև տատանվող մակարդակներ:
  • Վահանաձև գեղձի խանգարումներ. վահանաձև գեղձի գերակտիվությունը (թիրեոտոքսիկոզ կամ հիպերթիրեոզ) կամ վահանաձև գեղձի անբավարար ակտիվությունը (հիպոթիրեոզ) կարող են առաջացնել դաշտանային ցիկլի խախտումներ, ներառյալ ամենորեա:
  • Մակուղեղի ուռուցք. ձեր մակուղեղի (հիպոֆիզի) ոչ քաղցկեղային (բարորակ) ուռուցքը կարող է խանգարել դաշտանի հորմոնալ կարգավորմանը:
  • Վաղաժամ դաշտանադադար. դաշտանադադարը սովորաբար սկսվում է մոտ 50 տարեկանում: Սակայն, որոշ կանանց մոտ ձվարանների պաշարը նվազում է մինչև 40 տարեկանը, և դաշտանը դադարում է:

Կառուցվածքային խնդիրներ

Սեռական օրգանների հետ կապված խնդիրները նույնպես կարող են ամենորեայի պատճառ դառնալ:

  • Արգանդի սպիացում. Աշերմանի համախտանիշը՝ վիճակ, որի դեպքում արգանդի լորձաթաղանթում կուտակվում էսպիական հյուսվածք, երբեմն կարող է առաջանալ լայնացումից և կուրտաժից, կեսարյան հատումից կամ արգանդի ֆիբրոդների (միոմաների) բուժումից հետո: Արգանդի սպիացումը կանխում է արգանդի լորձաթաղանթի ցիկլային փոփոխությունները՝ նորմալ հաստացումը ու թափումը:
  • Վերարտադրողական օրգանների արատներ. երբեմն պտղի զարգացման ընթացքում առաջանում են խնդիրներ, որոնք հանգեցնում են վերարտադրողական համակարգի որոշ մասերի բացակայմանը, ինչպիսիք են արգանդը, արգանդի վզիկը կամ հեշտոցը: Քանի որ վերարտադրողական համակարգը լիովին չի զարգացել, հետագայում կյանքում դաշտանային ցիկլերը դառնում են անհնար:
  • Հեշտոցի կառուցվածքային արատներ. հեշտոցի խցանումը կարող է կանխել տեսանելի դաշտանային արյունահոսությունը: Հեշտոցում կարող է լինել թաղանթ կամ պատ, որն արգելափակում է արգանդից և արգանդի վզիկից արյան արտահոսքը:

Ռիսկի գործոններ

Գործոնները, որոնք կարող են մեծացնել ամենորեայի ռիսկը, ներառում են հետևյալը:

  • Ընտանեկան պատմություն. եթե ձեր ընտանիքի մյուս կանայք ունեցել են ամենորեա, ապա դուք կարող եք ժառանգել խնդրի առաջացման նախատրամադրվածությունը:
  • Սննման վարքի խանգարումներ. եթե դուք ունեք սննման խանգարումներ, ինչպիսիք են անորեքսիան կամ բուլիմիան, ամենորեայի զարգացման ավելի մեծ վտանգի տակ եք:
  • Աթլետիկ մարզումներ. մարմնամարզական ծանր մարզումները կարող են մեծացնել ամենորեայի ռիսկը:
  • Որոշ գինեկոլոգիական միջամտությունների պատմություն. եթե նախկինում ունեցել եք դիլատացիայի և կյուրետաժի միջամտություն (պարանոցի լայնացում և արգանդի պատի քերում), հատկապես հղիության հետ կապված, կամ միջամտություն, որը հայտնի է որպես հանգույցի էլեկտրադիաթերմի հեռացման միջամտություն, ամենորեայի զարգացման ռիսկն ավելի բարձր է:

Հոդվածը տեղադրվել է՝ 05-04-2021 վերանայվել է՝ 16-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով