Ախտորոշում - Ասկարիդոզ

Ասկարդիոզն ախտորոշելու համար ձեր բժիշկը կարող է ուսումնասիրել ձեր ախտանիշները և նշանակել թեստեր:

Ծանր վարակների դեպքում հնարավոր է որդեր հայտնաբերել հազից կամ փսխելուց հետո: Որդերը կարող են դուրս գալ մարմնի այլ բացվածքներից, օրինակ՝ բերանից կամ քթանցքներից: Եթե դա պատահի ձեզ հետ, տարեք որդը ձեր բժշկի մոտ, որ նա կարողանա նույնականացնել այն և նշանակել համապատասխան բուժում:

Կղանքի թեստեր

Հասուն էգ ասկարիդի որդերը ձեր աղիքներում սկսում են ձվիկներ ածել: Այս ձվիկներն անցնում են ձեր մարսողական համակարգով և ի վերջո կարող են հայտնաբերվել ձեր կղանքում:

Ասկարիդոզն ախտորոշելու համար ձեր բժիշկը մանրադիտակով կզննի ձեր կղանքը ձվիկների և թրթուրների համար: Սակայն ասկարիդի ձվիկները և թրթուրները կղանքի մեջ հայտնվում են վարակվելուց միայն առնվազն 40 օր հետո: Իսկ եթե դուք վարակված եք միայն արու որդերով, ապա կղանքում ձվիկներ չեք ունենա:

Արյան թեստեր

Ձեր արյունը կարող է հետազոտվել որոշակի տեսակի սպիտակ արյան բջիջների առկայության համար, որոնք կոչվում են էոզինոֆիլներ: Ասկարիդոզը կարող է բարձրացնել ձեր էոզինոֆիլների քանակը, սակայն նույնը նաև կարող է գրանցվել այլ առողջական խնդիրների դեպքում:

Պատկերային հետազոտություններ

• Ռենտգեն հետազոտություն. եթե դուք վարակված եք որդերով, ապա որդերի զանգվածը կարող է տեսանելի լինել որովայնի ռենտգենով: Որոշ դեպքերում կրծքավանդակի ռենտգենը կարող է հայտնաբերել թոքերի թրթուրները:
• Գերձայնային հետազոտություն (սոնոգրաֆիա). գերձայնային հետազոտությունը կարող է ցույց տալ ենթաստամոքսային գեղձի կամ լյարդի ճիճուները: Այս տեխնոլոգիան օգտագործում է ձայնային ալիքներ՝ ներքին օրգանների պատկերներ ստեղծելու համար:
• Համակարգչային տոմոգրաֆիա (ԿՏ) կամ մագնիսա-ռեզոնանսային տոմոգրաֆիա (ՄՌՏ). երկու տեսակի հետազոտություններն էլ ստեղծում են ներքին կառուցվածքների մանրամասն պատկերներ, որոնք կարող են օգնել ձեր բժշկին հայտնաբերելու ճիճուներ, որոնք արգելափակում են լյարդի կամ ենթաստամոքսային գեղձի ծորանները: ԿՏ սքանավորումները միավորում են ռենտգենյան պատկերները, որոնք արվել են բազմաթիվ տեսանկյուններից: ՄՌՏ-ն օգտագործում է ռադիոալիքներ և ուժեղ մագնիսական դաշտ: