Սուր շնչառական դիսթրես համախտանիշ. ախտանիշներ

Սուր շնչառական դիսթրես համախտանիշ. ախտանիշներ

​Սուր շնչառական դիսթրես համախտանիշի (ՍՇԴՀ) առաջին ախտանիշներն են օդի պակասի և թոքերում բավարար օդ չստանալու զգացումը, շնչառության հաճախացումը և ​արյան մեջ թթվածնի մակարդակի նվազեցումը:

ՍՇԴՀ այս ախտանիշները հաճախ զարգանում են պատճառային իրադարձությունից հետո մինչև 2 ժամվա ընթացքում, սակայն երբեմն ընթացքը կարող է ձգձգվել մի քանի օր:

ՍՇԴՀ-ի մյուս ախտանիշները կախված են այս վիճակին հասցնող հիմնական հիվանդությունից կամ վիճակից: Օրինակ,եթե թոքերի սուր վնասման պատճառը թոքաբորբն է, կարող եք մինչև դժվարաշնչության զարգանալը բողոքել հազից և մարմնի ջերմաստիճանի բարձրացումից:

Որոշ դեպքերում ՍՇԴՀ-ով մարդկանց մոտ կարող են ի հայտ գալ ցածր արյան ճնշում (հիպոտենզիա կամ կոլապս), շփոթվածություն և ծայրաստիճան թուլություն և հոգնածություն: Սա կարող է նշանակել, որ ձեր կենսականորեն կարևոր օրգանները, օրինակ՝ երիկամները և սիրտը, չեն ստանում բավարար թթվածին պարունակող արյուն:

Բազմաթիվ մարդիկ, ում մոտ զարգանում է ՍՇԴՀ, որևէ այլ ծանր հիվանդության կապակցությամբ ստանում են հիվանդանոցային բուժում: Շատ ավելի հազվադեպ ՍՇԴՀ կարող է զարգանալ հիվանդանոցից դուրս, օրինակ՝ սուր թոքաբորբով մարդկանց մոտ:

Եթե ձեզ կամ ձեր ծանոթներից մեկնումեկի մոտ ի հայտ է եկել շնչառության հետ կապված որևէ խնդիր, առանց հետաձգելու կապ հաստատեք ձեր բժշկի հետ, իսկ եթե ունեք ծանր շնչարգելություն, օդի պակասի սուր զգացում և ծանր հևոց, անհապաղ զանգեք 1-03 և կանչեք շտապբուժօգնություն:

Հոդվածը վերանայվել է՝ 23-04-2021