Գրադարան
Ասկարիդոզ. ախտանիշներ
2 րոպե
Ասկարիդոզով վարակված մարդկանց մեծ մասը գանգատներ կամ ախտանիշներ չունի:
Չափավորից մինչև ծանր ընթացքով ասկարիդոզներն առաջացնում են տարբեր գանգատներ կամ ախտանիշներ՝ կախված նրանից, թե ձեր օրգանիզմի որ հատվածն է ախտահարված:
Թոքեր
Այն բանից հետո, երբ դուք կուլ եք տալիս ասկարիդի փոքրիկ (մանրադիտակային) ձվիկները, դրանք դուրս են գալիս բարակ աղիներում, և թրթուրները արյան հոսքով կամ ավշային համակարգով տեղափոխվում են թոքեր: Այս փուլում դուք կարող եք զգալ ասթմային կամ թոքաբորբին նմանվող գանգատներ և ախտանիշներ, այդ թվում՝
- համառ հազ
- շնչարգելություն
- խզզոցներ:
Թոքերում 10-14 օր անցկացնելուց հետո թրթուրները շարժվում են դեպի կոկորդ, որտեղ դուք հազում եք դրանց, ապա կուլ տալիս:
Աղիներ
Երկրորդ անգամ բարակ աղիներում հայտնված ասկարիդի թրթուրները հասունանում են մինչև հասուն որդերի, և մինչև սատկելը շարունակում են ապրել ձեր աղիներում: Թեթևից մինչև չափավոր ասկարիդոզի ժամանակ աղիքային վարակը կարող է առաջացնել՝
- անորոշ որովայնային ցավեր
- սրտխառնոց և փսխում
- փորլուծություն կամ արյունոտ կղանք:
Եթե աղիներում ունեք մեծ քանակությամբ որդեր, կարող եք ունենալ՝
- որովայնի ուժեղ ցավեր
- հոգնածություն
- փսխում
- քաշի կորուստ կամ թերսնուցում
- փսխման զանգվածի կամ կղանքի մեջ որդի առկայություն:
Ե՞րբ դիմել բժշկին
Զրուցեք ձեր բժշկի հետ, եթե ունեք որովայնի մշտական ցավ, փորլուծություն կամ սրտխառնոց:
Հոդվածը տեղադրվել է՝ 08-11-2022 վերանայվել է՝ 16-03-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
