Գրադարան

Աստիգմատիզմ. բուժում

Աստիգմատիզմ. բուժում

Time Read 2 րոպե

Աստիգմատիզմի բուժման նպատակն է բարելավել տեսողության հստակությունը և աչքերի հարմարավետությունը:

Բուժումներն են շտկող ոսպնյակները կամ ռեֆրակցիոն վիրահատությունը:

Շտկող ոսպնյակներ

Շտկող (ուղղող) ոսպնյակներ կրելը բուժում է աստիգմատիզմը՝ հակազդելով ձեր եղջերաթաղանթի կամ ոսպնյակի անհավասար կորությանը:

Շտկող ոսպնյակների տեսակները ներառում են հետևյալը:

  • Ակնոց. ակնոցը պատրաստված է ոսպնյակներից, որոնք օգնում են աչքի անհավասար ձևի փոխլրացմանը: Ոսպնյակների օգնությամբ լույսը ճիշտ է բեկվում աչքի մեջ: Ակնոցները կարող են նաև ուղղել բեկման այլ սխալները, ինչպիսիք են կարճատեսությունը կամ հեռատեսությունը:
  • Կոնտակտային լինզաներ. ակնոցների նման, կոնտակտային լինզաները կարող են ուղղել աստիգմատիզմի մեծ մասը: Դրանք հասանելի են տարբեր տեսակներով և ոճերով: Կոնտակտային լինզաները նաև օգտագործվում են օրթոկերատոլոգիա կոչվող միջոցառման ընթացքում: Այս դեպքում դուք գիշերը քնած ժամանակ կրում եք կոշտ կոնտակտային լինզաներ՝ մինչև ձեր աչքի կորությունն ուղղվի: Այնուհետև սկսում եք կրել այդ լինզաները կրել ավելի հազվադեպ՝ նոր ձևը պահպանելու համար։ Եթե բուժումը դադարեցվի, աչքը վերադառնում է իր նախկին ձևին և ռեֆրակցիոն սխալին: Կոնտակտային լինզաների երկարատև օգտագործումը մեծացնում է աչքի վարակի վտանգը: Հարցրեք ձեր ակնաբույժին կոնտակտային լինզաների առավելությունների և թերությունների, ինչպես նաև այն մասին, թե որն է լավագույնը ձեզ համար:

Ռեֆրակցիոն վիրահատություն

Ռեֆրակցիոն վիրաբուժությունը բարելավում է տեսողությունը և նվազեցնում ակնոցների կամ կոնտակտային լինզաների կարիքը: Աչքի վիրաբույժն օգտագործում է լազերային ճառագայթ՝ եղջերաթաղանթի կորերը վերափոխելու համար, ինչը շտկում է ռեֆրակցիոն սխալը։ Վիրահատությունից առաջ բժիշկները կգնահատեն ձեզ և կորոշեն, թե արդյոք դուք ռեֆրակցիոն վիրահատության թեկնածու եք:

Աստիգմատիզմի համար ռեֆրակցիոն վիրաբուժության տեսակները ներառում են հետևյալը՝

  • լազեր-օժանդակող in-situ կերատոմիլեուս (LASIK)
  • լազեր-օժանդակող սուբէպիթելիալ կերատէկտոմիա (LASЕK)
  • ֆոտոռեֆրակցիոն կերատէկտոմիա (PRK)
  • Epi-LASIK, որը LASЕK-ի տարբերակներից է
  • փոքր-կտրվածքային լենտիկուլի էսքստրակցիա (SMILE):

Ռեֆրակցիոն վիրահատությունների այլ տեսակներից են մաքուր ոսպնյակների էքստրակցիան և իմպլանտացվող կոնտակտային ոսպնյակները: Ռեֆրակցիոն վիրահատության լավագույն մեթոդ չկա, և դուք պետք է որոշում կայացնեք միայն ձեր վիրաբույժի հետ ամբողջական գնահատումից և մանրակրկիտ քննարկումից հետո:

Ռեֆրակցիոն վիրահատությունից հետո առաջացող հնարավոր բարդությունների օրինակներից են՝

  • ձեր սկզբնական խնդրի թերուղղումը կամ գերուղղումը
  • տեսողական կողմնակի ազդեցություններ, ինչպիսիք են լուսապսակը կամ լույսերի շուրջ աստղաձև աղավաղումները
  • չոր աչք
  • վարակ
  • եղջերաթաղանթի սպիացում
  • հազվադեպ՝ տեսողության կորուստ:

Քննարկեք այս միջամտությունների հնարավոր ռիսկերն ու օգուտները ձեր ակնաբույժի հետ:

Հոդվածը տեղադրվել է՝ 09-04-2023 վերանայվել է՝ 07-11-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով